ƆKƆNDƆ 55

Kiɛndakɛnda ya pami ambokambɛ Nzambi

KEMA yana ya pami ndjo yekɔ miɛna? Lokombo lande Samuɛlɛ. Ɔlɔmbɛdi Eli ongo awahɛ lonya l’ɔtɛ. Ɛlɛkana she Samuɛlɛ la nyango le Hana wambowela le Eli.

Samuɛlɛ ekɔ paka l’ɛnɔnyi ɛnɛi kana etanu eto. Koko nde ayodjasɛ lo tabɛrnakɛlɛ ka Jehowa lasuke l’Eli ndo l’ɛlɔmbɛdi ekina. Ɛlɛkana la Hana lande na akawakimɔ ɔnawɔ lêke kiɛndakɛnda dia ndjokambɛ Jehowa lo luudu lande na? Ɛsɔ tênde dui diakɔ.

Ɛnɔnyi ɛmɔtshi la ntondo, Hana aki la lonyangu efula. Dikambo dia nde kombotaka, nde ɔnɛ lakakombolaka efula dia mbota. Ko lushi lɔmɔtshi lakaye Hana lo tabɛrnakɛlɛ ka Jehowa, nde akalɔmbɛ ate: ‘Jehowa le, tombohɛke! Naka wɛ mbishami ɔna pami, lambokolaka nte: layokoshande dia nde kokambɛ lɔsɛnɔ lande l’otondo.’

Jehowa akoke dɔmbɛlɔ dia Hana, ko l’ɔkɔngɔ a ngɔndɔ mɔtshi nde akayôtaka Samuɛlɛ. Hana akalangaka yana yande efula ndo nde akatatɛ mbêtsha awui wa Jehowa mako tshitshɛ. Nde akatɛ omɛnde ate: ‘Kam’ayokoma ɔna pialanga, ambokila diwɛlɛ, dimi layowɔtɔla lo tabɛrnakɛlɛ dia nde tokambɛka Jehowa.’

Diɔ dingo diɛnaso Hana la Ɛlɛkana l’osato wambowêla. Samuɛlɛ akangɛnangɛna efula dia kamba lo luudu la Jehowa nɛ dia ambutshi ande wakawôdia la lɔkɛwɔ l’ɔlɔlɔ. Ɔnɔnyi tshɛ, Hana nde la Ɛlɛkana wakayaka dia ndjɔtɛmɔla lo luudu lɔsɔ la laande, ndo wakendaka yana yawɔ. Ndo ɔnɔnyi tshɛ, Hana akatɔlɛka Samuɛlɛ kiutukutu y’oyoyo yakandɔtɛlɛka.

Ɛnɔnyi wakatetaka, ko Samuɛlɛ aki paka lo kamba lo tabɛrnakɛlɛ ka Jehowa, ndo Jehowa l’anto tshɛ wakôlangaka. Koko Hɔfɛni la Finɛhasi, ana w’Eli, waki anto w’anyanya. Vɔ wakasalaka akambo efula wa kɔlɔ ndo wakashaka akina ɛnyɛlɔ ka kɔlɔ dia ndo vɔ lawɔ pindolɛ Jehowa. Eli akahombe mbanya l’olimu w’ɛlɔmbɛdi, koko nde kosala ɔsɔku.

Samuɛlɛ, kiɛndakɛnda, kondjela etsha wa kɔlɔ wakandɛnaka lo tabɛrnakɛlɛ, ndo kombatshikɛ diaaso dia vɔ mboshimba di’aha nde kambɛ Jehowa. Nɛ dia anto wakayelaka aui wa Jehowa waki yema tshitshɛ tsho l’etena kakɔ, Jehowa akasale edja efula aha tɛkɛta l’anto. Enda dikambo dimɔtshi diakatombe lam’akakome Samuɛlɛ pialanga.

Samuɛlɛ akalalaka lo tabɛrnakɛlɛ, etena kakawemula dui oma lo djɔ. Nde aketawɔ ate: ‘Dim’ɔnɛ.’ Ko nde akêtɔ akalawɔ le Eli ate: ‘Wɛ akambetshi, Dim’ɔnɛ.’

Koko Eli akôkadimola ate: ‘Dimi haketshi; kalola toshame.’ Ko Samuɛlɛ akatshu la toshama.

Samuɛlɛ akoke waweta mbala ka hende ɔnɛ: ‘Samuɛlɛ!’ Ko nde akêtɔ akalawɔ nto tshale Eli ate: ‘Wɛ akambetshi, dim’ɔnɛ.’ Koko Eli akôkadimola ate: ‘Dimi haketshi ɔnami. Tshɔka toshame nto.’ Ko Samuɛlɛ akakalola lo mbeto.

Dui diakawete nto mbala ka sato ate: ‘Samuɛlɛ!’ Ko nde akalawɔ le Eli ate: ‘Dim’ɔnɛ, mbala kɛnɛ mɛtɛ wɛ akambetshi.’ Ko Eli akeye dia ekɔ paka Jehowa mbawelɛ. Ɔnkɔnɛ nde akatɛ Samuɛlɛ ate: ‘Tshɔka toshame, naka nde ambokelɛ nto, kowote wate: “Tɛkɛta, Jehowa, nɛ dia okambi ayɛ ekɔ lo nonga.” ’

Samuɛlɛ akasale ɔsɔku etena kakawelɛ Jehowa nto. Ko Jehowa akawewoya dia nde ayanga mbisha Eli nde l’anande dilanya. L’ɔkɔngɔ Hɔfɛni nde la Finɛhasi wakavu lo ta diakawalɔ l’Ase Filistiya ko lam’akoke Eli losango lakɔ, nde akakɔ ekalekale akôlɛ lowako, akavu. Ɔsɔku mbakakotshama dui dia Jehowa.

Samuɛlɛ akônge shushi ya ndjihelo l’Isariyɛlɛ lakandonge opalanga. Lam’akandonge osombe, anto wakawotɛ vate: ‘Otɔsɔnɛ nkumekanga ka tôlɛ.’ Samuɛlɛ konanga sala lolango lawɔ nɛ dia Jehowa mbaki nkumekanga kawɔ. Koko Jehowa akawotɛ dia nde nonga anto.

1 Samuele 1:​1-28; 2:​11-36; 4:​16-18; 8:​4-9.