ƆKƆNDƆ 104
Yeso ambokalola l’olongo
L’EDJA ka nshi efula, Yeso akayaɛnyaka le ambeki ande mbala efula. Olekanyi ambeki 500 wakawɛnyi l’etena kâmɛ. Onde wɛ mbeyaka akambo wakandawatɛka etena kakandɛnamaka? Ele akambo w’endana la Diolelo diaki Nzambi. Jehowa akatome Yeso lanɛ la kɛtɛ dia nde ndjêtsha anto akambo w’endana la Diolelo. Ndo nde akakɔlamela la sala dikambo sɔ kânga l’ɔkɔngɔ w’eolwelo kande oma l’edo.
Onde wɛ akohɔ ele Diolelo diaki Nzambi? Eelo, Diolelo sɔ diekɔ ɛlɔmbwɛlɔ ka mɛtɛ kaki Nzambi kele l’olongo, ndo Yeso mbele Ɔnɛ lakasɔnama dia monga owandji wa l’ɛlɔmbwɛlɔ kakɔ. Oko wakateke, Yeso akɛnya dia nde ayonga nkumekanga k’ɔlɔlɔ efula lam’akandaleshaka wanɛ waki la ndjala, lam’akandakɔnɔlaka wanɛ waki la hemɔ ndo lam’akandololaka edo!
Ko l’etena kayolɛ Yeso l’olongo oko nkumekanga l’edja k’ɛnɔnyi kinunu, ngande wayoyala kɛtɛ na? Eelo, kɛtɛ k’otondo kayokadimɔ paradiso ka dimɛna efula. Ata hawotoyala nto lɔkɔ, koyanga akambo wa ngala kana hemɔ, ndo kânga nyɔi hatoyala nto lɔkɔ. Sho shikikɛka ɔnɛ dikambo sɔ diekɔ mɛtɛ nɛ dia Nzambi akatonge kɛtɛ dia tɔ ndjâla paradiso di’anto mbidjasɛka lɔkɔ. Diɔ diakɔ diakandasale ekambɔ k’Ɛdɛna l’etatelo. Ndo Yeso ayosala tshɛ dia lolango la Nzambi l’endana la kɛtɛ kotshama.
Kakianɛ, etena kambokoka ka Yeso kalola otsha l’olongo. Yeso akayaɛnyaka le ambeki ande nshi 40 y’etondo. Omalɔkɔ, ambeki ande wakashikikɛ dia nde ambolɔ. Koko la ntondo ka nde tshika ambeki ande, nde akawatɛ ate: ‘Nyotshikale la Jerusalɛma edja ndo lam’ayonyokondja nyuma k’ekila.’ Nyuma k’ekila kɛdikɛdi wolo wa Nzambi wakamba lande olimu, ndo vɔ kokaka mbɛdikama la lɔpɛpɛ lapɛpa, tɔ kakahombe kimanyiya ambeki ande dia vɔ sala lolango la Nzambi. L’ɔkɔngɔ diko, Yeso akate ate: ‘Nyu pombaka sambisha dikambo diami l’ahole tshɛ wa lo kɛtɛ.’
L’ɔkɔngɔ wa Yeso mbuta akambo asɔ, dikambo dimɔtshi dia diambo diakasalema. Nde akatatɛ la mbudɛ otsha l’olongo, oko wɛnayɛ lanɛ l’osato. Oma lâsɔ, dinge diakôkombe oma lo asho awɔ, ko ambeki kɔmɛna Yeso nto. Yeso akatshu l’olongo, ndo nde akatotatɛ la mbolɛ lâdiko di’ambeki ande wele la kɛtɛ.
1 Koreto 15:3-8; Enyelo 21:3, 4; Etsha 1:1-11.