Tshapita 124

Wambotshɔ la nde dia tôdiaka

LO MENDA woho watshikala Yeso ki la ntondo k’asui, Pilato ambohemba nto dia mbotshungola, koko ɛlɔmbɛdi wa weke wamboleka mboka nkɛlɛ. Vɔ wakashidi mbɔsa tɛdikɔ di’aha ndoko dikambo fukutanya sangowelo diawɔ dia kɔlɔ. Diɔ diakɔ diambowomɛ pangɔhangɔ nto vate: ‘Kɔkɔmɛnde l’otamba! Kɔkɔmɛnde l’otamba!’

Ko Pilato ambâkaloya dui ate: “Nyuwose nyame, nyûdiaki.” (Otshikitanyi la kɛnɛ kakawataka ntondo, Ase Juda wekɔ la dikimɔ dia ndjaka wanɛ wakongola onongo lo mɔnyɔla ɛlɛmbɛ a weke wa l’ɔtɛmwɛlɔ.) Aya kana mbala ka tanu, Pilato ambɛnya ɔnɛ Yeso kema l’onongo, nde ate: “Dimi hambutanyi la unungu.”

Ase Juda lam’ɛnyiwɔ ɔnɛ tambokita tatala lo awui wa pɔlitikɛ wawɔsɔngwɛso, wambokalola lo mbɔsɔngwɛ awui w’ɔtɛmwɛlɔ wakawataki ntondo, ambeta oko wenya ɛmɔtshi, lam’akawalomboyaki Yeso la ntondo k’Ase Sheke ɔnɛ nde ambɔtɛnga Nzambi. Vate: “Shu la olembe, ku uma lu olembe ako, dieli la ndi dia mvo; ne dia ndi akayaete [Ɔna Nzambi, NW].”

Ɔsɔ ekɔ dikambo di’oyoyo le Pilato, ndo diɔ diamboleka mbôkiya wɔma. Kakianɛ, nde ambeya ɔnɛ Yeso bu onto k’onto, nɛ dia kânga dɔ dia wadiɛnde la wolo wa mamba wa lonto lande mɛnyaka dikambo diakɔ. “Ɔna Nzambi” mbende mɛtɛ? Pilato mbeyaka ɔnɛ Yeso ekɔ Ose Ngalileya. Ko onde nde akasɛnaka ntondo ka ndjoya la nkɛtɛ? Pilato ambowɔtshiya nto lo luudu ko ambowombola ate: “Uma lendi uyeye na?”

Koko Yeso hate ndoko dui. Yema la ntondo, nde akatɛ Pilato ɔnɛ nde ekɔ nkumekanga koko Diolelo diande bu dia l’andja ɔnɛ. Ɔnkɔnɛ, ndoko ohomba mbolembetshiya awui akina nto kakianɛ. Koko Pilato, oma l’otako ande, amboka Yeso nkɛlɛ nɛ dia nde halange mbokadimola, ko nde lande ate: “We hamvutela diui? We heyi wati: Dimi la wulu wa nkutshungula, ndu la wulu wa [kohanɛ l’otamba, NW]?”

Yeso mbôkadimolande la dilɛmiyɛlɔ tshɛ ate: “Utunduyala vo kunkusha wulu uma l’ulungu, tshiki we kema la wo wa ntshelami dikambu.” Nde ekɔ lo tɛkɛta dikambo dia lowandji lakasha Nzambi emboledi w’anto dia vɔ mendaka akambo wa la nkɛtɛ. Yeso ambota nto ate: “Okone one lakankimwi le ye, keli la dikambu diuleki kolo.” Mɛtɛ, Kayifasɛ, ɔlɔmbɛdi a lâdiko nde la wanɛ wosangi lande lolemi, kâmɛ ndo Judasɛ Isakariyɔtɛ wekɔ l’onongo woleki wa Pilato lo akambo wa kɔlɔ wasalɛwɔ Yeso.

Pilato amboleka mamba Yeso, ndo nde amboka wɔma ɔnɛ ondo Yeso ndja oma le Nzambi, ko nde amboyatshutshuya nto dia mbotshungola. Koko Ase Juda hawohokamɛ Pilato. Wambonyomɔ̂sɔngwɛ akambo wa pɔlitikɛ wakawɔ̂sɔngwɛka ntondo, ko wambota lo mayɛlɛ vate: “Naka we ambutshungula untu one, keti we kema ongenyi wa Kayisa. Untu tshe layaete khum’ekanga, ambonyola Kayisa.”

