ƆKƆNDƆ 103

L’etei ka luudu lodihami

L’ƆKƆNGƆ wa Petero nde la Joani mumɔ oma lo diombo lɛnɛ aki odo wa Yeso, Mariya akatshikala ndamɛmɛ lɛkɔ. Nde akatatɛ la ndela. L’etena kɛsɔ mbakandalengɛ l’etei ka diombo oko wakatɛnyi l’osato wa la ntondo. Nde akɛnyi andjelo ahende! Vɔ wakawombola vate: ‘Lande na kalelayɛ na?’

Mariya akakadimola ate: ‘Toko wakanyisha Nkumɛmi, ko haleye dihole diakawatôkitsha.’ Ko Mariya akasekesɔ ɛnyi ko pami kɛmɔtshi. Nde akawombola ate: ‘Akɔna atayayange?’

Mariya akafɔnyaka ate kana pami kakɔ kɛsɔ kanga ekambɔ mbende, ndo ɔnɛ kana nde mbakanyisha odo wa Yeso. Diɔ diakɔ diakandawotɛ ate: ‘Naka wɛ akawunyisha, ombute lɛnɛ akayatôkitsha.’ Tete le, pami kakɔ aki Yeso. Nde akalɔtɛ demba dimɔtshi diaki kokoka Mariya mbêya. Koko lam’akandawelɛ lo lokombo lande, Mariya akeye ate: Yeso ɔsɔ. Nde akalawɔ ko akatotɛ ambeki ate: ‘Dimi lakɛnyi Nkumadiɔndjɔ!’

Lushi lakɔ lâmɛ l’ɔkɔngɔ diko, lam’akatatshɔka ambeki ahende otsha lo ngelo kakawelɛka Emayo, pami kɛmɔtshi akasambe lawɔ lo mboka. Ambeki waki la lonyangu l’efula nɛ dia Yeso akadiakema. Koko, lam’akawatatshɔka, pami kɛsɔ akawalembetshiya akambo efula w’oma lo Bible, dikambo sɔ diakâkeketsha efula. L’ɔkɔngɔ diko, lam’akawemala dia ndɛ diangɔ, ambeki wakeye dia pami kakɔ aki Yeso. L’etena kakɔ, Yeso akashishɔ ko ambeki ahende asɔ wakakalola otsha la Jerusalɛma dia totɛ apɔstɔlɔ dikambo diande.

Lam’akasalemaka akambo asɔ, Yeso akɛnama ndo le Petero. Ambeki akina wakangasana l’ɔngɛnɔngɛnɔ lam’akawoke dikambo sɔ. Ambeki ahende akɔ wakatshu otsha la Jerusalɛma ko wakatotanaka apɔstɔlɔ. Vɔ wakâkɔndɔlɛ woho wakɛnami Yeso ndo le wɔ lam’akiwɔ lo mboka. L’etena kakɔ kâmɛ kakiwɔ lo kɔndɔla akambo asɔ, onde wɛ mbeyaka dikambo dia diambo diakatombe?

Ohênda osato ɔnɛ. Yeso ambɛnama l’atei a luudu, kânga mbakadihama lokuke ku. Ande ɔngɛnɔngɛnɔ waki l’ambeki lee! Shi ɔsɔ aki lushi l’ɔngɛnɔngɛnɔ? Onde wɛ kokaka mbadia mbala ngana yambɛnama Yeso le ambeki ande? Mbala tshanu kana ngana?

Ɔpɔstɔlɔ Tɔmasɛ komonga kâmɛ lawɔ lam’akɛnama Yeso. Ɔnkɔnɛ, ambeki wakayowotɛ vate: ‘Takɛnyi Nkumadiɔndjɔ!’ Koko Tɔmasɛ akate dia nde pombaka mɛna Yeso ndamɛmɛ la ntondo ka nde mbetawɔ. L’ɔkɔngɔ wa nshi enanɛi, ambeki wakatshumana nto lo luudu lakadihama ku, ndo Tɔmasɛ aki kâmɛ lawɔ mbala kɛsɔ. Yeso akɛnama la shashimoya l’atei a luudu. Lâsɔ mbaketawɔ Tɔmasɛ.

Joani 20:​11-29; Luka 24:​13-43.