ƆKƆNDƆ 89
Yeso ambɛdia tɛmpɛlɔ
MƐTƐ Yeso ekɔ la kɛlɛ lanɛ, shi mɛtɛ? Onde wɛ mbeyaka lande na komalande oka? Nɛ dia anto ango wele lo tɛmpɛlɔ ka Nzambi ka la Jerusalɛma wekɔ la lohehe l’efula. Vɔ nangaka kondja falanga efula oma le anto waya lanɛ dia ndjɔtɛmɔla Nzambi.
Onde wɛ ekɔ lo mɛna ɛsɔngɔ a ngɔmbɛ engo, ndo ɛkɔkɔ la tukudumba? Anto ango wekɔ lo sondja nyama ndjo l’etei ka tɛmpɛlɔ. Onde wɛ mbeyaka lande na? Nɛ dia Ase Isariyɛlɛ waki l’ohomba wa nyama la tofudu dia nambolaka Nzambi olambo.
Ɛlɛmbɛ wa Nzambi wakataka dia naka Ose Isariyɛlɛ ɔmɔtshi ambosala kɔlɔ, nde pombaka nambola Nzambi olambo. Ase Isariyɛlɛ wakahombaka nambola elambo ekina. Ko lende akakokaka Ose Isariyɛlɛ kondja tofudu la nyama ya nambola Nzambi na?
Ase Isariyɛlɛ amɔtshi waki la tofudu la nyama yawɔ vɔamɛ. Vɔ wakakokaka ndjilambola. Koko Ase Isariyɛlɛ efula kondjala la tofudu kana nyama yawɔ hita. Ndo akina wakadjasɛka mangana etale la Jerusalɛma kokokaka mbela nyama yawɔ mɔtshi oya lo tɛmpɛlɔ. Omalɔkɔ, vɔ wakayaka lanɛ ko wakasombaka nyama kana tofudu taki lawɔ ohomba. Koko anto ango wakawadjɛka oshinga wolo efula. Vɔ waki lo mbiva anto falanga yawɔ. Ndo nto, takawakokaka sondja diangɔ sɔ l’etei ka tɛmpɛlɔ ka Nzambi.
Diɔ diakɔ diakoke Yeso kɛlɛ. Nde akasokola mɛsa w’anto akɔ ndo akahandjola falanga yawɔ. Ndo nto, nde akasale lofimbɔ la lɔkɔdi ko akatondja nyama tshɛ oma lo tɛmpɛlɔ. Nde akatɛ wanɛ wakasondjaka tukudumba ate: ‘Nyotombe latɔ l’andja! Tanyetɛke luudu la Papa dihole dia salaka okanda.’
Ambeki amɔtshi wa Yeso waki kâmɛ lande lanɛ lo tɛmpɛlɔ ka la Jerusalɛma. Vɔ wakambe heyama lam’akawɛnyi kɛnɛ kakasalaka Yeso. Lâsɔ mbakawôhɔ kɛnɛ katɛkɛta Bible lo dikambo di’Ɔna Nzambi ɔnɛ: ‘Ngandji ka luudu la Nzambi kayɔhɛta le nde oko dja.’
Etena kaki Yeso lanɛ la Jerusalɛma akongɛ Pasaka, nde akasale ahindo efula. L’ɔkɔngɔ w’akambo asɔ, Yeso akamɔ oma la Judeya ko akakimɛ lɔkɛndɔ otsha la Ngalileya. Koko, nde akatenyanya lɛtshi la kɛtɛ la Samariya. Tênde kɛnɛ kakatôkomɛ lɛkɔ.