Toyange wanɛ wakoka
1. Ngande wɛnyaso dia sho mbɔsaka diɛsɛ diele la so dia sambisha la nɛmɔ?
1 Lo nshi yakakambaka Yeso olimu ande w’esambishelo, nde akasale tshɛ dia mbewoya akanga a memakana lokumu l’ɔlɔlɔ lakeketsha. (Is. 61:1, 2) Oko weso atomami ndo enyimpala lo dihole dia Kristo, ɛlɔ kɛnɛ sho tekɔ la diɛsɛ dia lânde dia mbôkoya lo nyanga wanɛ wakoka wele lo ɛtshi kaso ka nkɛtɛ l’etete tshɛ ndo aha la mpekɔ.—Mat. 10:11; 2 Kor. 5:20.
2. Ngande wakadiɛnama dia Paulo akɔtɔnganyiyaka esambishelo kande l’akambo wakahomanaka la nde, ndo etombelo akɔna wakandakondjaka?
2 Tɔtɔnganyiya esambishelo kaso l’akambo wahomana la so: Ɔpɔstɔlɔ Paulo aki la mbekelo ka ntshɔka ntondo lo shinangɔnga dia tosambisha ase Juda ndo ambetawudi w’ase Wedja. (Etsha 14:1) La Filipi, nde la Silasi wakatshu dia toyanga anto ‘lo dihole diakawafɔnyaka ɔnɛ dihole dia dɔmbɛlɔ mbediɔ.’ Vɔ wakatatɛ sambisha olui ɔmɔtshi wa wamato ndo ɔmɔtshi l’atei awɔ, mbuta ate Ludiya, aketawɔ akambo wa mɛtɛ esadi eto.—Etsha 16:12-15.
3. Naa waaso akina wakokaso monga la wɔ dia sambisha lâdiko di’esambishelo ka lo luudu la luudu?
3 Lâdiko dia ɛtshi ka nkɛtɛ kasambishaso lo luudu la luudu, shi sho kokaka sambisha ndo anto watanema l’ahole wɔsawɔ mituka, lo waa parkɛ, l’ahole w’olimu, l’asanga wa mboka wele l’anto efula ndo l’ahole wandawɔ okanda? Ondo sho kokaka sambisha anto wadjasɛ lo nkombo yadihama wonya tshɛ ndo yalamema l’ekimanyielo ka mikanda kana ka telefɔnɛ. Shishimaka akambo weta ndo mbɔtɔnganyiyaka esambishelo kaso l’akambo wa lo ɛtshi kaso ka nkɛtɛ ayotokimanyiya dia monga la ‘akambo efula wa sala l’olimu wa Nkumadiɔndjɔ.’—1 Kor. 15:58.
4. Naa waaso akina wele la so naka etshumanelo kaso bu la ɛtshi ka nkɛtɛ ka woke?
4 Apandjudi efula wakonge la diaaso dia pamia olimu awɔ lo monɔ otsha l’etshumanelo kekina kele lo wodja awɔ kana lo wodja okina. Akina wakeke ɔtɛkɛta okina dia sambisha anto wakaye oma lo wodja okina.
5. Ngande wahombaso mbɔsa tena diasɛnaso nɛ, ndo ahombaso ndjashikikɛ dia sala?
5 Sho tshɛ pombaka mbeya dia ‘andja ɔnɛ mbele ekambɔ’ kaso. (Mat. 9:37; 13:38) Lam’ele ekomelo ka dikongɛ di’akambo dia kɔlɔ nɛ kaya suke, ɔmɔmɔ la l’atei aso pombaka sɛdingola dimɛna akambo wele la nde, akoka ande ndo waaso wele la nde dia pamia olimu ande. Jehowa toshikikɛka ɔnɛ naka sho mbetsha wahɔ wa Diolelo lo dihole dia ntondo, kete nde ayɔtshɔkɔla welo wadjaso l’otema ɔtɔi dia pamia olimu w’esambishelo.—Mat. 6:33.