Tshapita 19

Yeso ambetsha omoto l’ose Samariya

DIA vɔ ntshɔ oma la Judeya otsha la Ngalileya, Yeso nde l’ambeki ande wambotenyanya lɛtshi la nkɛtɛ la Samariya. Oya lo midi, vɔ wambɔlɛmba efula lo lɔkɛndɔ lawɔ, ko wambemala l’ɛtɛkɔ kɛmɔtshi kele suke l’osomba wa Sukara dia vɔ mumuya yema. Jakɔbɔ mbakatshime ɛtɛkɔ kakɔ kɛsɔ ambeta deko ko deko, ndo tɔ kekɔ polo ndo ɛlɔ kɛnɛ suke l’osomba wa nshi nyɛ wa Naplouse.

Yeso ekɔ lo mumuya lo dihole sɔ, koko ambeki ande wambotshɔ l’osomba dia tosomba mbo ya ndɛ. Omoto ɔmɔtshi l’Ose Samariya amboya dia ndjotahola ashi, ko Yeso nde lande ate: “Umbisha ashi wa no.”

Ase Juda l’Ase Samariya hawokana l’ɔtɛ wa tokanyi ta kɔlɔ takonɛma l’etema awɔ. Ɔnkɔnɛ, omoto ongo ambamba efula ko ambowombola ate: “We usi Juda, ukundi anombaye ashi, dimi umuntu usi Samariya na?”

Yeso mbôkadimolande ate: “Utuyeya  . . . one lak[o]lomba ashi a no, we utôlomba, tshiki ndi utukusha ashi a lumu.”

Ko omoto nde lande ate: “Khumadiondjo, we kema la engo ka ndjuwula ashi, ndu eteko keko ohongo, ku uma lendi eye la ashi a lumu? We ndeka tshesu Jakoba lakatusha eteko, kakandanokaka ndame ndu an’andi, ndu dungalunga diandi uka?”

Yeso ɔnɛ awolembetshiyande ate: “Untu tshe layono ashi ane, ayuka pusa ntu. Keli untu tshe layono ashi wayumuwusha, huki pusa pundju. Keli ashi wayumuwusha, wayuyala l’utema andi uku eteko k’ashi, [katɔla] utsha lu lumu la pundju.”

Omoto mbawotɛnde ate: “Khumadiondjo, umbisha ashi aso, mbahamuka pusa, ndu mbahamuyakaka etali lindu dia ndjuduwula.”

Ko Yeso nde lande l’etena kɛsɔ ate: “Utshu, uteli umeye, kuyi lindu.”

Ko omoto ambôkadimola ate: “Dimi kema la umi.”

Yeso amboshikikɛ di’ɛtɛkɛta ande wekɔ mɛtɛ. Nde ambowotɛ ate: “We ambuta mete, wati: Dimi kema la umi. Ne dia we aki la waumi atanu, one lele laye kakiane, kema umeye.”

Omoto ambamba heyama ko ambowotɛ ate: “Khumadiondjo, dimi lambeya nti: Umvutshi mbeye.” Nde akɛnya mposa kande k’akambo wa lo nyuma lam’akandate ate: Ase Samariya “wakatemolaka l’ukungu one [wa Ngarizimɛ waki suke la dihole diakɔ], ku nyu mvutaka nyati: La Jerusalema keli dihuli diahumba antu ntemola.”

Ko Yeso ambowɛnya ɔnɛ aha dihole di’ɔtɛmwɛlɔ mbele ohomba. Nde lande ate: “Etena kambukuka, keko kakiane, atemodi wa mete wayotemola Papa lu [n]yuma la lu mete, ne dia antu wa wuhu oso mbalanga Papa ndjala atemodi andi. [Nzambi, NW] eko Nyuma. Wane watôtemolaka, dieli la wo dia mbôtemola lu [n]yuma la lu mete.”

Omoto akɔ ambamba heyama. Mbawotɛnde ate: “Dimi mbeyaka nti: Mesiya lundjayi (letawo vati Kristu). Lam’ayunduya, ndi ayututela akambu tshe.”

Yeso mbawotɛnde ate: “Dimi ako one, lateketa la ye.” Ohokanyiya dikambo sɔ! Omoto ɔsɔ lakaye la midi dia ndjotahola ashi, ondo di’aha nde ndjohomana la amato akina wa l’osomba, wanɛ wawɔnyɔla l’ɔtɛ w’etsha ande, akayokondja nɛmɔ di’efula oma le Yeso. Nde akawotɛ kɛnɛ kakinde atatɛka ndoko onto. Etombelo akɔna wayanga monga na?

Ase Samariya efula wambetawɔ

Wakalolake oma la Sukara la mbo ya ndɛ, ambeki watanake ko Yeso asawola la omoto l’Ose Samariya, suke l’ɛtɛkɔ ka Jakɔbɔ, lɛnɛ akawatawutshiki. Kam’okumi ambeki ande, omoto ambotshika mbaka kande k’ashi ko ambotshɔ otsha l’osomba.

