ƐLƆNGƆLƆNGƆ WEKƆ LO NDJAMBOLA
Onde dieyanelo dia lam’asa pami la pami kana womto la womoto ekɔ kɔlɔ?
“Lam’akamayolaka, okakatanu ɔmɔtshi wa wolo wakamalɔshanaka la wɔ ele wa mbeyana l’asekami apami. Lakafɔnyaka dia okakatanu ɔsɔ wayoshila, koko polo ndo ɛlɔ tokanyi tɔsɔ takatatetemala fukutanyami.”—David, ɛnɔnyi 23.
David ekɔ Okristo wakombola ngɛnyangɛnya Nzambi. Onde nde koka nsala dikambo sɔ etena kekende la nsaki ka mbeyana l’onto lele pami oko nde? Ngande mɛtɛ wayaoka Nzambi lo dikambo dia dieyanelo dia lam’asa pami la pami kana womoto la womoto?
Kakɔna kata Bible?
Woho wɔsa anto dieyanelo dia lam’asa pami la pami kana womoto la womoto nemanɛka la mbekelo y’anto ndo la ntena diakawole. Akristo bu wanɛ wayela tɔsɛngiya t’anto kana wanɛ “wɛmbama la asuku w’ashi ndo wɛmbama lɛnɛ la lɛnɛ la lɔpɛpɛ tshɛ la wetshelo.” (Ɛfɛsɔ 4:14) Koko, vɔ ndjelaka paka atɔndɔ wa lo Bible wendana la dieyanelo dia lam’asa pami la pami kana womoto la womoto (ndo oseka ditshelo dikina tshɛ dia woho ɔsɔ).
Atɔndɔ wa lo Bible wendana la dieyanelo dia lam’asa anto wele la tenyi dia demba diamɛ mbokɛmaka hwe. Ɔtɛkɛta wa Nzambi mbutaka ɔnɛ:
“Teyanake la pami woho watoweyanaka la womoto.”—Akambo w’ase Lɛwi 18:22.
“Lo ndjela nsaki y’etema awɔ, Nzambi, . . . akaakimɔ lo nsɔngu ka dieyanelo kambotamba elelo, nɛ dia wamato awɔ wakatshike okambelo wa dimɛna wa la alemba awɔ ndo wakatatɛ nkamba la wɔ lo yoho yele Nzambi kɔnɔngɔsɔla.”—Rɔmɔ 1:24, 26.
“Tanyokesamake. Oyadi wanɛ wasala awui wa mindo wa dieyanelo, atɛmɔdi wa dikishi, akanga wa loseka, apami wayakimɔ lo totshelo ta dieyanelo la apami, apami wasala dieyanelo la asekawɔ apami, wevi, akanga wa lokaki, ambidjɔki wa wanu, atɛnganyi ndo apɔtwanyi, vɔ tshɛ hawotokita Diolelo dia Nzambi.”—1 Kɔrɛtɔ 6:9, 10.
Lo mɛtɛ, atɔndɔ wa Nzambi mendanaka l’onto tshɛ, oyadi wanɛ wele la nsaki ka dieyanelo dia lam’asa wanɛ wele la tenyi dia demba diaamɛ kana nsaki ka dieyanelo dia lam’asa pami la womoto. Diakɔ diele, onto tshɛ pombaka monga la ndjakimɛ etena katshutshuyamande dia nsala dui dimɔtshi diahangɛnyangɛnya Nzambi.—Kɔlɔsayi 3:5.
Onde kɛsɔ nembetshika ɔnɛ . . . ?
Onde kɛsɔ nembetshiyaka dia Bible keketshaka dia sho mpetsha wanɛ wasala dieyanelo dia lam’asa wanɛ wele la tenyi dia demba diaamɛ?
Ndooko. Lo mɛtɛ, Bible hatokeketsha dia mpetsha anto amɔtshi, mbidja ndo wanɛ wasala dieyanelo dia lam’asa anto wele la tenyi dia demba diaamɛ kana diotshikitanyi. Koko tɔ totɛka ɔnɛ: “Nyosale la wolo dia nsɛna lo wɔladi l’anto tshɛ,” oyadi yoho yawɔ ya lɔsɛnɔ. (Hɛbɛru 12:14) Ɔnkɔnɛ, ekɔ kɔlɔ mpɛnyahɛnya, mpetsha kana salɛ onto leyana l’onto lele la nde tenyi dia demba diaamɛ kɔlɔ.
