ƆKƆNDƆ 56
Saulo—nkumekanga Ka Ntondo K’isariyɛlɛ
HƐNYI Samuɛlɛ atɛ onto esɔ l’ɔtɛ. Ngango mbakawasalɛka onto dia mɛnya ɔnɛ nde ambɔsɔnama dia ndjâla nkumekanga. Jehowa mbakatɛ Samuɛlɛ dia nde mbitɛ Saulo esɔ l’ɔtɛ. Esɔ kakɔ kaki woho wa lânde ndo solo ka dimɛna efula.
Saulo kɔfɔnyaka dia nde akasunganaka dia ndjâla nkumekanga. Nde akatɛ Samuɛlɛ ate: ‘Dimi lekɔ lo dioho dia Bɛndjamina, dioho dioleki tshitshɛ l’Isariyɛlɛ. Lande na atayɛ ɔnɛ dimi kayonga nkumekanga na?’ Jehowa akangɛnangɛnaka Saulo nɛ dia nde akayaɛnaka onto l’anyanya. Diɔ diakɔ diakandɔ̂sɔnɛ dia nde ndjâla nkumekanga.
Koko Saulo kondjala ose wola kana ngɛnɔngɛnɔ ya pami. Nde aki lo nkumbo k’ɔngɔnyi, ndo aki dombe dia pami di’olangala efula. Nde akalekaka Ase Isariyɛlɛ tshɛ l’otale! Saulo akadjaka ndo lowango efula ndo aki pami ka wolo efula. Anto wakangɛnangɛna efula nɛ dia Jehowa akasɔnɔla Saulo dia nde ndjâla nkumekanga. Vɔ tshɛ wakatatɛ mbidja saka wata vate: ‘Nkumekanga alombe.’
Atunyi w’Isariyɛlɛ waki nshi tshɛ la wolo efula. Vɔ wakâsɔkishaka tena efula. Saulo eke ka mbɔtɔ lo lowandji mbakaye Ase Amɔna dia ndjâlɔsha. Koko Saulo akatshumanya olui a woke w’alembe ndo akalɛmbia Ase Amɔna. Dikambo sɔ diakangɛnyangɛnya anto nɛ dia Saulo aki nkumekanga.
Ɛnɔnyi k’ɛnɔnyi, Saulo akalɔmbɔlaka Ase Isariyɛlɛ lo tadjaka etshumba efula l’ata. Saulo aki la dikongote di’ɔna pami ɔmɔtshi lakawelɛka Jɔnata. Jɔnata akakimanyiyaka Isariyɛlɛ dia vɔ nɛmbia ata efula. Ase Filistiya mbaki atunyi w’Ase Isariyɛlɛ wa mamba. Lushi lɔmɔtshi, Ase Filistiya wakaye nunu la nunu dia ndjɔlɔsha Ase Isariyɛlɛ.
Samuɛlɛ akatɛ Saulo dia nde konga edja ndo nde amboyolambola Jehowa olambo. Koko Samuɛlɛ akaleke mbiviya lo nde ndja. Saulo akokaka wɔma ɔnɛ Ase Filistiya wayotatɛ ta, ɔnkɔnɛ nde akatolambolaka olambo ndamɛmɛ. Lam’akayoyaka Samuɛlɛ, nde akayânyaka Saulo dia ohedia ande. Nde akawotɛ ate: ‘Jehowa ayɔsɔna onto okina dia nde ndjâla nkumekanga k’Isariyɛlɛ.’
L’ɔkɔngɔ diko, Saulo akayohindolaka nto. Ɔnkɔnɛ, Samuɛlɛ akawotɛ ate: ‘Nɛmiya awui wa Jehowa ndeka mbolambola ɛkɔkɔ w’amɛna ɔlɔlɔ. Nɛ dia wɛ halɛmiya awui wa Jehowa, nde hatokotshika oko nkumekanga k’Isariyɛlɛ.’
Sho kokaka kondja wetshelo w’ɔlɔlɔ oma lo dikambo sɔ. Diɔ tɛnyaka ohomba wa nɛmiyaka awui wa Jehowa nshi tshɛ. Ndo nto, diɔ tɛnyaka dia onto l’ɔlɔlɔ oko Saulo mbeyaka ndjokadimɔ onto la kɔlɔ. Shi sho hatolange kadimɔ kɔlɔ?
1 Samuele tshapita 9 polo 11; 13:5-14; 14:47-52; 15:1-35; 2 Samuele 1:23.