Ambola W’oma Le Ambadi
Onde ɛtɛkɛta w’ɔpɔstɔlɔ Pɔɔlɔ wele lo 1 Kɔrɛtɔ 15:29 nembetshiyaka di’Akristo amɔtshi wa lo nshi yande wakabatizamaka lo wahɔ w’anto wakavu?
Bu, ndooko dihole ɔtɔi lo Bible kana l’abuku w’ɛkɔndɔ diɛnyawɔ di’Akristo wakabatizama lo wahɔ w’anto wakavu.
Yoho yakakadimɔma divɛsa nɛ lo Bible efula, konyaka anto amɔtshi dia mfɔnya ɔnɛ lo nshi ya Pɔɔlɔ anto amɔtshi wakabatizamaka l’ashi lo wahɔ w’anto wakavu. Ɛnyɛlɔ: “Naka antu wakavu hawulama, okoko wana wâbatizamelawo?”—Bible k’Ekila.
Koko tende kɛnɛ kakate nomb’ewo hiende yendana l’awui wa lo Bible. Dr. Gregory Lockwood akate ate ndooko djembetelo lo Bible kana l’abuku w’ɛkɔndɔ “yɛnya ɔnɛ ekɔ onto ɔmɔtshi lakabatizama lo wahɔ w’anto wakavu.” Woho akɔ wamɛ mbele, ombetsha Gordon D. Fee akafunde ate: “Ndooko dihole l’ɔkɔndɔ kana lo Bible diɛnyawɔ dia batisimu kɛsɔ kakasalema. Daka di’oyoyo hatɛkɛta kaanga yema dia batisimu kɛsɔ; woho wa batisimu kɛsɔ kombishama kaanga l’ɔtɛmwɛlɔ ɔtɔi wa lo ntambe ka ntondo kana l’ɛtɛmwɛlɔ wakakengama yema tshitshɛ l’ɔkɔngɔ wa nyɔi k’apɔstɔlɔ.”
Bible mbutaka dia Yeso akadjangɛ ambeki ande ɔnɛ: “Nyetɛ anto wa lo wedja tshɛ ambeki, nyaabatize . . . , nyowaetshake dia nkitanyiya akambo tshɛ.” (Mat. 28:19, 20) La ntondo ka onto ndjokoma ombeki wambobatizama, nde akahombaka mbeka, mbetawɔ ndo nkitanyiya awui wendana la Jehowa ndo Ɔnande. Onto lambovɔ ndo lele lo diombo hakoke nsala dui sɔ; ndo Okristo weke la lɔsɛnɔ, hakoke nsala dui sɔ lo dikambo diande.—Ond. 9:5, 10; Jni. 4:1; 1 Kɔr. 1:14-16.
Ko laasɔ, kakɔna kakataka Pɔɔlɔ?
Ase Kɔrɛtɔ amɔtshi kombetawɔka dia anto wakavu wayolɔ. (1 Kɔr. 15:12) Pɔɔlɔ akawaɛnya dia dui sɔ komonga mɛtɛ. Nde akate ɔnɛ: “Lushi la lushi dimi mongaka lo waale wa nyɔi.” Lo mɛtɛ, nde aki eke la lɔsɛnɔ. Koko kaanga mbakandongaka mbala la mbala lo waale, nde aki l’eshikikelo ɔnɛ l’ɔkɔngɔ wa nyɔi kande, nde ayolɔ dia tɔsɛna l’olongo oko Yeso.—1 Kɔr. 15:30-32, 42-44.
Ase Kɔrɛtɔ wakahombaka nshihodia ɔnɛ monga Akristo w’akitami akalembetshiyaka dia vɔ wakahombaka mpomana l’ehemba lushi la lushi ndo mvɔ ntondo ka vɔ ndjolwama. “[B]atizama lo Kristo Yeso” nembetshiyaka “[b]atizama lo nyɔi kande.” (Rɔmɔ 6:3) Dui sɔ nembetshiyaka dia l’ɛnyɛlɔ ka Yeso, vɔ wakahombe mpomana l’ehemba efula ndo mvɔ dia vɔ ndjolɔ dia tɔsɛna l’olongo.
Ɛnɔnyi ndekana ehende l’ɔkɔngɔ wa Yeso batizama l’ashi, nde akatɛ apɔstɔlɔ ande ahende ate: “Nyayobatizama batisimu kayangami batizama.” (Makɔ 10:38, 39) L’etena kɛsɔ Yeso ko batizama l’ashi. Nde akalange mbuta ɔnɛ monga la kɔlamelo le Nzambi ayowokonya polo lo nyɔi kande. Pɔɔlɔ akafunde dia akitami ‘wayosowa kaamɛ dia vɔ mbeya tombwama kaamɛ.’ (Rɔmɔ 8:16, 17; 2 Kɔr. 4:17) Diakɔ diele vɔ lawɔ wakahombe mvɔ ko mbolwama dia tɔsɛna l’olongo.
Ɔnkɔnɛ, ɛtɛkɛta wa Pɔɔlɔ koka kadimɔma lo yoho ya shikaa ɔnɛ: “Naka ngasɔ, kakɔna kayokomɛ wanɛ wabatizama l’oyango wa monga edo? Naka anto wavɔ hawotolɔ, lande na kabatizamawɔ vɔ lawɔ l’oyango wa monga ngasɔ?”