Tshapita 30
Kene Kahombaye Sala dia Monga la Loseno la Pondjo
1. (a) Mboka hiende yakona yambodihwama la ntondo kaye na? (b) Woho akona wokukiye sona mboka k’ololo na?
JEHOWA NZAMBI ambokitsha engo kemotshi ka diambo efula la ntondo kaye—loseno la pondjo lo dikonge diande di’oyoyo di’akambo wa losembwe. (2 Petero 3:13) Koko dia kondja loseno lako, tatɛ kakiane, we pombaka sala lolango la Nzambi. Andja wa kolo one, kame ndo wane watetemala la ndjatshuha l’akambo wa loko, weko suke la dimana, “koko one la ntsha lolango la Nzambi ayotshikala pondjo.” (1 Joani 2:17, NW) Omaloko, we pombaka sonola lasa mboka hiende nye. Kemotshi mbediyaka otsha lo nyoi, ndo kekina otsha lo loseno la pondjo. (Ehwelo k’Elembe 30:19, 20) Mboka kakona kayôsonola na?
2. (a) Naka we eko la mbetawo ka mete, dia dikambo diakona diayohomba kitshiya na? (b) Woho akona wele ndjasha kaye le Nzambi oko atoyashaka ona otsha le she ka ngandji ayokokimanyia dia we mbokambe na?
2 Woho akona way’ɛnya one loseno mbambôsonola na? La ntondo k’akambo tshe, we pombaka monga la mbetawo le Jehowa ndo lo alaka ande. Onde we ambetawo mete one Nzambi eko ndo “ndi keli ufutshi a wane watûyangaka”? (Heberu 11:6) Yasha le Nzambi kana sholɛnde otema oko atoyashaka ona le ombutshi ande wa ngandji ndo w’okana ketshi. (Osambu 103:13, 14; Tokidi 3:11, 12) Naka we monga la woho a mbetawo ka ngaso, kete we hodja tamu dia alako ande wa lomba mbewo kana one mboka yande ya losembwe mbeyo, oyadi kânga we hahoto akambo ako ololo wonya ako wame.
3. (a) Ladiko dia mbetawo, naa engo kekina kele ohomba na? (b) Wetshelo akona ahombaye kotsha dia we menya one loseno mbambôsonola na?
3 Koko, eko akambo akina efula wahombama ladiko dia monga la mbetawo. Tɔ pombaka menama oma l’etsha kana mete asolo aye le Jehowa mbahemiwo. (Jakoba 2:20, 26) Onde we akatshe akambo amotshi dia menya one we akayakiyanya dia munga yaye yak’ete woho wa ntsha akambo w’ololo oka? Onde we akashile la ndjatshumuya kana akakadimola otema dia eongelo kaye mbotone la lolango laki Jehowa oka? Onde we akakadimo, kana akatshike etshelo aye wa kolo wa ntondotondo woho wa sala akambo walomba Nzambi oka? (Etsha 3:19; 17:30) Weoho w’etshelo wa ngaso ayohomba menya dia loseno mbambôsonola.
NDJAKIMO LA TSHONDO NDO BATISMU
4. (a) Kakona kahomba kosokoya dia we ntsha lolango la Nzambi na? (b) Etena kahomeye ntolo wate: we nangaka kambe Nzambi, kakona kele ololo sala na?
4 Kakona kahomba kosokoya dia we sala lolango laki Nzambi na? Lowando. Ohotokokanyia yema: Jehowa akose tediko dia kokokɛ oma lo hemo, oma lo asui ndo oma lo nyoi! Oma l’ekimanyielo ka losha l’Onande, nde ambokolaka loseno la pondjo lo paradiso ka la kete. (1 Koreto 6:19, 20; 7:23; Joani 3:16) Etena kakosokoya lolango laki Jehowa dia we lawo nto mbolanga, ayôhomba sala na? (1 Joani 4:9, 10; 5:2, 3) Pombaka we ndjasukanya la Nzambi lo lokombo laki Yeso ndo mbotɛ lo dombelo wate: lolango laye ele dia mbokambɛ ndo monga onto ande. Onkoso mbayakimo onto ndameme la tshondo le Nzambi. Oso eko dikambo diak’enda wememe, dikambo dia osheshe. Ndoko onto okina lahomba tshiba dokoloko so lo lokombo laye.
