ƆKƆNDƆ 101

Yeso ambodiakema

OHÊNDA ekambokambo kengo kambokomɛ Yeso! Wekɔ lo nanga mbodiaka. Wambɔ̂kɔkɔmɛ l’otamba. Wambɔ̂kɔkɔla sɛti l’anya ndo l’ekolo. Lande na kakalangaka anto salɛ Yeso dikambo dia ngango na?

Nɛ dia anto amɔtshi wakahetshaka Yeso. Onde wɛ mbeyaka anto akɔ? Onto ɔmɔtshi ekɔ Satana Diabolo, ondjelo wa kɔlɔ. Nde kakatshutshuya Adama l’Eva dia vɔ pindolɛ Jehowa. Ndo nto, Satana mbakatshutshuya atunyi wa Yeso dia vɔ sala dikambo dia kɔlɔ dia ngango.

Kânga la ntondo ka Yeso kɔkɔmɛma l’otamba lanɛ, atunyi ande wakôsoya efula. Onde wɛ akôhɔ woho wakawaye l’ekambɔ ka Ngɛtɛsɛmanɛ dia ndjowonda? Wa na waki atunyi ande na? Eelo, toko ewandji w’ɛtɛmwɛlɔ. Tênde kɛnɛ kakayetaka l’ɔkɔngɔ diko.

Etena kakandama Yeso le ewandji w’ɛtɛmwɛlɔ, apɔstɔlɔ ande wakalawɔ. Vɔ wakatshike Yeso ndamɛ l’atei w’atunyi ande nɛ dia vɔ wakandama la wɔma. Koko ɔpɔstɔlɔ Petero nde la Joani komangana etale efula. Vɔ wakatawayelaka dia menda kɛnɛ kayowosalɛ Yeso.

Ɛlɔmbɛdi wakatɔlɛ Yeso otsha le ekumanyi kɛmɔtshi kakawelɛka Ana, nde akakambaka ntondo oko ɔlɔmbɛdi a lâdiko. Olui w’anto kotshikala edja lakande. L’ɔkɔngɔ diko, vɔ wakatɔlɛ Yeso otsha lo luudu laki Kayifasi, ɔnɛ laki ɔlɔmbɛdi a lâdiko l’etena kakɔ. Ewandji w’ɛtɛmwɛlɔ efula wakatshumana lo luudu lande.

Vɔ wakasale tuminadi tɔmɔtshi lo luudu laki Kayifasi. Vɔ wakɔtshiya anto wakayaka dia ndjomamatanyiɛ Yeso enongo. Ewandji w’ɛtɛmwɛlɔ tshɛ wakate vate: ‘Yeso pombaka ndjakema.’ L’etena kakɔ vɔ wakawotɛ sɔi l’elundji ko wakɔkɔmɔla eshingɔ.

L’etena kakasalemaka akambo asɔ, Petero aki l’andja lo sɛkɛ. Otsho akɔ waki tshitshi, ko anto wakɔnganya dja. Etena kakawokaka dja, okambi ɔmɔtshi wa omoto akashishima Petero, ko nde akate ate: ‘Ndo pami kɛnɛ mbaki kâmɛ la Yeso.’

Petero akawotɛ ate: ‘Kema, dimi komonga kâmɛ lande.’

Anto wakatɛ Petero mbala shato ɔnɛ nde aki kâmɛ la Yeso. Koko mbala la mbala, Petero akawatɛka ate kashi. Mbala ka sato kakate Petero ɔsɔku, Yeso akasekesɔ ko akawênde. Petero akanyange efula dia akambo wa kashi wakandate, ko akatombe atalele.

La pindju ka lushi la tanu, ɛlɔmbɛdi wakatɔlɛ Yeso otsha lo dihole dia woke di’esanganelo, lo mbalasa k’ase Sheke. Lɛkɔ, vɔ wakakɛtshanya lam’asawɔ dia mbeya kɛnɛ kahombawɔ mbosalɛ. Vɔ wakɔ̂tɔlɛ otsha le Pɔnsɔ Pilato, ɔnɔmbɔdi wa lɛtshi la kɛtɛ la Judeya.

Ɛlɔmbɛdi wakatɛ Pilato vate: ‘Pami kɛnɛ ekɔ onto la kɔlɔ. Nde pombaka ndjakema.’ L’ɔkɔngɔ wa nde mumbola Yeso wembola, Pilato akate ate: ‘Dimi halɛnyi dia nde akasale dikambo dimɔtshi dia kɔlɔ.’ Ko Pilato akatome Yeso otsha le Hɛrɔdɛ Atipa. Hɛrɔdɛ mbaki ɔnɔmbɔdi wa la Ngalileya, koko nde akadjasɛka la Jerusalɛma. Hɛrɔdɛ kɔmɛna ɔnɛ Yeso akasale dikambo dimɔtshi dia kɔlɔ, omalɔkɔ nde akôkaloya le Pilato.

Pilato akalange tshungola Yeso. Koko atunyi wa Yeso wakalange di’ose lokanu okina tshungɔma lo dihole diande. Pami kɛsɔ aki ose wovi, lokombo lande Barabasi. Aki otsha lo midi lam’akatondja Pilato Yeso l’andja. Nde akatɛ anto ate: ‘He! Nkumekanga kanyu nd’ɔnɛ!’ Koko ɛlɔmbɛdi a wake wakate vate: ‘Nyowonya oma lângo! Nyodiake! Nyodiake mɛ!’ Ɔnkɔnɛ, Pilato akatshungola Barabasi, ko akakimɔ Yeso l’anya awɔ dia vɔ mbôdiaka.

Lushi lakɔ la tanu, midi eke ka mbikɔ, mbakakɔkɔmɛma Yeso l’otamba. Hɛnyi nde l’osato, koko lo wedi ande ehende, wakahanɛ ndo atɔmbɔki akina ahende, hawosangi atɔmbɔki akɔ l’osato. Yema la ntondo ka Yeso mvɔ, tɔmbɔki kɛmɔtshi akawotɛ ate: ‘Kombohɔ lam’ayoyoyala lo diolelo diayɛ.’ Yeso akôkadimola ate: ‘Lambokolaka nte: wɛ ayonga lami lo Paradiso.’

Shi ɔsɔ ekɔ daka di’ɔngɛnɔngɛnɔ efula? Onde wɛ mbeyaka paradiso kakatɛkɛtaka Yeso? Lende aki paradiso kakasale Nzambi l’etatelo na? Eelo, ekɔ paka la kɛtɛ. Ndo, lam’ayolɛ Yeso oko Nkumekanga l’olongo, nde ayolola pami kɛsɔ dia nde ndjɔsɛna lo Paradiso k’oyoyo ka la kɛtɛ. Onde hatokoke ngɛnangɛna lo dikambo sɔ?

Mateu 26:​57-75; 27:​1-50; Luka 22:​54-71; 23:​1-49; Joani 18:​12-40; 19:​1-30.