Awui wowote Yeso wambɔ̂ngɛnyangɛnya efula ko nde ambototɛ anto wa l’osomba ate: “Nyunyi, nyuyendi untu lambumvutela akambu tshe wakamatshaka.” Ko dia nde memula saki kawɔ, ɔnɛ awambolande ate: “Aha Kristu oso?” Dimbola diande diambokoma l’oyango adiɔ—anto akɔ wambotshɔ dia tɛ̂na dikambo diakɔ vamɛ.

L’etena kasalema akambo asɔ, ambeki wekɔ lo tshutshuya Yeso dia nde ndɛ diangɔ diotowosomba l’osomba. Koko nde lawɔ ate: “Dimi leko la mbu ya nde, yahanyeyi.”

Ambeki woyambola lam’asawɔ vate: “Undi, untu kuwela mbu ya nde?” Yeso mbâlembetshiyande ate: “Ma diami, dieli ntsha lulangu la one lakantumi, la dia nshidiya ulimu andi. Nyu hanyututaka nyati: Ambutshikala ngondo nyei, ku dinela ndjala uka?” Koko, nde ambonyomowatɛ dikambo dia dinela dia lo nyuma ate: “Nyedia ashu anyu, nyendi dikambo diambela kasakasa, dia muna. One latunaka, atulungulaka difutu, atusanganyaka wuhu utsha lu lumu la pundu; dia one latuneka la one latunaka ngenangena kame.”

Ondo Yeso amboshila la mɛna etombelo wa mamba oma lo woho wakandahomanyi la omoto l’Ose Samariya—nɛ dia anto efula wamboyala la mbetawɔ le nde oma l’ɛtɛkɛta wa omoto akɔ. Omoto akɔ ambototɛ anto wa l’osomba ate: “Ndi ambumvutela akambu tshe wakamatshaka.” Ɔnkɔnɛ, lam’amboya anto wa l’osomba wa Sukara oya le Yeso suke la ɛtɛkɔ, vɔ wambɔ̂lɔmba dia nde ntshikala lakawɔ dia mbalembetshiya akambo efula. Yeso ambetawɔ leeta lawɔ ko ambotshikala lɛkɔ nshi hiende.

Lo yɛdikɔ yahokamɛ Ase Samariya awui wa Yeso, mbataleke ndo anto efula mbetawɔ. Ko vɔ la omoto vate: “Shu tambetawo kakiane, aha ne dia aui aye, keli ne dia shu shame tambuyaukela, ndu tambeya shati: Mete, ndi keli ushimbedi a wa la kete.” Mɛtɛ, omoto ɔsɔ l’Ose Samariya ambototshikɛ ɛnyɛlɔ k’ɔlɔlɔ efula lo woho wakokaso sambisha akambo wa Kristo lam’ayotemulaka posa k’ampokami dia vɔ nyanga woho wa nyomoleka mbeya akambo efula!

Tôhɔ di’akambo asɔ wekɔ lo salema ngɔndɔ nyɛi la ntondo ka dinela—mɛtɛ ekɔ dinela di’eponga, diasalema la Palɛstinɛ l’eleko kamɔnga akatshi. Lâsɔ ondo akambo anɛ wekɔ lo salema lo Tshaka Fudu kana lo Diɛla Woke. Kɛsɔ nembetshiyaka ɔnɛ: l’ɔkɔngɔ wa difɛstɔ di’Elekanelo dia l’ɔnɔnyi 30 T.D., Yeso nde l’ambeki ande wakatshikala oko ngɔndɔ enanɛi la Judeya, dia vɔ mbetsha anto ndo mbabatiza. Kakianɛ, vɔ wotakalola otsha lawakawɔ, la Ngalileya. Kakɔna kâkonga lɛkɔ na? Joani 4:3-43.

▪ Lande na kambamba omoto l’Ose Samariya l’ɔtɛ w’ɔnɛ Yeso ambɔtɛkɛta la nde?

▪ Yeso amondowetsha lo dikambo di’ashi a lɔsɛnɔ la dihole diahomba anto tɛmɔla?

▪ Woho akɔna wamboyashola Yeso le nde, ndo lande na kele dikambo sɔ mambiaka anto efula?

▪ Awui akɔna wambotosanya omoto l’Ose Samariya ndo etombelo akɔna wamboyala?

▪ Diɔtɔnɛlɔ diakɔna diele lam’asa mma dia Yeso la dinela?

▪ Woho akɔna wakokaso shikikɛ edja kakasale Yeso olimu ande la Judeya l’ɔkɔngɔ wa difɛstɔ di’Elekanelo dia l’ɔnɔnyi 30 T.D.?