5. (a) L’okongo a we ndjakimo la tshondo le Nzambi, kakona kayondokonge dia we ntsha na? (b) Ekimanyielo kakona kayohomba kondja dia we shidiya daka diaye na?
5 L’okongo a we ndjakimo la tshondo le Nzambi, nde ayôkongɛ dia we kotsha dokoloko diako. Omaloko, enya one we eko onto lâta akambo ndo l’akotsha lo shidiya kana lo kotsha la kolamelo tshe daka diaye lo loseno laye l’otondo. (Osambu 50:14) Naka we mamema l’olongoswamelo waki Nzambi w’enama, kete w’ayokondja ekimanyielo ndo ekeketshelo ka ngandji la k’ongenongeno oma le Akristo a wanyaye.—1 Tesalonika 5:11.
6. (a) L’okongo a we ndjakimo la tshondo le Nzambi, wanya akona wayohomba takula na? (b) Batismu kedikedi na?
6 Koko, eko akambo akina wahombaye ntsha ladiko dia we mbute Jehowa lo osheshe one we nangaka monga onto ande. We pombaka menya la ntondo k’akina one we amboshila la ndjakimo la tshondo dia kambe Nzambi. Woho akona ayôdisala na? Lo batizama lo ashi. Batismu kako ka l’ashi keso eko enyelo ka lo seke k’enya one obatizami akakimo loseno lande l’otondo le Jehowa ndo amboyaenya ndameme dia ntsha lolango Lande.
7. (a) Enyelo kakona kakasha Yeso Akristo na? (b) Lande na kele batismu kakatonge Yeso h’endana l’ana w’ashashi kana watotshitshe na?
7 Batismu kako ka l’ashi eko dikambo di’ohomba efula oko w’enyamadio oma lo enyelo kaki Yeso Kristo. Yeso kombute Ombutshi ande l’onyo oto one nde akaye dia ndjosala lolango Lande. (Heberu 10:7) Etena kakinde suke la tatɛ olimu ande oko opandjudi a diolelo diaki Nzambi, Yeso akayaenya ndameme la ntondo kaki Jehowa ndo akabatizama lo ashi. (Mateu 3:13-17) Lam’ele Yeso akasha enyelo, wane wayakimo ɛlɔ kene l’etondo awo le Jehowa dia ntsha lolango lakinde pombaka vo lawo batizama. (1 Petero 2:21; 3:21) Lo mete, Yeso akasha ambeki ande okende wa vo mbetɛ anto a lo wedja tshe ambeki ndo mbâbatiza. Aha dikambo dia batiza ana a totshitshe kana w’ashashi mbatama lane. Eko batismu k’anto wamboshila la koma ambetawudi ndo wakashile la pomɛ tolo yawo dia vo kambe Jehowa.—Mateu 28:19; Etsha 8:12.
8. Endaka we nangaka nongola batismu, onto akona la l’atei w’etshumanelo layote dikambo so, ndo lande na?
8 Naka w’amboshila la tshiba l’otema aye otoyi dia kambe Jehowa ndo nangaka batizama, kakona kayohomba ntsha na? Ewoya omendji walombola etshumanelo k’Emenyi waki Jehowa kasanganaye. Nde, kame ndo dikumanyi dikina dia l’etshumanelo, wayonga l’ongenongeno wa nyomenda kana mbohola laye kame wetshelo wahombaye mbeya dia we kambe Nzambi woho wa dimena. L’okongo diko, tediko tayosama dia we nongola batismu.
