Tshapita 128

Yeso ambolɔ!

LAM’ƐNYIWƆ diombo dia Yeso diaya hwe, Mariya Mangadala ambolawɔ dia totɛ Petero la Joani. Koko ondo amato akina wambotshikala suke la diombo. Kem’edja, ondjelo ɔmɔtshi ambɛnɛ le wɔ ko ambowaelɛ dia vɔ mbɔtɔ l’etei.

Lam’ɔtwɛwɔ l’etei, amato akɔ wambɛna ondjelo okina nto, ko ondjelo ɔmɔtshi ambowatɛ ate: ‘Tanyokake wɔma, nɛ dia dimi mbeyaka nte Yeso lakawahanɛ l’otamba mbayanganyu. Nde bu lanɛ, nde akolwe oko wakandataditshi. Nyoye nyoyende lam’akawawetamia. Nyutshu esadi dia totɛ ambeki ande ɔnɛ nde ambolɔ oma lo nyɔi.’ Ko amato akɔ wambolawɔ, la wɔma ndo l’ɔngɛnɔngɛnɔ wa mamba.

L’etena kakɔ, Mariya ambotɛna Petero la Joani ko ambowatɛ ate: “Vo wambunya Khumadiondjo uma lu diumbu, hateyi lene akawawetamisha.” Aha la tshimbatshimba, apɔstɔlɔ asɔ ahende wambokungusɔ la mango. Joani mboleki mbidja lowango—nɛ dia nde mɛtɛ mboleki dikɛnda—ko nde ambokoma lo diombo ntondo. L’etena kɛnɛ ko amato wakatshwe, ɔnkɔnɛ ndoko onto lele suke lâwɔ. Joani ambemala suke la diombo, ambolengɛ l’etei, ko ambɛna bɛtshi di’ahɔndɔ, koko nde ambotshikala l’andja.

Lam’okumi Petero, nde ambɔtɔ l’etei mbala kakɔ ɔtɔi. Nde ambɛna bɛtshi di’ahɔndɔ lâwɔ ndo dihɔndɔ diakawɔmbɛ ɔtɛ wa Yeso. Diɔ diambɔmbama lo dihole dikina. Wonya ɔnɛ, Joani ambɔtɔ ndo nde lawɔ l’etei ka diombo, ko ambetawɔ awui wa Mariya. Koko, oyadi Petero kana Joani, ndoko lashihodia ɔnɛ Yeso ambolɔ, koyanga mbakandatawate dikambo sɔ mbala ko mbala. Oko wewɔ l’okandokando, vɔ akɔ ahende wambokalola la ngelo, koko Mariya, ɔnɛ lakakaludi oya lo diombo, ambotshikala.

L’etena kakɔ, amato akina wambolawɔ dia totɛ ambeki ɔnɛ Yeso ambolɔ, oko owate andjelo. Lam’atawalawɔ esadi esadi, Yeso ambohomana la wɔ, ko ambowatɛ ate: “Moyo!” Ko vɔ wambɔkɔ l’ekolo ande ndo wambowɔ̂kɔkwɛ! Ko Yeso ambowatɛ ate: “Tanyukaki woma. Nyutshu, nyututeli analingu, watshu la Ngalili; vo wayutomena leko.”

Yema la ntondo, lam’akasalema didimu dia nkɛtɛ ndo l’etena kakɛnama andjelo, asɔlayi wakalamaka wakandama la wɔma wa mamba ko wakayala oko wanɛ wambovɔ. Lam’akawayetɔ, vɔ wakatshu otsha l’osomba ko wakatotɛ ɛlɔmbɛdi a weke kɛnɛ kakatshama. L’ɔkɔngɔ wa vɔ sanga lolemi, “dikumanyi” di’Ase Juda diakɔshi tɛdikɔ dia pemba dia dinyadinya dikambo sɔ lo mbisha asɔlayi etshimba kana mbo y’otsho. Vɔ wakawatɛ ɔnɛ: “Kanyuteli antu nyati: Ambeki andi wakayi l’utshu, wakayosa udu andi lam’akisu lu djo.”

