Tshapita 118

Wambofunga Yeso ndo wambowonda

ETENA kambɔtɔ Judasɛ l’ekambɔ ka Ngɛtɛsɛmanɛ, ayalɔmbɔla olui a woke w’asɔlayi, ɛlɔmbɛdi a weke, Afarisɛ, ndo anto akina, ko midi k’otsho ambolekana. Ɛlɔmbɛdi waketawe futa Judasɛ ekenga 30 wa fɛsa dia nde mbakimwela Yeso.

Yema la ntondo, lam’akawôtondja lo dambo di’Elekanelo, mɛtɛ Judasɛ akasembɔ tɔɔ le ɛlɔmbɛdi a weke. Aha la tshimbatshimba, ɛlɔmbɛdi ɛsɔ wakatshumanya apulushi awɔ kâmɛ l’olui w’asɔlayi. Ondo Judasɛ akatshwe la wɔ ntondo lɛnɛ ambosalaka Yeso Elekanelo nde l’apɔstɔlɔ ande. Lam’ɛnyiwɔ ɔnɛ vɔ wakamwe, olui ɔsɔ w’anto, wokime ewa, atala, la dihomɔ dia ta, wambotomba oma la Jerusalɛma ko wambotenyanya Okidi wa Kidirɔna, Judasɛ mbatâlɔmbɔla.

Judasɛ ambɔlɔmbɔla olui ɔsɔ w’anto otsha lo Dikona di’Ɔlivɛ, nɛ dia nde mbeyaka ɔnɛ: lɛkɔ mɛtɛ mbayotototana Yeso. Lomingu lakete, lam’akatatshɔkaka Yeso l’apɔstɔlɔ ande la Jerusalɛma ndo lam’akawayakalolaka oya la Bɛtaniya, vɔ wakemalaka mbala efula l’ekambɔ ka Ngɛtɛsɛmanɛ dia vɔ mumuya ndo dia sawola. Ko lam’ele Yeso ekɔ lo wodjima l’atei w’esongo w’ɔlivɛ, ngande wakoka asɔlayi mbêya? Ondo vɔ watawɛnaka ndoko lushi. Diɔ diakɔ diambowasha Judasɛ djembetelo mɔtshi, awatɛ ate: “Untu layononana la mi, keti nd’uku. Kanyuwundi, kanyutshu la ndi ololo.”

Judasɛ ambotshɔ la olui w’anto l’ekambɔ, ko lam’ɛnyinde Yeso l’apɔstɔlɔ ande, nde ambosembɔ tɔɔ otsha le nde. Nde ambowotɛ ate: “Moyo, Umbetsha!,” ko nde ambôkumbatɛ efula.

Yeso mbôkaloyande dui ate: ‘Ɔngɛnyi, oyeyɛ lendo?’ Ko ndamɛ ambokadimola lo dimbola diande, ata ate: ‘Judasɛ, mɛtɛ kengo kamboyoka Ɔna onto ɛlɔmɔ dia mbokaha?’ Koko ofungi ambokondja kɛnɛ kakandalangi! Yeso ambɔsɛmɛ otsha la ntondo lo osase w’ewa wa dja la atala ko ambombola anto ate: “Ayanganyu na?”

Ko amɔtshi wambôkadimola vate: “Jesu y’usi Nazareta.”

Mbawatɛnde ate: “Dim’one,” ko nde ambemala la dihonga la ntondo kawɔ vɔ tshɛ. Apami asɔ wambamba efula lo menda dihonga diande ndo hawoyeya kɛnɛ kâkongɛ, ko wambokalola ɛkɔngɔkɔngɔ, wambɔkɔ lo nkɛtɛ.

Yeso ambowatɛ nto la lotutsha tshɛ ate: “Dimi lakanyutedi nti: Dim’one. Naka dimi kayanganyu, [nyotshike] wane watshu.” Yema la ntondo, lam’akiwɔ lo luudu la la diko, Yeso akatɛ She lo dɔmbɛlɔ ɔnɛ lakalame apɔstɔlɔ ami wa kɔlamelo ndo ndoko ɔtɔi a l’atei awɔ lakashishɔ, ‘onyake paka ɔna l’elanyelo.’ Ɔnkɔnɛ, dia dui diande kotshama, nde ambɔlɔmba di’ambeki ande ntshɔ.

