Yimba ya ndjâkimɔ la lolango mbelaka ɛtshɔkɔ
1. Ngande wakakɛnɛmɔla Davidi la Nehemiya yimba ya ndjâkimɔ la lolango?
1 Etena kakadjaka Ngɔliyatɛ alembe w’ase Isariyɛlɛ tɔfwɛfwɛ, ndoko ɔsɔlayi wakayakimɔ la lolango dia ndɔ la nde. Koko, ɔna pami ɔmɔtshi laki olami w’ɛkɔkɔ ndo laki kombeka awui w’ata akayakimɔ la lolango lande dia ndɔ la nde. (1 Sam. 17:32) Etena kakakalola ase Juda waki lo lɔhɔmbɔ la Jerusalɛma ndo kakawahekɔ nyomoka mpele diayɔ, onto lakangolɛka nkumekanga ka Pɛrɛsiya wanu mbakayakimɔ la lolango dia tshika dihole diande dia lokumu lo mbalasa ka nkumekanga dia ntshɔ la Jerusalɛma dia tokongɛ olimu ɔsɔ. (Neh. 2:5) Jehowa akatshɔkɔla anto asɔ, mbuta ate Davidi la Nehemiya l’ɔtɛ wa yimba ya ndjâkimɔ yakawakɛnɛmɔla.—1 Sam. 17:45, 50; Neh. 6:15, 16.
2. Lande na kahomba Akristo kɛnɛmɔla yimba ya ndjâkimɔ la lolango?
2 Nshi nyɛ, yimba ya ndjâkimɔ la lolango yaya bu l’andja ɔnɛ. Lo “nshi y’ekumelu” nyɛ, anto wekɔ l’awui efula wa sala ndo anto efula wekɔ lo ‘ndjalanga.’ (2 Tim. 3:1, 2) Kema wolo dia onto ndjasha tshɛ l’akambo ande hita ko minya yimba lo waaso wakokande ndjâkimɔ la lolango lande etena konga ohomba wa kimanyiya anto akina. Koko, oko weso Akristo, sho kombolaka mbokoya Yeso lakɔshi yɛdikɔ ya kimanyiya anto akina. (Joa. 5:5-9; 13:12-15; 1 Pet. 2:21) Ngande wakokaso kɛnɛmɔla yimba ya ndjâkimɔ la lolango, ndo ɛtshɔkɔ akɔna wayotokondja?
3. Ngande wele yimba ya ndjâkimɔ la lolango kimanyiyaka dia nsanganya ya l’etshumanelo mbeta dimɛna?
3 Lo wahɔ wa anangɛso: Sho kokaka mbisha anto akina “ushasha omotshi wa nyuma” lo ndjâkimɔ la lolango dia mbisha kɔmatɛrɛ lo asawo wa lo losanganya wa ɔkɛtshanyelo la ampokami. (Romo 1:11) Mbisha kɔmatɛrɛ tombolaka Jehowa, kɔkɔmiyaka akambo wa mɛtɛ lo yimba ndo l’etema aso, ndo ndekaka mbetɛ nsanganya yaso ɔlɔ. (Osam. 26:12) Sho koka nto ndjâkimɔ la lolango dia mbisha sawo lo Kalasa k’olimu wa teokrasi etena konga onto lakadilongola bu suke. Dui sɔ diayotokimanyiya dia sho ndowanya dikoka diaso dia mbetsha.
4. Naa toho tɔmɔtshi tokina takokaso kɛnɛmɔla yimba ya ndjâkimɔ la lolango?
4 Anangɛso koka kɛnɛmɔla yimba ya ndjâkimɔ la lolango lo nyanga dia mɛmba ɛkɛndɛ l’etshumanelo. (Is. 32:2; 1 Tim. 3:1) Anto tshɛ koka mbisha lonya dia nsanganya ya weke mbeta dimɛna lo ndjâkimɔka la lolango dia kamba lo adepartɛma wotshikitanyi. Etena kayakimɔyɛ la lolango dia sambisha la omendji weteta kana dia mbosha yangɔ ya ndɛ, dui sɔ nyokimanyiyaka dia nyu ‘keketshanya.’ (Romo 1:12) Etena kayakimɔso dia kimanyiya ana wa tshike, wadi waki edo, ase hemɔ la akanga wa dikɔmɔ, wamato wele la ana w’akɛnda ndo anto akina wa l’etshumanelo, sho mongaka l’ɔngɛnɔngɛnɔ ndo mbetawɔmaka le Jehowa.—Tuk. 19:17; Etsha 20:35.
