ƆKƆNDƆ 75
Akɛnda w’apami anɛi la Babilɔna
NKUMEKANGA Nebukadineza akatshu l’Ase Isariyɛlɛ tshɛ wakaleke mbeya mukanda otsha la Babilɔna. Nkumekanga akatɔsɔnaka oma l’atei awɔ akɛnda w’apami wakaleke amɛna ndo timba. Anɛi a l’atei awɔ ango wɛnayɛ lanɛ. Ɔmɔtshi lokombo lande Danyɛlɛ, akina asato Ase Babilɔna wakawaelɛka vate: Shadarakɛ, Meshakɛ la Abɛdɛ-Nengo.
Nebukadineza akalange ndowanya ɛlɔngɔlɔngɔ ɛnɛ l’olimu wa lo luudu lande. L’ɔkɔngɔ w’ɛnɔnyi esato w’olowanyelo, nde ayoyɔsɔna paka wanɛ wayoleka timba dia vɔ mbokimanyiyaka lo pembola akambo. Nkumekanga akalangaka dia akɛnda akɔ ndjâla l’alemba a wolo lam’ayowolowanyemaka. Omalɔkɔ, nde akatɛ ekambi ande dia vɔ mbashaka weoho wa diangɔ di’ɛlɔlɔ tshɛ diakandalɛka nde la nkumbo kande.
Ohenda ɔlɔngɔlɔngɔ Danyɛlɛ. Wɛ mbeyaka kɛnɛ katɛnde Ashepenaza, owandji w’ekambi wa Nebukadineza? Danyɛlɛ ekɔ lo mbotɛ dia nde halange ndɛ diangɔ di’ɛlɔlɔ di’oma lo mɛsa wa nkumekanga. Koko Ashepenaza akanyange. Nde akate ate: ‘Nkumekanga akatome dui dia nyu ndɛ ndo nɔ. Naka nyu hanyɛnami l’alemba a wolo oko ɛlɔngɔlɔngɔ ekina, kete nde ayondjaka.’
Ko Danyɛlɛ akatshu le olami wakawadjɛ Ashepenaza nde l’angɛnyi ande asato. Nde akawotɛ ate: ‘Lam’alangɛ otohembe nshi dikumi. Otoshake paka akatshikatshi ato la ashi wa nɔ. Koyotɛdike l’ɛlɔngɔlɔngɔ ekina wanɛ walɛ diangɔ dia nkumekanga, kele kênde wa na wayoleka mɛnama l’alemba w’amɛna.’
Olami aketawɔ dia sala ɔsɔku. Lam’akakoke nshi dikumi, Danyɛlɛ l’angɛnyi ande asato wakɛnama l’alemba w’amɛna efula oleki ɛlɔngɔlɔngɔ ekina tshɛ. Ɔnkɔnɛ, olami akâtshike dia vɔ tetemala la ndɛ akatshikatshi lo dihole dia kɛnɛ kakalɛka nkumekanga.
Lo komelo k’ɛnɔnyi esato, ɛlɔngɔlɔngɔ akɔ tshɛ wakatɔlama la ntondo ka Nebukadineza. L’ɔkɔngɔ a nde tɛkɛta lawɔ vɔ tshɛ, nkumekanga akɛnyi dia Danyɛlɛ l’angɛnyi ande asato mbakaleke timba. Ɔnkɔnɛ nde akâlame dia vɔ mbokimanyiyaka l’olimu ande. Ko lam’akambolaka nkumekanga Danyɛlɛ, Shadarakɛ, Meshakɛ la Abɛdɛ-Nengo wembola kana mbasha akambo woleki wolo, vɔ wakeyaka ndeka ɛlɔmbɛdi l’akanga a tomba mbala dikumi.