ƆKƆNDƆ 63

Sɔlɔmɔna nkumekanga ka lomba

SƆLƆMƆNA aki dikɛnda efula etena kakandayala nkumekanga. Nde akalangaka Jehowa ndo akayelaka alako w’ɛlɔlɔ wakawosha Davidi, she. Jehowa akangɛnangɛnaka Sɔlɔmɔna ko lushi lɔmɔtshi l’otsho nde akawotɛ lo dɔ ate: ‘Sɔlɔmɔna, alangayɛ dimi kosha na?’

Sɔlɔmɔna akawokadimola ate: ‘Jehowa Nzambi kami, dimi leke dikɛnda efula ndo haleye woho wa nɔmbɔla. Ɔnkɔnɛ, ombisha lomba kele nɔmbɔlake wodja ayɛ lo mboka k’ɔlɔlɔ.’

Jehowa akangɛnangɛna dia kɛnɛ kakayange Sɔlɔmɔna. Nde akawotɛ ate: ‘Nɛ dia wɛ amboyanga lomba aha lɔsɛnɔ l’otale kana ɔngɔnyi, dimi layokosha lomba efula ndeka anto tshɛ wa l’andja. Dimi layokosha ndo kɛnɛ kahayalɔmbi, ɔngɔnyi la lokumu.’

Kem’edja l’ɔkɔngɔ w’akambo asɔ, amato ahende wakaye le Sɔlɔmɔna la dikambo dimɔtshi dia wolo efula. Ɔmɔtshi akate ate: ‘Dimi la omoto ɔnɛ mbidjasɛka lo luudu ɔtɔi. Dimi lakote ɔna pami, ko l’ɔkɔngɔ a nshi hiende, nde lawɔ akôte ɔna pami. L’otsho ɔmɔtshi ɔnande akavu. Koko etena kakimi lo djɔ, nde akayokitsha odo w’ɔnande la suke lami ko nde mbɔsa ɔnami. Lam’akamemɔ mende ko odo w’ɔna, ko dimi mboshishima ko kondjala ɔnami.’

Ko omoto okina akate ate: ‘Kashi! Ɔna lele la lumu mbele lami, ɔnɛ lambovɔ mbele lande!’ Omoto la ntondo akakadimola ate: ‘Kashi! Ɔna lambovɔ mbele layɛ, ɔnɛ lele la lumu mbele lami!’ Amato akɔ wakawanaka ngasɔ oto. Sɔlɔmɔna akandasale na?

Nde akayange yɔ̂mbɔ, lam’akawawelayɔ, nde akate ate: ‘Nyohembole ɔna lele la lumu l’ahende kele nyowasha ɔnɛ etenyi, ɔnɛ etenyi.’

Ombutshi wa mɛtɛ akade koko ate: ‘Kema! Lambokɔsɛngasɛnga, todiakake ɔna. Nyowoshande!’ Koko omoto okina ɔnɛ akate ate: ‘Tanyoshake ndoko onto l’atei aso ɔna, nyôhembole l’ahende.’

L’ɔkɔngɔ diko Sɔlɔmɔna akate ate: ‘Todiakake ɔna! Nyowosha omoto la ntondo. Nde kele mɛtɛ nyango.’ Sɔlɔmɔna akeyaka ngasɔ nɛ dia nyango ɔna nangaka ɔnande efula, nde akalangaka vɔ mbowosha omoto okina lo dihole dia nde mɛna wawodiaka. Lam’akoke anto sambo ka Sɔlɔmɔna kɛsɔ, vɔ wakangɛnangɛna dia kondja nkumekanga ka lomba ka ngasɔ lâdiko diawɔ.

Lo edja tshɛ kakôlɛka Sɔlɔmɔna, Nzambi akatshɔkɔla anto lo mbisha kɛtɛ ɛtɛtɔ ka diangɔ ngɔna; nɔnɔ, elowa ndo mbo ya ndɛ kina. Anto wakalɔtaka ahɔndɔ w’amɛna ndo wakadjasɛka lo mvudu y’amɛna. Anto tshɛ waki ɛngɔnyi.

1 Khumi ya Dikanga 3:​3-28; 4:​29-34.