ƆKƆNDƆ 81
Wambɛkama lo ekimanyielo ka Nzambi
NUNU efula di’anto wakasale lɔkɛndɔ l’otale oma la Babilɔna otsha la Jerusalɛma. Koko lam’akawakome, Jerusalɛma yaki mɛtɛ vua. Ndoko onto lakadjasɛka lɔkɔ. Ase Isariyɛlɛ wakahombe nɔngɔsɔla oseka ɛngɔ tshɛ nto.
Dikambo dimɔtshi diakawasale ntondo aki dia mbika ediakelo ka Jehowa. Ɔsɔ ekɔ dihole diatowolambolaka nyama kana weshasha le Jehowa. Yema ya ngɔndɔ tshitshɛ l’ɔkɔngɔ, Ase Isariyɛlɛ wakatatɛ mbika tɛmpɛlɔ. Koko atunyi awɔ wakadjasɛka lo wedja waki suke lawɔ konangaka vɔ mbika tɛmpɛlɔ. Vɔ wakahembaka mbaotsha wɔma dia vɔ tshika mbika. L’ɔkɔngɔ diko, atunyi akɔ wakakondja nkumekanga ka Pɛrɛsiya k’oyoyo, nde akayodjaka ɔlɛmbɛ dia tshika olimu wa wokelo.
Ɛnɔnyi wakete efula. Kakianɛ aya ɛnɔnyi 17 tamba lam’akaye Ase Isariyɛlɛ oma la Babilɔna. Ko Jehowa akatome Hangai la Zekariya, amvutshi ande dia ndjotɛ anto dia vɔ tatɛ mbika nto. Anto wakɛkama l’ekimanyielo ka Nzambi, ndo waketawɔ awui w’amvutshi. Vɔ wakatatɛ mbika nto kânga mbakadjama ɔlɛmbɛ ɔnɛ: aha vɔ mbika.
Ɔnkɔnɛ, ɔndɛlɛ ɔmɔtshi w’Ose Pɛrɛsiya lakawelɛka Tatenai akaye dia ndjombola Ase Isariyɛlɛ oma lɛnɛ akawakondja dikimɔ dia mbika tɛmpɛlɔ. Ase Isariyɛlɛ wakawotɛ ɔnɛ lam’akiwɔ la Babilɔna mbakawatɛ Nkumekanga Kuro ate: ‘Nyutshu la Jerusalɛma nyotoke tɛmpɛlɔ ka Jehowa Nzambi kanyu.’
Tatenai akatome mukanda la Babilɔna dia mumbola kana mɛtɛ Kuro, lakashile la mvɔ, akatatshi ngasɔ. Kem’edja mukanda wakaye oma le nkumekanga ka Pɛrɛsiya k’oyoyo. Lɔkɔ, nde akate dia mɛtɛ Kuro akatatshi ɔsɔku. Ko nkumekanga akafunde ate: ‘Nyotshike Ase Isariyɛlɛ wake tɛmpɛlɔ ka Nzambi kawɔ. Ndo lambonyodjangɛ dia nyu mbakimanyiya.’ L’ɔkɔngɔ w’ɛnɔnyi oko ɛnɛi tɛmpɛlɔ akashile, ko Ase Isariyɛlɛ wakangɛnangɛna heyama.
Ɛnɔnyi efula wakete. Kakianɛ aya suke l’ɛnɔnyi 48 tamba lam’akashile mbikama tɛmpɛlɔ. Ase Jerusalɛma waki akanga a weola wa mamba, ɔnkɔnɛ osomba ndo tɛmpɛlɔ ka Nzambi kondjala dimɛna efula. Ɛzɛra, Ose Isariyɛlɛ ɔmɔtshi laki la Babilɔna, akoke dia tɛmpɛlɔ ka Nzambi kakahombe nɔngɔsɔma. Ɔnkɔnɛ, wɛ mbeyaka kɛnɛ kakandasale oka?
Ɛzɛra akatshu dia tɛnana la Aratashasta, nkumekanga ka Pɛrɛsiya, ko nkumekanga k’ɔlɔlɔ kɛsɔ akasha Ɛzɛra weshasha efula dia nde mbela la Jerusalɛma. Ɛzɛra akasɛngɔla Ase Isariyɛlɛ waki la Babilɔna dia vɔ mbokimanyiya la mɛmba weshasha otsha la Jerusalɛma. Anto oko 6 000 waketawɔ dia ntshɔ. Vɔ waki la fɛsa efula ndo paunyi la diangɔ di’oshinga wolo diakawɛmbɛ.
Ɛzɛra aki la lonyangu nɛ dia anto wa kɔlɔ waki lo mboka k’otondo. Anto asɔ wakakoke mbakɔsɔla fɛsa la paunyi ndo mbadiaka. Omalɔkɔ, Ɛzɛra akelɛ anto tshɛ dihole ɔtɔi, oko wɛnayɛ l’osato. Ko vɔ wakalɔmbɛ Jehowa dia nde mbâlama lo lɔkɛndɔ lawɔ l’otondo otsha la Jerusalɛma.
Jehowa akâlame. L’ɔkɔngɔ wa ngɔndɔ nyɛi ya lɔkɛndɔ, vɔ wakakome ki la Jerusalɛma. Kema dikambo sɔ mɛnyaka ɔnɛ Jehowa namaka wanɛ wɛkama l’ekimanyielo kande?