Lam’okaludi wolo w’asɔlayi, vɔ wambemala, wambotatɛ nkeleka Yeso, apɔstɔlɔ wambeya kɛnɛ kayanga ntshama. Mbambolawɔ vate: “Khumadiondjo, tâkote yombo?” La ntondo ka Yeso kadimola, Petero ambɔsɔmɔla yɔɔmbɔ mɔtshi l’atei a tɔɔmbɔ tohende takela apɔstɔlɔ, ambɔkɔta Malako, ose olimu waki ɔlɔmbɛdi wa lâdiko. Yɔɔmbɔ ya Petero yambohandja ɔtɛ w’ose olimu akɔ ko yambôhembola tui dia lonya l’omi.

Yeso ambekama l’atei ko ambowotɛ ate: “Tanyutshaki wuhu uku ntu.” Nde ambonanda tui dia Malako ko ambɔ̂kɔnɔla. L’etena kɛnɛ, nde ambosha wetshelo w’ohomba efula lam’atɛnde Petero ate: “Ukaluya yombo yaye lu dihusu; ne dia wane tshe wakimela yombo, wayuvo la yombo. We nkanaka wati: Dimi haleyi nomba Papa, ku ndi ntumelami andjelo wuleki elui dikumi l’ehendi kakiane uka?”

Yeso ambetawɔ vɔ mbonda, nɛ dia nde ambolembetshiya ate: “Ukundi ukuki afundelu nshidiyama ati: Dieli la dikambu ne ndjala?” Nde ambota nto ate: “Dimi hano dikoho diakambisha Papa uka?” Nde mbetawɔka lolango la Nzambi tshɛ salema lo dikambo diande!

Ko Yeso ambɛlɛ le olui w’anto. Nde ambowambola ate: “Nyu nyambuya la tombo la tukalimba dia ndjumunda, uku atuwundaka opotodi uka? Dimi lakadjaseka [lo tɛmpɛlɔ, NW], letsha, nyu kumundami. Keli dikambu ne tshe diambuyala dia nshidiya afundelo w’amvutshi.”

Ko wonya akɔ, olui w’asɔlayi, ewandji w’alembe la apulushi w’Ase Juda wambonda Yeso ko wambôkeleka ɛkɔdi. Lam’ɛnyiwɔ dikambo sɔ, apɔstɔlɔ wambotshika Yeso ko wambolawɔ. Koko, ɔlɔngɔlɔngɔ ɔmɔtshi—ondo ombeki Makɔ—ambotshikala l’atei w’olui w’anto. Ondo mɛtɛ ndo nde mbaki lo luudu, lɛnɛ akasale Yeso dambo di’Elekanelo, ndo ondo nde amboyela olui w’anto lam’otshwewɔ. Koko kakianɛ, wamboyoweya ndo wamboyoyanga mbonda. Ko nde ambotshika dihɔndɔ diande dia linɛnɛ, ambolawɔ. Mateu 26:47-56; Mako 14:43-52; Luka 22:47-53; Joani 17:12; 18:3-12.

▪ Lande na keya Judasɛ ɔnɛ mɛtɛ layototana Yeso l’ekambɔ ka Ngɛtɛsɛmanɛ?

▪ Ngande wambɛnya Yeso ɔnɛ nde ndjakiyanyaka dikambo di’apɔstɔlɔ ande?

▪ Ambosala Petero dia shimbɛ Yeso, ko ambowotɛ Yeso lo dikambo sɔ?

▪ Ngande wambɛnya Yeso ɔnɛ nde mbetawɔka sala lolango tshɛ laki Nzambi l’endana la nde?

▪ Lam’ambolawɔ apɔstɔlɔ ko wambotshika Yeso, akɔna ambotshikala, ndo kakɔna kamboyôkomɛ?