Lam’ele asɔlayi w’Ase Rɔmɔ kokaka nongola dilanya dia nyɔi naka vɔ ndala djɔ l’olimu, ɛlɔmbɛdi wakâlake ɔnɛ: “Naka dikambu ne [dikambo di’ɔnɛ nyakaladi djɔ] diayukuma le umbuledi, shu tayuwetawuya, tayunyamela uma l’unungu.” Lam’ele wakawasha lokema la falanga, asɔlayi wakatshe ɔnkɔnɛ akawawatɛ. Omalɔkɔ, lokumu l’ɔnɛ ambeki wa Yeso wakavi odo ande lakayohandjɔnɛ efula l’atei w’Ase Juda.

Mariya Mangadala, ɔnɛ lakatshikadi suke la diombo, amboyatshatsha la lonyangu. Lende akoka Yeso monga? Nde ambɔsɛmɛ yema otsha la ntondo dia tolengɛ lo diombo, ɛnyinde ko andjelo ahende wɔlɔtshi ahɔndɔ wa wɛma, andjelo asɔ wamboyɛnama nto! Ɔmɔtshi mbidjasɛ l’ɔtɛ ndo okina l’ekolo wa dihole diakawakitsha odo wa Yeso. Vɔ wambowombola ɔnɛ: “Umuntu, kalelaye na?”

Mariya mbakadimolande ate: “Ne dia vo wambunya Khumemi, haleyi lene akawawetamisha.” Nde ambosekesɔ ko ambɛna onto ɔmɔtshi lambowombola dimbola diakɔ diamɛ ate: “Umuntu, kalelaye na?” Ko ɔsɔ ambowombola nto ate: “Ayangaye na?”

Nde ambɔfɔnya ate kana pami kɛsɔ mbalɔngɔsɔla ekambɔ, lɛnɛ ele diombo diakɔ, ko nde lande ate: “Uwandji, naka we akawunyisha, umvuteli lene akayatuwetamia, keli ntuwose.”

Ko pami kakɔ ambowelɛ ate: “Mariya!” Ɔtɛkɛta kele edja, Mariya ambeya ɔnɛ Yeso ɔsɔ, oma lo yoho yatondowêlɛka nshi tshɛ. Mbôkaloyande dui ate: “Raboni” (kɛdikɛdi: “Umbetsha”). Ko nde ambowombamɛ l’ɔngɛnɔngɛnɔ wa mamba. Koko Yeso ambowotɛ ate: “Tumunandaki, ne dia dimi latambela le Papa. Keli utshu le analingu, utuwateli wati: Dimi layumbela le Papa, Shenyu, le [Nzambi kami ndo Nzambi kanyu, NW].”

Ko Mariya ambolawɔ otsha lo dihole diosanganyi apɔstɔlɔ kâmɛ l’ambeki. Nde amboyahɛ dui diande lâdiko dia awui wotshi amato akina ɔnɛ takɛnyi Yeso ambolɔ. Koko, oko ahawetawe amato akina, apami asɔ hawetawɔ ndo awui wa Mariya. Mateu 28:3-15; Mako 16:5-8; Luka 24:4-12; Joani 20:2-18.

▪ L’ɔkɔngɔ wa vɔ tana diombo hwe, Mariya Mangadala ambondosala, ndo kakɔna kambokomɛ amato akina?

▪ Kakɔna kambosala Petero nde la Joani lam’ambowotana diombo hwe?

▪ Akɔna ambohomana la amato akina lam’atawatshu dia totɛ ambeki ɔnɛ Yeso ambolɔ?

▪ Kakɔna kakakomɛ asɔlayi wakalamaka diombo, ndo kakɔna kakasale ɛlɔmbɛdi lam’akawoke dikambo sɔ?

▪ Kakɔna kambotshama lam’eke Mariya Mangadala ndamɛ suke la diombo, ndo ambeki ambowosala lam’okiwɔ awui w’oma le amato?