ƆKƆNDƆ 71

Nzambi ambolaka Paradiso

OSATO wa paradiso kakɛnya Nzambi omvutshi ande Isaya vɔnɛ. Yema tshenyi l’ɔkɔngɔ a nyɔi ka Jɔna mbakayotɔka Isaya.

Paradiso kɛdikɛdi “ekambɔ” kana “parkɛ.” Onde na tɔ hakohola ndoko dikambo dimɔtshi diakatɛnyi lo dibuku nɛ? Kema tɔ fɔnaka l’ekambɔ ka dimɛna kakalɔngɔsɔlɛ Jehowa Nzambi Adama la Eva? Onde kɛtɛ k’otondo kayoyala paradiso lushi lɔmɔtshi ondo?

Jehowa akatɛ omvutshi ande Isaya dia nde funda kɛnɛ k’endana la paradiso k’oyoyo k’anto wa Nzambi. Nde akate ate: ‘Laondu ayodjasɛ kâmɛ la ɔn’ɔkɔkɔ lo wɔladi. Ɔsɔngɔ wa ngɔmbɛ la tambwɛ wayɔlɛ dihole diâmɛ ndo kiɛndakiɛnda ayowalɔmbɔla. Kânga ɔna lakalɔmɛ ayɔkɛnya lasuke la osho w’olui a lɔlɛngɔ, nde hokala wâle.’

Anto efula mbeyaka mbuta vate: ‘Dikambo sɔ hasalemaki pondjo. Pâ keto mbokongaka la kɛtɛ nshi tshɛ ndo, ndoko otshikitanelo wayonga.’ Koko ohokana lo dikambo nɛ: Woho akɔna w’edjaselo kakasha Nzambi Adama la Eva na?

Nzambi akadje Adama la Eva lo paradiso. Nɛ dia wakahindola dui dia Nzambi, diɔ diakɔ diakawashisha edjaselo kawɔ ka dimɛna efula, wakatatɛ tshunda esombe ndo wakavu. Nzambi ambolaka dia nde ayosha anto walangande diangɔ tshɛ diakashisha Adama la Eva.

Lo paradiso k’oyoyo kayaye ndoko ɛngɔ ka kɔlɔ kana wâle wayoyala. Wɔladi wa kokele wayoyala. Anto tshɛ wayonga l’alemba a wolo ndo l’ɔngɛnɔngɛnɔ. Ayoyala paka oko akalange Nzambi oma l’etatelo. Koko tayeya l’ɔkɔngɔ woho akɔna wayokotsha Nzambi dikambo sɔ.

Isaya 11:​6-9; Enyelo 21:​3, 4.