Tshapita 122

Wambetshetsha Yeso l’asa Pilato la Hɛrɔdɛ

KÂNGA mbambohonolɛ Yeso Pilato ɔnɛ: nkumekanga kemi, nde ambolembetshiya ɔnɛ Diolelo diande kema wâle le Ase Rɔmɔ. Yeso ate: “Diulelu diami diaha dia la kete nye. Utunduyala diulelu diami dia la kete nye mbedio, tshiki antu ami wutondwela ta, diaha dimi nkimwama l’anya w’asi Juda. Keli kakiane, diulelu diami diaha dia la kete nye.” Ɔnkɔnɛ, mbala shato y’etondo, Yeso ambetawɔ ate: lekɔ la Diolelo, koko aha di’oma la nkɛtɛ nyɛ.

Koko Pilato ambowombola nto ate: “Okone we eko Khum’ekanga?” Mbuta ate, onde wɛ ekɔ nkumekanga kânga mbele Diolelo diayɛ kema dia l’andja ɔnɛ?

Yeso ambotɛ Pilato ɔnɛ ndamɛ ambonda lâwɔ, lam’owokadimudinde ate: “Kam’ataye aso kedio, Khum’ekanga kemi. Dimi lakuto dia dikambu ne. Dia dikambu ne mbakamayi la kete, dia mvuta akambu wa mete. Kanga akambu wa mete tshe atukaka diui diami.”

Mɛtɛ, oyango wakaye Yeso lanɛ la nkɛtɛ ele dia ndjewoya “akambu wa mete,” djekoleko mɛtɛ k’endana la Diolelo diande. Yeso amboyalɔngɔsɔla dia mamema mɛtɛ kɛsɔ la kɔlamelo tshɛ, koyanga mbele lɔsɛnɔ lande lo wâle. Kânga mbambowombola Pilato ate: “Mete, eli na?,” nde hakongi dia vɔ mbolembetshiya awui akina. Nde amboka akambo efula wakoka mbokimanyiya dia nde mbɔsa yɛdikɔ mɔtshi.

Pilato ambokalola oya le olui w’anto wôkonga l’andja. Ondo lo asho wa Yeso mbambotɛ Pilato ɛlɔmbɛdi wa weke la wanɛ wele kâmɛ la wɔ ate: “Dimi hambutanyi nduku la unungu.”

Elui w’anto wambodunganela la nkɛlɛ lam’okiwɔ yɛdikɔ shɔ, ko wambotetemala mbuta ɔnɛ: “Ndi atotomboshaka antu, atetshaka lu Judiya tshe, uma la Ngalili edja ndu lu dihuli ne.”

Pilato amamba heyama lo menda tokanyi t’Ase Juda tele oko t’akanga a dinginya. Ɔnkɔnɛ, lam’atetemala ɛlɔmbɛdi wa weke la dikumanyi dia wodja pangɔhangɔ, Pilato ambosekesɔ otsha le Yeso ko ambowombola ate: “We huki efula k’akambu wakosongwelawo keso?” Koko Yeso hakadimola ndoko dui. Ɔnkɔnɛ, Pilato amamba efula lo menda woho watshikalande ki lam’awɔsɔngwɛwɔ akambo wa kashi.

Lam’okinde ɔnɛ Yeso ekɔ Ose Ngalileya, Pilato ambokondja diaaso dia ndjatondja oma lo dikambo diande. Hɛrɔdɛ Atipa (ɔn’aki Hɛrɔdɛ a Woke) mbele owandji wa Ngalileya, ndo l’etena kɛnɛ, nde akaye la Jerusalɛma dia ndjosala difɛstɔ di’Elekanelo, ɔnkɔnɛ Pilato ambotoma Yeso otsha le nde. Ntondotondo, Hɛrɔdɛ Atipa akahembola Joani Obatizanyi ɔtɛ, ko nde akatatɛ mboka wɔma lam’akandoke lokumu l’ahindo wakasalaka Yeso, nɛ dia nde akokaka wɔma ɔnɛ: Joani ɔsɔ ambolɔ oma lo nyɔi mɛtɛ.

Kakianɛ, Hɛrɔdɛ ambɔngɛnangɛna efula dia mɛna Yeso. Nde hayakiyanya di’ɔngɛnɔngɛnɔ wa Yeso koyanga dia mbeya ɔnɛ akambo wawɔsɔngwɛwɔ wekɔ mɛtɛ kana kashi. Koko, nde ekɔ la saki k’efula ndo ekɔ lo nongamɛ dia mɛna Yeso asala ahindo amɔtshi.

Koko Yeso halange kotsha mposa kaki Hɛrɔdɛ. Lam’awombola Hɛrɔdɛ wembola, nde hakadimola ndoko dui. Lam’ɛnyiwɔ ɔnɛ tambɔsa nsɔnyi, Hɛrɔdɛ nde l’asɔlayi ande wambotatɛ nsɔka Yeso. Wambɔ̂lɔtsha dihɔndɔ dia wɛma tɔ ko wambowɔ̂la. Ko vɔ wambôkaloya otsha le Pilato. Omalɔkɔ, Pilato nde la Hɛrɔdɛ, wanɛ waki atunyi ntondo, wamboyoyala ɛngɛnyi wa mamba.

Lam’okaludi Yeso, Pilato ambelɛ ɛlɔmbɛdi a weke, ewandji w’Ase Juda, kâmɛ l’anto akina ko ambowatɛ ate: “Nyu nyambuya la untu one le mi, nyati: Ndi kangayula antu. Enda, dimi lambuwumbula la ntundu kanyu, halenyi nduku munga le untu one lu akambu wosongwelanyu. Ee, ndu Herode kumbena la dikambu, ne dia ndi akûkaluya le su. Nyulungi, ndi kuntsha dikambu dia ndi mvo. Okone dimi layôkomola, ku layûtshungula.”

Ɔnkɔnɛ, mbala hiende y’etondo Pilato akate ɔnɛ Yeso kema l’onongo. Nde ekɔ la saki k’efula ka mbotshungola, nɛ dia nde mbeyaka ate: paka lo kandjema mbamboyôkimɔ ɛlɔmbɛdi l’anya ami. Lam’ayatshutshuya Pilato dia tshungola Yeso, dikambo dikina nto diamboyoleka mbotshutshuya dia nde ntsha ɔsɔku. Lam’odjashinde lo kiti k’elombwelo, wadiɛnde ambotoma dikɛndji diamboyowotɛ ate: “Totoki lu dikambu dia untu ololo uku, ne dia dimi lakasuwi efula lu do [dɔ di’oma le Nzambi mɛtɛ] dia dikambu diandi.”

Pilato mbeyaka ɔnɛ: dimi pombaka tshungola onto ɔnɛ laha l’onongo, ko woho akɔna wakandakoke ntsha? Joani 18:36-38; Luka 23:4-16; Mateu 27:12-14, 18, 19; 14:1, 2; Mako 15:2-5.

▪ Woho akɔna wambokadimola Yeso lo dimbola di’endana la lowandji lande?

▪ “Mete” kakɔna kakewoyaka Yeso l’edja tshɛ kakinde la lɔsɛnɔ lanɛ la nkɛtɛ?

▪ Yɛdikɔ yakɔna yambɔsa Pilato, kakɔna kambosala anto lam’okiwɔ dikambo sɔ, ndo Pilato ambondotsha la Yeso?

▪ Hɛrɔdɛ Atipa ênde, lande na kangɛnangɛnande efula dia mɛna Yeso, ndo kakɔna kambondôsalɛ?

▪ Lande na kalomɔlomɔ Pilato dia tshungola Yeso?