ƆKƆNDƆ 109

Petero ambotshɔ aka Kɔnɛliyo

ƆPƆSTƆLƆ Petero ongo emadi nde la angɛnyi ande. Ko lande na kambokusama pami kengo l’ekolo wa Petero na? Onde nde pombaka sala dikambo ndo? Onde wɛ mbeyaka pami kakɔ?

Pami kengo lokombo lande Kɔnɛliyo. Nde ekɔ owandji w’asalayi w’Ase Rɔmɔ. Kɔnɛliyo kombeyaka Petero, koko nde akalongola dui dia mbêta oya lakande. Tênde woho wakayotshamaka dikambo sɔ.

Ambeki wa ntondo waki Yeso waki Ase Juda, koko Kɔnɛliyo kondjala Ose Juda. Koko, nde akalangaka Nzambi, akɔ̂lɔmbaka, ndo akasalɛka anto ɛlɔlɔ efula. La dikɔlɔ dimɔtshi, ondjelo akawɛnɛ ko akawotɛ ate: ‘Wɛ ambɔngɛnyangɛnya Nzambi, ndo nde ayanga kotsha alɔmbɛlɔ ayɛ. Toma anto dia vɔ toya la pami kɛmɔtshi kelɛwɔ Petero. Nde mbidjasɛ la Jɔpa laka Simɔna, ɔnɛ lodjashi l’omamu a ndjale.’

Oshimu kele edja, Kɔnɛliyo akatome anto dia vɔ toya la Petero. La wedi a pindju, lam’akawasukana suke l’osomba wa Jɔpa, Petero aki lo mbalasa ka ladiko ka lo luudu laki Simɔna. Ko Nzambi akawɛnya ɛnɛlɔ ka dihɔndɔ dia woke diayaholɔ oma l’olongo. Weoho a nyama tshɛ yaki lo dihɔndɔ diakɔ. Lo ndjela ɛlɛmbɛ a Nzambi, nyama shɔ yaki mindo dia ndɛ koko dui diakate ate: ‘Petero emala. Diaka kele ole.’

Petero akakadimola ate: ‘Kema! Dimi halalɛka ɛngɔ ka mindo.’ Koko dui diakatɛ Petero ate: ‘Tâketa kɛnɛ kambɛdia Nzambi w’ate: ɛngɔ ka mindo.’ Dikambo sɔ diakasalema mbala shato. Etena kakatshimbaka Petero yimba dia mbeya olembetshiyelo w’akambo asɔ tshɛ, anto wakatomama oma le Kɔnɛliyo wakakome lo luudu ko wakambola Petero.

Petero akaholɔ ko akate ate: ‘Dimi layanganyu ɔnɛ. Oyenyu na?’ Lam’akalembetshiya apami akɔ ɔnɛ ondjelo ɔmɔtshi mbakatɛ Kɔnɛliyo dia nde mbelɛ Petero oya lakande, nde aketawɔ dia ntshɔ lawɔ. La wedi a pindju, Petero kâmɛ l’asekande wakatshu otsha laka Kɔnɛliyo la Kayisariya.

Kɔnɛliyo akatshumanya ewotɔ la angɛnyi ande. Lam’akaye Petero, Kɔnɛliyo akôlongola. Nde akakɔ ko akakusama l’ekolo wa Petero, oko wɛnayɛ lanɛ. Koko Petero akawotɛ ate: ‘Emala, ndo dimi kele onto.’ Eelo, Bible mɛnyaka dia kema ɔlɔlɔ kusɛ onto adwe ndo mbɔtɛmɔla. Sho pombaka tɛmɔla paka Jehowa ndamɛ oto.

Oma lâsɔ, Petero akatatɛ la sambisha anto wakatshumana. Nde akate ate: ‘Dimi lambɛna nte: Nzambi mbetawɔka anto tshɛ walanga mbokambɛ.’ Lam’akandatɛkɛtaka, Nzambi akatome nyuma kande k’ekila, ko anto akɔ wakatatɛ la tɛkɛta ɛtɛkɛta wotshikitanyi. Ambeki w’Ase Juda waki kâmɛ la Petero wakambe lam’akawɛnyi dikambo sɔ, nɛ dia vɔ wakakanaka ɔnɛ Nzambi akalangaka Ase Juda ato. Ɔnkɔnɛ, dikambo sɔ diakawaetsha dia Nzambi hasɔnɛ nkoho. Onde ɔsɔ kema dikambo di’ɔlɔlɔ diahombaso mbohɔka sho tshɛ?

Etsha 10:​1-48; 11:​1-18; Enyelo 19:⁠10.