ƆKƆNDƆ 102
Yeso ambolɔ
ONDE wɛ mbeyaka omoto ongo l’apami ango? Omoto ongo lokombo lande Mariya Mangadala, ɔngɛnyi a Yeso. Ndo apami ango wɔlɔtshi ahɔndɔ a wɛma andjelo mbewɔ. Lo yuududu ndjo yalengɛ Mariya l’etei mbakawakitsha odo wa Yeso. Yɔ mbelamɛka ɔnɛ diombo. Koko kakianɛ, odo wa Yeso hawoyɛnama! Akawonya na? Tênde dikambo diakɔ.
L’ɔkɔngɔ wa nyɔi ka Yeso ɛlɔmbɛdi wakatɛ Pilato vate: ‘Etena kaki Yeso la lɔsɛnɔ, nde akate dia nde ayolɔ l’ɔkɔngɔ a nshi shato. Ɔnkɔnɛ, toma anto dia vɔ tolama diombo. Ambeki ande hawoyova odo ande ko vɔ ndjota ɔnɛ nde ambɔlɔ!’ Pilato akatɛ ɛlɔmbɛdi dia vɔ toma asalayi dia tolama diombo.
Koko, lushi la sato la pindju ka pɛ, l’ɔkɔngɔ wa nyɔi ka Yeso, ondjelo ɔmɔtshi waki Jehowa akaye la shashimoya. Nde akangitola dive diaki la soko dia diombo. Asalayi wakoke wɔma efula ndo vɔ kokoka pasahasa. L’ɔkɔngɔ diko, wayendake l’etei ka diombo ko odo aya bu! Asalayi amɔtshi wakatshu otsha l’osomba dia tɔkɔndɔlɛ ɛlɔmbɛdi akambo akɔ. Onde wɛ mbeyaka kɛnɛ kakasale ɛlɔmbɛdi ɛsɔ wa kɔlɔ? Vɔ wakafute asalayi falanga ɔnɛ kele wate kashi. Vɔ wakatɛ asalayi vate: ‘Nyote nyate: ambeki ande wakayova odo ande l’otsho lam’akiso lo djɔ.’
L’etena kɛsɔ amato amɔtshi, angɛnyi wa Yeso, wakatshu otsha lo diombo. Vɔ wakambe heyama dia tana diombo hwe! Andjelo ahende wɔlɔtshi ahɔndɔ a wɛma wakatombe putshu. Vɔ wakawambola vate: ‘Bonde kayanganyu Yeso? Toko nde akolwe. Nyutshu esadi nyotote ambeki ande.’ Ande lowango lakawalawɔ lee! Koko, lam’akawatalawɔka, pami kɛmɔtshi akawaemadja lo mboka. Onde wɛ mbeyaka pami kakɔ? Toko Yeso! Nde akawatɛ ate: ‘Nyutshu nyotote ambeki ami.’
Etena kakatɛ amato asɔ ambeki wa Yeso ɔnɛ nde ambolɔ ndo vɔ wakawɛnyi, ambeki kombetawɔ. Petero nde la Joani wakalawɔ otsha lo diombo dia tênda vɔamɛ, koko diombo diaki hwe! Lam’akayakalolaka Petero nde la Joani, Mariya Mangadala akatshikala l’ɔkɔngɔ. L’etena kakɔ kakandalengɛ lo diombo ko mɛna andjelo ahende.
Onde wɛ mbeyaka kɛnɛ kakakomɛ odo waki Yeso? Nzambi akashisha odo akɔ. Nzambi kombolola Yeso la demba di’emunyi diakavu lande. Nde akasha Yeso demba di’oyoyo dia lo nyuma, oko nɛ diele l’andjelo. Koko dia nde mɛnya ambeki ande ɔnɛ nde ambolɔ, Yeso akalɔtaka demba diakakoke anto mɛna, oko ayoteka dikambo diakɔ.
Mateu 27:62-66; 28:1-15; Luka 24:1-12; Joani 20:1-12.