Onde wɛ akeyaka?
Lo ntambe ka ntondo, kakɔna kakasalaka ɛlɔmbɛdi waki lo tɛmpɛlɔ ka la Jɛrusalɛma la dikila l’ɔkɔngɔ wa vɔ ndjaka nyama dia ndjilambola?
ƆNƆNYI tshɛ, ɛlɔmbɛdi wa l’Isariyɛlɛ w’edjedja wakalambolaka nunu dia nyama oko elambo lo tɛmpɛlɔ. Lo ndjela ɔkɔndɔdi w’ose Juda wa lo tambe ka ntondo wakawelɛka Josephus, l’etena ka dambo di’elekanelo, ɛkɔkɔ ndekana 250 000 wakalambɔmaka oko elambo wa lotshumba ndo etombelo waki la dui sɔ ele dikila efula diakakɛlaka lo dihole di’elambwelo. (Lɛw. 1:10, 11; Wal. 28:16, 19) Lende akatshɔka dikila sɔ tshɛ?
Anyangi w’emindo wakashola ɛlɔnda waki lo tɛmpɛlɔ kakake Hɛrɔdɛ wakakambemaka olimu polo l’etena kakayolanyema tɛmpɛlɔ l’ɔnɔnyi wa 70 T.D. Ɛlɔnda ɛsɔ wakasalema dia kɛlɔyaka dikila oma lo tɛmpɛlɔ.
Tɔsɛdingole awui ahende wendana la woho wakawakambaka l’ɛlɔnda ɛsɔ:
Wesho wa l’ɛse ka dihole di’elambwelo: Elembetshielo wa woho wakakongɛma ɛlɔnda tanemaka lo dibuku dielɛwɔ Mishnah, lɛnɛ akafundama ɛlɛmbɛ wa l’onyɔ w’ase Juda l’etatelo ka ntambe ka sato lo T.D. Dibuku sɔ mbutaka ɔnɛ: “Aki wesho ehende waki lo tshuku diaki lo sidɛ-owɛstɛ . . . ndo lo wesho ɛsɔ mbakakɛlaka dikila oma lo lɛkɛ la ɛstɛ otsha lo lɛkɛ la sidɛ ndo dikila dia nyama yakawalambolaka la ashi wakawakambaka la wɔ dia mbɛdja dihole di’elambwelo, wakakɛla l’ɛlɔnda otsha Okidi wa Kidirɔna.”
Anyangi w’emindo mbetawɔka dia wakakambaka la “ɛlɔnda” dia minya dikila oma lo dihole di’elambwelo. Dibuku dimɔtshi di’ɛkɔndɔ di’ase Juda (The Cambridge History of Judaism) shikikɛka dia wakashola woho “wakakongɛma ɛlɔnda” suke la tɛmpɛlɔ. Diɔ mbutaka ɔnɛ: “Kɛsɔ akakimanyiyaka dia nkɛlɔya ashi wɔsɔhanyemi kaamɛ la dikila di’oma lo elambwelo dia mbatondja l’andja wa tɛmpɛlɔ.”
Ashi wakakambaka lawɔ: Ɛlɔmbɛdi waki l’ohomba w’ashi efula dia mbetɛ dihole di’elambwelo ndo ɛlɔnda pudipudi. Dia nkotsha ɔkɛndɛ w’ohomba ɔsɔ, ɛlɔmbɛdi wakakondjaka ashi waki la wɔ ohomba oma l’osomba. Wakakambaka l’ɛlɔnda dia ntɔla ashi otsha lo dihole di’elambwelo. Dia momba ashi, wakakambaka la wa basɛ kana afuku w’ashi. Onyangi w’emindo welɛwɔ Joseph Patrich akate ate: “Yoho yakawombaka ashi, yakawasolaka ndo yakawakongɛ ɛlɔnda, aki yoho ya laande lo nshi shɔ.”