ƆKƆNDƆ 100

Yeso l’ekambɔ

L’ƆKƆNGƆ wa vɔ tomba oma lo luudu la la diko, Yeso nde l’apɔstɔlɔ ande wakatshu otsha l’ekambɔ ka Ngɛtɛsɛmanɛ. Vɔ wakatshɔka lɛkɔ mbala efula. Yeso akawatɛ di’aha vɔ ndala djɔ ndo dia vɔ nɔmbaka. Oma lâsɔ, nde akangana yema, akayakɔsha ekukumadi lo kɛtɛ ko akatatɛ la nɔmba.

L’ɔkɔngɔ diko, Yeso akakalola oya lɛnɛ aki apɔstɔlɔ ande. Oko lo kanyi yayɛ, kakɔna kakawasalaka na? Vɔ waki lo djɔ! Yeso akawatɛ mbala shato di’aha vɔ ndala, koko mbala tshɛ kakandakalolaka nde akâtanaka lo djɔ. Yeso akawatɛ mbala ka komelo kakandakalola ate: ‘Okonde akokanyu ndala l’etena ka nganɛ na? Etena ka dimi mundama l’anya w’atunyi ami kambokoka.’

L’etena kakɔ kâmɛ, londjo la lemba la woke l’anto lakokɛma. Ohênda! Hɛnyi anto wayaye la tɔ̂mbɔ ndo l’ekalemba! Vɔ wekɔ lo ndjaye ndo l’ewa dia ndjâwangamulɛka osase. Lam’akawasukana suke suke, onto ɔmɔtshi akatombe oma l’olui w’anto ko akasembɔ tɔ otsha le Yeso. Nde akɔ̂nɔnɛ oko wɛnayɛ l’osato ɔnɛ. Pami kakɔ lokombo lande Judasɛ Isakariyɔtɛ! Lande na kanɔnande Yeso na?

Yeso akawombola ate: ‘Judasɛ, wɛ ambofunga oma l’ɔnɔnɛlɔ?’ Eelo, ɔnɔnɛlɔ ɔsɔ waki djembetelo mɔtshi. Ɔnɔnɛlɔ akɔ mbakakimanyiya anto wakaye la Judasɛ dia vɔ mbeya ɔnɛ Yeso nd’ɔnɛ, onto lakawayangaka. Ɔnkɔnɛ, atunyi wa Yeso wakasukana dia ndjowonda. Koko Petero kombatshika dia vɔ munda Yeso aha la vɔ talwɛ ta. Nde akasɔmɔla yɔ̂mbɔ yande ko akayikɔtɛ pami kaki suke lande. Yɔ̂mbɔ yakahandja ɔtɛ wa pami kakɔ ko yakatohembolaka tui diande dia l’omi. Koko Yeso akananda tui dia pami kakɔ ko akɔ̂kɔnɔladiɔ.

Yeso akatɛ Petero ate: ‘Kaloya yɔ̂mbɔ yayɛ lo dihole diayɔ. Onde wɛ hakanyiya dia dimi kokaka nɔmba Papa dia nde tomɛmi nunu di’andjelo dia ndjoshimbɛ?’ Eelo, nde akakoke mɛtɛ! Koko Yeso kɔnɔmba Nzambi dia nde mbotomɛ andjelo, nɛ dia nde akeyaka ɔnɛ: etena k’atunyi ande mbonda kambokoka. Diɔ diakɔ diakandâtshike dia vɔ ntshɔ lande. Tênde kɛnɛ kayanga tokomɛ Yeso kakianɛ.

Mateu 26:​36-56; Luka 22:​39-53; Joani 18:​1-12.