Kânga mbɔ̂sɛngiyawɔ la wolo, Pilato ambotondja Yeso oya l’andja nto. Nde ambowatɛ nto ate: “Nyendi khum’ekanga kanyu!”

“Uwunya! Uwunya! [Hanɛnde l’otamba, NW]!”

Ko Pilato ambowambola nto la lonyangu ate: ‘Mpanɛ nkumekanga kanyu l’otamba?’

Ase Juda wekɔ lo mboka nkɛlɛ lam’ewɔ la tshina dia lowandji l’Ase Rɔmɔ. Mɛtɛ, vɔ mɔnyɔlaka lowandji l’Ase Rɔmɔ! Koko, ɛlɔmbɛdi wa weke wambota la lokeso tshɛ vate: “Shu kema la khum’ekanga, paka Kayisa.”

Pilato amboka wɔma ɔnɛ: watokoyominya lo dihole diami ndo lokumu lami latokoyoshishɔ, ko nde amboyetawɔ kɛnɛ kôtshutshuya Ase Juda wonya tshɛ. Nde ambokimɔ Yeso. Asɔlayi wambôkolola okutu wa telele ko wambɔ̂lɔtsha ahɔndɔ ande wa lâdiko. Lam’atawatshu la Yeso dia ntôhanɛ, wambowɛndja otamba ande w’asui.

Taya l’atei atei wa pindju ka Lushi la Tanu, lo ngɔndɔ ka Nisana 14; ondo midi aya suke. Yeso ekɔ paka leemala loto tatɛ oma ko Lushi la Nɛi la yosose, ndo nde ambosowa woho w’anyanya. Diɔ diakɔ mɛtɛ diambondɔlɛmba la wotsho w’otamba. Ɔnkɔnɛ, lam’ɛnyiwɔ ombetshetshi ɔmɔtshi, lokombo lande Simɔna, Ose Kurɛnɛ ka l’Afrika, vɔ wambôkengola dia nde mbɛ̂mbɛ otamba akɔ. Lam’atawatshu, anto efula, kâmɛ ndo amato, wekɔ lo tawayele, watayatshatsha la lonyangu ndo watalele Yeso.

Yeso mbasekesɔnde le amato akɔ, ko nde lawɔ ate: “Ana amantu wa Jerusalema, tanyundelaki, keli nyuyaleli, nyuleli ndu an’anyu. Nyulungi, nshi yayuya, yayuta antu vati: Amantu wa dikumba la etema wahuti ana, ndu awele wahalomia ana, weko la otshoko! . . . Ne dia naka vo wambutsha akambu ane lam’eki utamba uyuyu, ukundi ayuwutsha lam’umawo?”

Yeso ekɔ lo tɛkɛta lo dikambo di’otamba wele wodja w’Ase Juda, otamba wambotshikala paka la yema y’ashi tshitshɛ tsho, yema ya lɔsɛnɔ, nɛ dia Yeso êke lâwɔ kâmɛ la yema y’anto wele la mbetawɔ le nde. Koko lam’ayowonya Ase Juda asɔ lo wodja akɔ, wodja ɔsɔ wayotshikala paka oko osongo wambovɔ lo nyuma, ɛɛ, ɔlɔngɔswamelo wa wodja w’otondo wamboma. Vɔ wayolela lam’ayoya alembe w’Ase Rɔmɔ, wanɛ wayoyala oko dihomɔ dia Nzambi, dia ndjoshila wodja w’Ase Juda oshiki! Joani 19:6-17; 18:31; Luka 23:24-31; Mateu 27:31, 32; Mako 15:20, 21.

▪ Ase Juda ambowɔsɔngwɛ Yeso lam’ɛnyiwɔ ɔnɛ tambokita tatala l’akambo wa pɔlitikɛ wɔ̂sɔngwɛso?

▪ Lande na kamboleka Pilato mboka wɔma?

▪ Wa na wambosala pɛkato koleki woke lo akambo wasalɛwɔ Yeso?

▪ Ngande wamboyokonya ɛlɔmbɛdi Pilato lo nde ndjokimɔ Yeso dia vɔ mbodiaka?

▪ Yeso ambondote amato wayôlele, ndo olanginde mbuta lam’ɔtɛkɛtshinde dikambo di’osongo w’“uyuyu” la ‘wamboma’?