ƆKƆNDƆ 64
Sɔlɔmɔna amboka tɛmpɛlɔ
LA NTONDO ka Davidi mvɔ, nde akatɛnyisha Sɔlɔmɔna woho wakandahombe mbika tɛmpɛlɔ kaki Jehowa. L’ɔnɔnyi wa nɛi wa diolelo diande, Sɔlɔmɔna akatatɛ mbika tɛmpɛlɔ kakayoshilaka l’ɔkɔngɔ w’ɛnɔnyi esambele l’etenyi. Anto nunu akumi mbakakambaka olimu wa tɛmpɛlɔ kɛsɔ ndo akuta efula wakatombe lo wokelo ɔsɔ. Tshɛ kɛsɔ nɛ dia wakakambe olimu la fɛsa ndo la paunyi.
Tɛmpɛlɔ kakakahanyema lo mvudu hiende ya weke oko waki lo tabɛrnakɛlɛ. Koko mvudu yakɔ yakaleke ya lo tabɛrnakɛlɛ weke mbala hiende. Sɔlɔmɔna akadje ɔshɛtɛ wa sheke lo luudu laki ka koma ya tɛmpɛlɔ, ko diangɔ dikina diakongaka lo tabɛrnakɛlɛ wakadidje lo luudu lokina.
Etena kakashile tɛmpɛlɔ, difɛstɔ dia woke diakasalema. Sɔlɔmɔna akake adwe la ntondo ka tɛmpɛlɔ ndo akalɔmbɛ oko wɛnayɛ l’osato. Nde akatɛ Jehowa ate: ‘Elongo vɔamɛmɛ ndo elongo w’elongo hawokoke le yɛ, kete hoke tɛmpɛlɔ kɛnɛ. Koko Nzambi kami lee, oke ɔsɛngɔsɛngɔ w’anto ayɛ lam’ayowɔlɔmbaka lo dihole nɛ.’
Etena kakashidiya Sɔlɔmɔna dɔmbɛlɔ diande, dja yakaholɔ oma l’olongo. Yɔ yakatshumbe nyama yakawalambola. Tɛmpɛlɔ kakalole l’osase wa mamba w’oma le Jehowa. Dikambo sɔ diakɛnya ɔnɛ Jehowa akalongaka ndo aketawɔ tɛmpɛlɔ la dɔmbɛlɔ dia Sɔlɔmɔna. Tɛmpɛlɔ mbakayoyala dihole diakayaka anto la ndjɔtɛmɔla koko aha tabɛrnakɛlɛ nto.
Sɔlɔmɔna akôlɛ la lomba edja efula ndo anto waki l’ɔngɛnɔngɛnɔ. Koko Sɔlɔmɔna akayotshukaka amato efula w’ase wedja waki kɔtɛmɔlaka Jehowa. Wɛ hɛnyi ɔmɔtshi atɛmɔla lohingo lande lanɛ? Ko l’ɔkɔngɔ diko Sɔlɔmɔna akayoyelaka wadiɛnde l’ɔtɛmwɛlɔ wa tozambizambi tawɔ. Onde wɛ mbeyaka kɛnɛ kakayokomɛka Sɔlɔmɔna lam’akandasale dikambo sɔ? Nde akatatɛ pɛnyɔla anto. Nde akayongaka l’esehe ndo anto kondjâla l’ɔngɛnɔngɛnɔ nto.
Dikambo sɔ diakotsha Jehowa kɛlɛ efula otsha le Sɔlɔmɔna ko nde akawotɛ ate: ‘Layanga kɔkɔsɔla diolelo kele mbisha onto okina. Hatosala dikambo sɔ etena kekeyɛ la lumu, koko l’etena kayôlɛ ɔnayɛ. Koko hatowɔkɔsɔla anto tshɛ wa lo diolelo.’ Tênde woho wakasalema dikambo sɔ.
1 Ekondo 28:9-21; 29:1-9; 1 Khumi ya Dikanga 5:1-18; 2 Ekondo 6:12-42; 7:1-5; 1 Khumi ya Dikanga 11:9-13.