Otondjelo w’Ekanda w’Endana la Bible dia Tombola Nzambi

Ɛmɛnyi wa Jehowa mbeyamaka ɔlɔlɔ lo esambishelo kawɔ ka Diolelo dia Nzambi oma l’ekimanyielo k’abuku. Tatɛ mako 1920, la Société Watch Tower akakambe olimu l’anto wayakimɔ la lolango lawɔ, wanɛ woye oma l’atei w’Ɛmɛnyi wa Jehowa, dia tondjaka periodikɛ la abuku amɔtshi dia mbâdianganya. Dui sɔ diakawasha diaaso dia vɔ tetemala la tondja ekanda mbala la mbala l’oshinga wa kɛ̂se.

Tamba mako ɛnɔnyi ɛmɔtshi 70, la Société akashidimikola ndo akahamia otondjelo ande w’ekanda w’endana la Bible, ntondo la Brooklyn, ko lo wedja ekina l’ɔkɔngɔ. Lutumu lɔsɔ tshɛ lakasalema oma le akambi wayakimɔ la lolango lawɔ lele lofulo lawɔ lekɔ lo tatetemala pama.

Oya l’ekomelo k’ɛnɔnyi 1970, toho t’edjedja t’okongelo la ofundelo w’ekanda takayɔsɛkama dia mbɔsa okongelo w’ekanda lo fɔtɔ y’ɔsama l’atɔtɔ wahɛnama oma lo ɔrdinatɛrɛ ndo yoho y’ofundelo ya lo mashinyi wa offset. Okakatanu wakikɔ lo dihomɔ diakasondjama l’etena kakɔ, diɔ diakakoke kambema olimu paka l’ɛtɛkɛta ɛmɔtshi yema tshitshɛ. Koko, la Société ambomɛka la funda ekanda l’ɛtɛkɛta 160 ndo akɛnaka ohomba wa nyomokotsha ekina nto.

Omalɔkɔ, wakayetaka anto walanga, ko wakawasha ɔkɛndɛ wa mbeka ɔkɛndɛkɛndɛlɔ w’atɔtɔ wahɛnama dia kongɛ ekanda l’ɛtɛkɛta efula. Weolo ɛsɔ kombidjama wodjama djama. Yema yema, wakatatondoyaka ekakatanu w’endana l’ekongelo, ko ɔrdinatɛrɛ ɔmɔtshi w’endana la wɔtshiyelo w’afundelo, l’ɔlɔngɛlɔ awɔ l’akatshi ndo la okongelo w’ekanda oma lo fɔtɔ y’atɔtɔ wahɛnama, w’etama ɔnɛ: MEPS, wakatombe. Lɔkɔ, wakakongɛ otsha lo yɛdikɔ y’ɛtɛkɛta 210. Ndo ekina kokaka kotshama nto.

Ɛlɔ kɛnɛ ɔrdinatɛrɛ w’elɛwɔ ɔnɛ: MEPS, wakasalema, vɔ wakasalema oma le Ɛmɛnyi wa Jehowa ndo wekɔ lo kambema olimu lo wedja ɛmɔtshi 100, wedja ekina wayoyokondja ndo vɔ lawɔ. Akambi wakayakimɔ la lolango lawɔ wakaye oma lo wedja ɛsɔ wakahilwama dia kambaka ndo dia kokɛka mashinyi ɛsɔ. Ɛlɔ kɛnɛ la Société ekɔ lo tondja periodikɛ l’ɛtɛkɛta olekanyi 115 lo wedja 33, ndo lo wedja etanu wa l’atei a wedja ɛsɔ wekɔ lo funda ndo ekanda wokakatani ndo Bible.

Pombaka olui w’anto dia lutumu la ngasɔ salema​—⁠afundi, akadimudi, anɔngɔsɔdi wa dikɔmɔ, anto watshindjiya mashinyi wa funda, anto wakakatanya ekanda la wanɛ walɔnga ekanda. Akina wekɔ l’ɔkɛndɛ wa fundanɛka mikanda vɔ la tshumanelo. Amɔtshi wekɔ l’ɔkɛndɛ wa tondjaka mbo ya ndɛ, wa katɛka diangɔ dia ndɛ, wa mɔmbaka ngelo, wa solaka ahɔndɔ, l’akambo akina. L’oseka wodja tshɛ, akambi wayakimɔ la lolango lawɔ mbasala elimu ɛsɔ tshɛ. Lo 1993, l’andja w’otondo, anto 13 828 wakayakimɔ la lolango lawɔ mbakakambe lo bilɔ, lo tândjo t’ofundelo, lo pango y’edjaselo la lo toshamba taki la Société.

Anto asɔ wâ na wewɔ na? Vɔ wele apami, amato, enyemba, atshukani, epalanga, vɔ tshɛ wele Ɛmɛnyi wamboyakimɔ le Jehowa. Amɔtshi wamboyakimɔ l’olimu ɔsɔ ay’edja k’ɛnɔnyi 40, 50 ndo 60. Lo katikati ka yɛdikɔ ya tshitshɛ, vɔ kimɔka wenya 44 lo lomingu, kana ndekana naka ekɔ ohomba, l’olimu wakawawasha. Akɔlɔ la nshi y’ekomelo ya lo lomingu namemaka lo esambishelo ka lokumu l’ɔlɔlɔ lo luudu la luudu ndo l’elimu ekina wa lo etshumanelo.

L’andja w’otondo akambi asɔ wekɔ la edjaselo ka kiɔmi ndo ndɛ̂ka elelo wakiwɔ lo pango y’edjaselo yaki la Société, y’etawɔ ɔnɛ Bɛtɛlɛ. Ndo vɔ nongolaka yema y’ekimanyielo ka tshitshɛ dia wêteto awɔ ndo di’ehomba awɔ w’onto l’onto.

Tatɛ oma lo 1920, akambi asɔ wakayakimɔ la lolango lawɔ wakatondja olekanyi miliyara divua ya Bible, y’abuku, ya periodikɛ ndo ya tubukubuku l’ɛtɛkɛta olekanyi 200 wakahandjɔnɛ l’andja w’otondo. Vɔ wekɔ lo sala la weolo awɔ dia lokumu l’ɔlɔlɔ sambishama oko evanjiliyɔ le wedja tshɛ ndo le waoho w’anto tshɛ ndo le anto w’ɛtɛkɛta tshɛ ndo le weoho w’anto tshɛ.​—⁠Enyelo 14:​6, 7.

• Dihomɔ diakɔna diele la yândjo y’ofundelo yaki la Société Watch Tower, ndo lande na?

• Wâ na wasala lotumu lɔsɔ tshɛ, ndo woho akɔna wasɛna anto asɔ na?

[Esato wa lo lɛkɛ 24]

Anto wakayakimɔ la lolango lawɔ wakamba lo yândjo y’ofundelo, lo pango y’edjaselo, lo bilɔ ndo lo shamba, la Brooklyn ndo la Wallkill, New York, U.S.A., elimu ɛsɔ kakatana la otondjelo w’ekanda w’endana la Bible

[Esato wa lo lɛkɛ 25]

Anto wakayakimɔ la lolango lawɔ wakamba elimu wotshikitanyi w’ɛlɛnganɛ tɔ̂ kana lo yoho kina l’otondjelo wa Bible ndo w’ekanda w’endana la Bible

Espagne

Allemagne

Finlande

Canada

Danemark

Suède

Afrique du Sud

Brésil

Pays-Bas

Australie