Ɔtɔ lɔngɛnyi l’anto wotshikitanyi

Okakatanu

Naka sho ndjaanganya l’anto wɔsaso dia wekɔ anto w’anyanya, kete sho mbeyaka nkeketsha tshelo ya nkanɛ anto kɔlɔ yele laso. Ndo naka sho mbɔtɔ lɔngɛnyi paka l’anto wele oko sho, kete sho mbeyaka ndjɔfɔnya dia yoho yaso ya nkana yimba, nsaki yaso ndo etsha aso mboleki amɛna.

Tɔndɔ dia lo Bible

“Nyodihole etema anyu hwe.”—2 KƆRƐTƆ 6:13.

Kakɔna katetsha divɛsa nɛ? “Otema” aso koka nkɛnɛmɔla nsaki yele la so l’etei k’otema. Naka sho mɛnyaka ngandji paka le anto wele oko sho, kete etema aso mbeyaka ndjodihama. Dia mbewɔ okakatanu ɔsɔ, sho pombaka monga nsuke dia mbɔtɔ lɔngɛnyi l’anto wotshikitanyi la so.

Wahɔ wakondjaso lo mbɔtɔ lɔngɛnyi l’anto wotshikitanyi la so

Etena keyaso anto akina dimɛna, sho ndjotatɛka mbeya lande na kasalawɔ akambo lo toho totshikitanyi. Ndo naka sho mpamia ngandji kaso otsha le wɔ, kete tayohɛ dia vɔ ntshikitana la so. Tayoyokoma lo mbowaɔsa la nɛmɔ di’efula, ndo tayoyoleka mbowaoka kɛtshi.

Tɔsɛdingole ɛnyɛlɔ ka Nazaré. Etena kɛmɔtshi nde akayaoke dia aya la tokanyi ta kɔlɔ otsha le wanɛ wakonɔka oma lo wedja ekina. Nde mbutaka dia kɛnɛ kakokimanyiya ate: “Laketshaka wenya ndo lakakambaka la wɔ kaamɛ. Lakayohomanaka l’anto wotshikitanyi tshɛ lo tshɛ la weho w’anto wakataka anto akina lo dikambo diawɔ. Etena kɔtɔyɛ lɔngɛnyi l’anto wotshikitanyi la yɛ mbekelo, wɛ ayoshihodia dia vɔ tshɛ bu woho ɔtɔi ndo ngandji kayɛ otsha le wɔ kayohama ndo wɛ ayowaɔsa la nɛmɔ.”

Kɛnɛ kakokayɛ nsala

Yanga waaso wa nsawola l’anto w’oma lo wodja, dioho kana ɔtɛkɛta wotshikitanyi la wɔnɛ watɛkɛta ase wodja ayɛ. Wɛ koka:

Mbambola dia vɔ kotɛ awui amɔtshi wendana la wɔ.
Mbowaelɛ dia ndjolɛ la yɛ yangɔ ya ndɛ.
Mbahokamɛ etena kakɔkɔndɔlɛwɔ ɛkɔndɔ wendana la wɔ ndo kɛnɛ kele ohomba le wɔ.

Naka wɛ mpemba dia nshihodia kɛnɛ kakahomana la wɔ, kete wɛ ayeya lande na kewɔ woho wewɔ, kɛsɔ kayokokimanyiya dia wɛ mbowaoka ngandji ndo mboka anto akina w’oma l’olui awɔ ngandji.

Ɛnyɛlɔ ka mɛtɛ: Kandasamy nde la Sookammah (Canada)

“Takole l’Afrique du sud etena kakalɔshanaka asungu l’anto wedima. Wakatshutshuya anto wotshikitanyi nkoho y’alemba dia vɔ todjasɛ l’ahole wotshikitanyi, dui sɔ diakayokonya di’anto wotshikitanyi nkoho y’alemba kananɛ kɔlɔ lam’asawɔ. Sho komonga asungu ndo takahetshaka asungu nɛ dia amɔtshi wakatosalɛka akambo oko anto wele bu la nɛmɔ. Lo etena kɛsɔ, sho kɔfɔnyaka dia taki la tshelo ya nkanɛ anto kɔlɔ. Koko, sho takayaokaka dia sho mbakawasalɛka kɔlɔ.

“Dia ntshikitanya ekanelo kaso, takatatɛ mpamia ngandji kaso ndo takɔtɔ lɔngɛnyi l’anto w’oma l’ahole wotshikitanyi. Etena kakatatatɛ mbɔtɔ lɔngɛnyi l’asungu, takayɛna dia tekɔ lo mbɔtɔnɛ l’awui efula. Sho tshɛ tekɔ l’awui ndo l’ekakatanu wa woho akɔ waamɛ.

“Takakondja diaaso dia mpangiyɛ atshukanyi amɔ w’asungu l’edja ka tshanda mɔtshi. Takayowaeyaka dimɛna. Oshimu kele edja, takayotatɛ mbaɔsa oko angɛnyi ndo taki woho ɔtɔi. Etombelo waki la dui sɔ ele, takayotatɛ mɛna asungu lo tshɛ kawɔ la sso di’ɔlɔlɔ.”