LƆSƐNƆ L’OKRISTO
Tokondja ɔngɛnɔngɛnɔ lo nsambisha lokumu l’ɔlɔlɔ
Onde wɛ atongaka l’okakatanu dia nsambisha? Efula ka l’atei aso wayokadimola dia vɔ wambongaka l’okakatanu ɔsɔ. Lande na? Ondo l’ɔtɛ wa wendjudi wahomana la so mbala la mbala kana l’ɔtɛ wa lohetsho lele l’anto wa l’ɛtshi kaso ka nkɛtɛ kana l’ɔtɛ wa wɔma wa ntɛkɛta l’anto wahateye. Lo mɛtɛ, awui asɔ kokaka nkitshakitsha ɔngɛnɔngɛnɔ aso. Koko, teye dia tekɔ lo ntɛmɔla Nzambi k’ɔngɛnɔngɛnɔ kalanga dia sho mbokambɛ l’ɔngɛnɔngɛnɔ. (Os 100:2; 1Ti 1:11) Naa ɛkɔkɔ esato w’eshika watotshutshuya dia ngɛnangɛna dia nsambisha?
Ɔkɔkɔ wa ntondo ele, tekɔ lo mbewoya anto losango lasha elongamelo. Kaanga mbele ɛlɔ kɛnɛ anto efula waya bu l’elongamelo, sho koka ndodia etema w’anto la “lokumu l’ɔlɔlɔ la dui dimɔtshi dia dimɛna efula.” (Isa 52:7) Koko lokumu l’ɔlɔlɔ la Diolelo diaki Nzambi koka tolodia ndo sho l’ɔngɛnɔngɛnɔ. La ntondo ka ntshɔ dia tosambisha, kana yimba lo ɛtshɔkɔ wayela Diolelo diaki Nzambi la nkɛtɛ.
Ɔkɔkɔ wa hende ele, lokumu l’ɔlɔlɔ lasambishaso kimanyiyaka anto lo demba ndo lo nyuma. Vɔ mbekaka dia ntshika ditshelo dia kɔlɔ ndo dia monga la elongamelo ka lɔsɛnɔ la pondjo. (Isa 48:17, 18; Rɔm 1:16) Sho kokaka ndjaɛna oko anto wakamba olimu wa nyanga ndo shimbɛ anto. Kaanga mbele anto amɔtshi hawolange sho mbakimanyiya, sho tetemalaka nyanga wanɛ walanga dia sho mbakimanyiya.—Mat 10:11-14.
Ɔkɔkɔ wa sato ndo woleki ohomba ele, olimu aso w’esambishelo tombolaka Jehowa. Nde mbɔsaka olimu aso w’esambishelo la nɛmɔ di’efula. (Isa 43:10; Hɛb 6:10) Ndo nto, nde toshaka nyuma kande k’ekila la lokaho tshɛ dia nkamba olimu ɔsɔ. Ɔnkɔnɛ, tɔlɔmbɛ Jehowa dia nde tosha ɔngɛnɔngɛnɔ, nɛ dia vɔ wekɔ etenyi k’olowa wa nyuma. (Nga 5:22) L’ekimanyielo kande, sho koka ntondoya ekiyanu aso ndo nsambisha la dihonga. (Ets 4:31) Ɔnkɔnɛ, oyadi woho akɔna wayɔsa anto wa l’ɛtshi kaso ka nkɛtɛ losango laso, tayotana ɔngɛnɔngɛnɔ l’ɔkɛndɛ wakawatosha wa nsambisha.—Ɛzk 3:3.
Tɛdikɔ takɔna takokayɛ mbɔsa lo kɛnɛ kendana l’esambishelo? Ngande wakokayɛ nkɛnɛmɔla ɔngɛnɔngɛnɔ?
NYENDE VIDƐO YELE L’ƆTƐ A DUI ƆNƐ: TOONGE NTO L’ƆNGƐNƆNGƐNƆ WAKI LA SO LO MBEKAKA NDO LO KANAKA YIMBA LA KƐNƐ KEKASO, OMA LAASƆ NYOKADIMOLE LO AMBOLA WAYELA ANƐ:
Lande na kahombaso ndeka mbidja yimba lo yoho yayaleshaso lo nyuma, oyadi sho mbetshaka wenya efula l’esambishelo ngɔndɔ tshɛ?
Lo yoho yakɔna yahombaso mbokoya Mariya?
Etena kakɔna kakanayɛ yimba lo Ɔtɛkɛta wa Nzambi?
Kakɔna kakɔngɛnyangɛnya etena kasambishayɛ lokumu l’ɔlɔlɔ?