ƆKƆNDƆ 80

Anto wa Nzambi wambotomba oma lo Babilɔna

AKETE suke l’ɛnɔnyi ehende tamba lam’akɔsama Babilɔna l’anya w’Ase Mediya l’Ase Pɛrɛsiya. Ko ohenda kɛnɛ kambotomba kakianɛ! Eelo, Ase Isariyɛlɛ wotatombe oma lo Babilɔna. Woho akɔna wokondjishawɔ lotshungɔ na? Onto akɔna owakimwe dia vɔ ntshɔ na?

Toko Kuro, nkumekanga ka Pɛrɛsiya mbakâkimɔ. Edja la ntondo ka Kuro mbotɔ, Jehowa akatɛ omvutshi ande Isaya dia nde funda dikambo diande ate: ‘Wɛ ayosala paka kɛnɛ kalangami wɛ sala. Kuke yayotshikala hwe dia wɛ mbɔsa osomba.’ Kuro akalɛmbia Babilɔna. Ase Mediya l’Ase Pɛrɛsiya wakɔtɔ l’osomba l’otsho, l’asoko wakatshikala hwe.

Koko Isaya, omvutshi wa Jehowa akate nto dia Kuro ayoyotoma dui dia nyomoka Jerusalɛma la tɛmpɛlɔ kayɔ nto. Onde Kuro akatome dui sɔ oka? Eelo. Kuro akatɛ Ase Isariyɛlɛ awui anɛ: ‘Nyutshu kakianɛ la Jerusalɛma, nyotoke tɛmpɛlɔ ka Jehowa, Nzambi kanyu.’ Diɔ ndo diatatshu Ase Isariyɛlɛ ango dia tosala dikambo diakɔ.

Koko aha Ase Isariyɛlɛ tshɛ waki la Babilɔna mbakakoke sala lɔkɛndɔ l’otale dia kalola oya la Jerusalɛma. Aki lɔkɛndɔ l’otale efula (kilɔmɛtɛlɛ 800), ko efula l’atei awɔ waki esombe ndo akina la wa hemɔ, vɔ kokoka kɛndakɛnda etale ngasɔ. Akina wakatshikala l’ɔtɛ w’akambo akina. Kuro akatɛ wanɛ wakatshikala ate: ‘Nyosha wanɛ watatshu otsha la Jerusalɛma dia toka tɛmpɛlɔ, fɛsa la paunyi ndo weshasha ekina.’

Ɔnkɔnɛ, vɔ wakasha Ase Isariyɛlɛ wakatatshɔka otsha la Jerusalɛma weshasha efula. Kuro akawasha ndo alɔnga la akɔhɔ wakɔshi Nkumekanga Nebukadineza oma lo tɛmpɛlɔ ka Jehowa lam’akandalanya Jerusalɛma. Anto waki la diangɔ efula dia mɛmba.

L’ɔkɔngɔ wa ngɔndɔ oko nyɛi ya lɔkɛndɔ, Ase Isariyɛlɛ wakakalola la Jerusalɛma lo etena kakatama. Aki ɛnɔnyi 70 kokele tamba lam’akalanyema osomba, ndo lam’akatshikala wodja tɔngɔ to. Koko, kânga mbakakalola Ase Isariyɛlɛ lo wodja awɔ, vɔ wakahombe ndjâla l’ekakatanu efula tena dimɔtshi oko ayotɛna l’ɔkɔngɔ.

Isaya 44:28; 45:​1-4; Ezera 1:​1-11.