ƆKƆNDƆ 90
Yeso nde la omoto l’ose Samariya
YESO akemala dia mumuya l’omamu w’ɛtɛkɔ ka la Samariya. Ambeki ande wakatshu otsha l’osomba dia tosomba diangɔ dia ndɛ. Omoto ongo latɛkɛta la Yeso akaye dia ndjoduwola ashi. Yeso akawotɛ ate: ‘Ombisha yema y’ashi nnɔ.’
Dikambo sɔ diakâmbia omoto akɔ efula. Onde wɛ mbeyaka lande na? Nɛ dia Yeso aki Ose Juda, ko omoto akɔ aki Ose Samariya. Ase Juda efula kombokanaka l’Ase Samariya. Vɔ konangaka tɛkɛta lawɔ kânga yema tshitshɛ! Koko Yeso akokaka anto wa weoho tshɛ ngandji. Diɔ diakɔ diakandawotɛ ate: ‘Otoyeyaka ɔnɛ lakɔlɔmba ashi a nnɔ, tshike wɛ kotɔ̂lɔmba ko nde otokosha ashi wa lɔsɛnɔ.’
Omoto akɔ akate ate: ‘Nkumadiɔndjɔ, ɛtɛkɔ kekɔ ɔhɔngɔ ndo wɛ kema la kati ka duwola ashi. Oma lende ayoyɔsa ashi asɔ wa lɔsɛnɔ na?’
Yeso akôlembetshiya ate: ‘Naka wɛ nnɔ ashi w’oma l’ɛtɛkɔ kɛnɛ, wɛ ayoka mposa nto. Koko onto lanɔ ashi wayomowosha ayɔsɛna pondjo pondjo.’
Omoto akɔ akawotɛ ate: ‘Nkumadiɔndjɔ, ombisha ashi akɔ asɔ! Kele aha dimi mboka mposa nto. Nto hatoyala l’ohomba wa ndjâka dia ndjoduwola ashi lanɛ nto.’
Omoto akɔ akakanaka ate Yeso ekɔ lo tɛkɛta dikambo di’ashi k’ashi. Tete le nde aki lo tɛkɛta dikambo dia mɛtɛ k’endana la Nzambi ndo la diolelo diande. Mɛtɛ kɛsɔ kekɔ oko ashi wa lɔsɛnɔ. Ashi akɔ kokaka mbisha onto lɔsɛnɔ la pondjo.
Yeso akayotɛka omoto akɔ ate: ‘Ntshɔka kele tôye l’omɛyɛ.’
Nde akakadimola ate: ‘Dimi kema l’omi.’
Yeso akawotɛ ate: ‘Kam’otshiyɛ asɔ mbediɔ. Wɛ aki la waomi atanu, ko pami kodjashi layɛ kakianɛ kema omɛyɛ.’
Omoto akâmbe heyama, nɛ dia akambo asɔ tshɛ waki mɛtɛ. Woho akɔna wakeyaka Yeso akambo asɔ na? Eelo, nɛ dia nde aki Otomami waki Nzambi; ɔnkɔnɛ, Nzambi akawosholɛ akambo asɔ. L’etena kɛsɔ, ambeki wa Yeso wakakalola, ko vɔ wakâmbe dia mɛna Yeso asawola la omoto l’Ose Samariya.
Wetshelo akɔna wakondjaso oma l’akambo asɔ tshɛ na? Akambo asɔ mɛnyaka dia Yeso mbokaka anto a weoho a koho tshɛ ngandji. Ndo sho lawɔ pombaka sala ɔsɔku. Hatohombe kanyiya ɔnɛ anto amɔtshi wekɔ kɔlɔ nɛ dia vɔ wekɔ la woho ɔmɔtshi a lokoho. Yeso akalangaka di’anto tshɛ mbeya mɛtɛ katɔla otsha lo lɔsɛnɔ la pondjo. Ndo sho lawɔ pombaka nanga dia kimanyiya anto dia vɔ mbeya mɛtɛ kakɔ.