5. Naa akambo wendana la Mbalasa ya Diolelo walɔmbama dia anto ndjâkimɔ la lolango?
5 Yoho kina yakokaso kimɔ wenya aso ndo welo aso ele lo mbishaka lonya lo ɔlɔngɔswɛlɔ ndo osolelo kana wɔmbɛlɔ wa Mbalasa ka Diolelo. Ndo nto, lam’ele anto efula wekɔ lo mbɔtɔ l’okongamelo wa Jehowa, ohomba wa Mbalasa ya Diolelo nkina ndo w’anto wayakimɔ la lolango dia ndjika wekɔ efula. Atshukanyi amɔtshi wakayakimɔ la lolango dia kimanyiya Kɔmite ka wokelo ka l’ɛtshi kawɔ ka nkɛtɛ kânga mbakiwɔ komonga la diewo l’awui wa wokelo. L’ɔkɔngɔ diko, atshukanyi asɔ wakayekaka akambo efula ndo ɛlɔ kɛnɛ vɔ wekɔ lo mbisha lonya lo osalelo wa atafadi. Wadi akate ate: “Kamba l’anto akina dihɛka lo dihɛka akayokonya dia sho monga la lɔngɛnyi l’oshika lam’asaso la wɔ. La dikɔlɔ, alemba aso nɛmbaka koko sho mongaka la wolo lo nyuma.”
6. Lande na kele esambishelo olimu woleki ohomba wakokaso ndjâkimɔ la lolango dia kamba?
6 Lo sambishaka: Olimu woleki ohomba wakokaso ndjâkimɔ la lolango lɔkɔ ele olimu w’esambishelo ka Diolelo. Etena kakimanyiyaso anto dia vɔ shihodia ndo kamba la alako wa lo Bible, nsɛnɔ yawɔ mongaka l’oyango ndo vɔ kondjaka wolo wa tshika mbekelo ya kɔlɔ. Vɔ ndjeyaka elongamelo ka diambo kasha Bible lo kɛnɛ kendana la nshi yayaye. Lo mbetsha anto Bible, sho ndjâkimɔka la lolango ndo l’ɔngɛnɔngɛnɔ tshɛ l’olimu wela ɛtshɔkɔ wa pondjo. (Joa. 17:3; 1 Tim. 4:16) Ondo sho koka monga la diaaso dia ndjasha efula l’olimu ɔsɔ lo kamba oko ombatshi mboka wa tshanda kana wa pondjo, lo ntshɔ tokamba lɛnɛ ele ohomba efula, kana lo mbeka ɔtɛkɛta okina.
7. Lande na kele ndjâkimɔ la lolango ekɔ ohomba efula djekoleko nshi nyɛ?
7 Nkumekanga Davidi akatatshi dia lo nshi yakahombe Mɛsiya tatɛ la mbolɛ, ekambi waki Nzambi “wayuyakimo [la lolango].” (Osam. 110:3) Etena kɛnɛ kambosala Jehowa dia dinela dia lo nyuma di’ekomelo salema esadi esadi, olimu wekɔ efula wahomba anto ndjâkimɔ la lolango dia kamba. (Is. 60:22) Onde wɛ ambotaka wate: “Dimi one, utumi”? (Is. 6:8) Lo mɛtɛ, lo kɛnɛmɔla yimba ya ndjâkimɔ la lolango, sho ngɛnyangɛnyaka Jehowa ndo kondjaka ɛtshɔkɔ.