Onde kɛsɔ nangaka nembetshiya dia Akristo pombaka ndɔshana l’ɛlɛmbɛ wetawɔ diwala dia lam’asa pami la pami kana womoto la womoto?
Bible mɛnyaka di’atɔndɔ wa Nzambi wendana la diwala ekɔ dimama diele lam’asa pami ɔtɔi la womoto ɔtɔi. (Mateo 19:4-6) Koko, ɔkɛtshanyelo w’ɛlɛmbɛ wendana la diwala di’anto wele la tenyi dia demba diaamɛ bu ɛlɛmbɛ wa Nzambi koko wa pɔlitikɛ. Bible mbitɛka Akristo dia vɔ nama lomangemange lawɔ l’awui wa pɔlitikɛ. (Joani 18:36) Diakɔ diele, vɔ hawosukɛ ndo hawɔlɔshana l’ɛlɛmbɛ wa lɛɛta wendana la diwala dia wanɛ wele la tenyi dia demba diaamɛ.
Ko kayotota naka . . . ?
Ko kayotota naka onto ɔmɔtshi ekɔ lo nsala dieyanelo dia lam’asa pami la pami kana womoto la womoto? Onde onto ɔsɔ koka ntshikitana?
Eelo. Lo mɛtɛ, kɛsɔ mbakasalaka anto amɔtshi wa lo ntambe ka ntondo! L’ɔkɔngɔ wa nde mbita dia wanɛ wasala dieyanelo dia lam’asa wanɛ wele la tenyi dia demba diaamɛ hawotokita Diolelo dia Nzambi, Bible mbutaka ɔnɛ: “Ngasɔ mbaki amɔtshi wa l’atei anyu.”—1 Kɔrɛtɔ 6:11.
Onde kɛsɔ nembetshiyaka dia wanɛ wakatshike dia nsala dieyanelo dia lam’asa pami la pami kana womoto la womoto hawokokaki pondjo mboka nsaki kɛsɔ nto? Ndooko. Bible mbutaka ɔnɛ: “Nyɔlɔtɛ lonto l’oyoyo lele oma l’ekimanyielo k’ewo k’oshika, lekɔ lo mbetɛma oyoyo.” (Kɔlɔsayi 3:10) Otshikitanu tasalemaka yema yema.
Ko kayotota di’onto ɔmɔtshi lalanga nkamba l’atɔndɔ wa Nzambi, koko eke la nsaki ka dieyanelo dia lam’asa wanɛ wele la tenyi dia demba diaamɛ?
Oyadi nsaki kele lande kɛsɔ, nde koka nsala ɔsɔnwɛlɔ diaha nkotsha nsaki kɛsɔ nto. Lo ngande? Bible mbutaka ɔnɛ: “Nyotetemale nkɛndakɛnda la nyuma, ko hanyotoyasha kaanga yema lo nsaki ya demba.”—Ngalatiya 5:16.
Lembetɛ dia divɛsa hate dia onto ɔsɔ hatoyasha lo nsaki ya demba. Koko, naka nde ndjaleshaka mbala la mbala lo nyuma lo mbadiaka Bible ndo nɔmbaka, kete nde ayonga la wolo wa nshika ntanga la ntondo ka nsaki shɔ.
David lakatatɛkɛtshi diande la diko akɛnyi mɛtɛ ka dikambo diakɔ. L’ɔkɔngɔ wa nde mbitɛ ambutshi ande w’Akristo okakatanu ande, nde mbitaka ate: “Ekɔ oko lakaahola wotsho waki l’ahɛka ami ndo ondo lotetsha nshi yami y’ɔlɔngɔlɔngɔ dimɛna otomowatɛ dikambo sɔ esadi.”
L’ekomelo, sho mongaka l’ɔngɛnɔngɛnɔ etena kakambaso l’atɔndɔ wa Jehowa. Sho mongaka l’eshikelo dia wadjango asɔ wekɔ “esembɔki, vɔ ngɛnyangɛnyaka otema.” Ndo “ɔnɛ ladilama nongolaka difuto dia woke.”—Osambo 19:8, 11.