KENE KAKOLOMBA NZAMBI ƐLƆ KENE
9. Noa akandasale la ntondo ka Mvula k’elola, olimu wele Nzambi kombolaka dia we sala ɛlɔ kene na?
9 La ntondo ka Mvula k’elola, Jehowa akayakimanyia la Noa, “umvutshi w’akambu w’ololo,” dia mbewoya elanyelo kakahombe ndja ndo menya mboka otoyi ka panda kakiko, wato a luudu. (Mateu 24:37-39; 2 Petero 2:5; Heberu 11:7) Lolango la Nzambi ele dia we sala woho ako wame w’olimu wa sambisha kakiane. Yeso akewoya edja la ntondo dia nshi yaso nye ate: “Lukumu l’ololo la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.” (Mateu 24:14) Dia vo mbika l’ekomelo ka dikonge di’akambo ne ndo monga la loseno la pondjo, anto akina pombaka mbeya akambo wakayeke w’endana l’eyango waki Nzambi. (Joani 17:3) Onde otema aye hakosokoya dia we mbewoya anto akina mboka ka loseno?
10. (a) Ngandji otsha le wanyaso pombaka tosokoya dia sho ndjela enyelo kakona kaki Yeso na? (b) Tena efula olimu w’osambishelo salemaka woho akona?
10 Yela enyelo kaki Kristo. Nde kôkonga di’anto mbokɛndɛ, koko nde akatshu l’oyango w’anto ane waki l’akoka wa nonga lukumu la Diolelo. Ndo nde akalakanya ambeki ande—vo tshe—dia sala woho ako wame. (Mateu 28:19; Etsha 4:13; Romo 10:10-15) Lo ndjela awui wakâfundɛ Kristo ndo enyelo kande, Akristo wa ntondo waki lo kɛndɛ anto lo wa mvudu yawo. Waki lo tsho “lu luudu la luudu” wele la lukumu la Diolelo. (Luka 10:1-6; Etsha 20:20) Ɛlɔ kene, Akristo wa mete wakambako olimu awo woho ako wame.
11. (a) Lande na kele pombaka monga l’otema wolo dia sambisha Diolelo diaki Nzambi, ko lande na k’eso hatokoke mboka woma na? (b) Woho akona w’osa Jehowa olimu wakambaso na?
11 Pombamaka monga l’otema wolo dia kamba olimu ako. Satana la andja ande wayoyanga woho wa koshimba di’aha we kamba olimu ako oko akawahembaka dia shimba ambeki waki Kristo wa l’eleko ka ntondo. (Etsha 4:17-21; 5:27-29, 40-42) Koko, tôkake woma. Oko akandakimanyia ndo keketsha Akristo wa ntondo, Jehowa ayosala woho ako wame oya leyɛ ɛlɔ kene. (2 Timote 4:17) Omaloko, keketsha otema! Enya ngandji kaye otsha le Jehowa ndo otsha le anyaye anto lo ndjasha l’otondo aye tshe l’olimu a wotshêlo, wa sambisha ndo wa ndakanya. (1 Koreto 9:16; 1 Timote 4:16) Jehowa hôhɛ olimu aye, koko ayokosha difuto dia woke efula.—Heberu 6:10-12; Tito 1:2.
12. Naa wetshelo wahombaso kime oma lo enyelo kaki wadi a Lota na?
12 Ndoko engo koleki ohomba kakoka dikonge di’uvusu ne kosha, omaloko, tshindjadio l’okongo ndo tokiyanake kânga yema dikambo dia dio. Yeso akate ate: “Nyuho wadi a Lota.” (Luka 17:32) L’okongo wa nde ndawo oma la Sodomo kame la nkumbo kande, nde akɛwo l’okongo oma lo okiyanu wa diango diakawatshike. Nzambi ak’enyi lene aki otema ande, ko nde akakumi ekundji ka lɛhɔ. (Etatelo 19:26) Tôngake oko wadiaki Lota! Kitsha asho aye l’akambo wele la ntondo, lo “loseno la mete” lo dikonge diaki Nzambi di’oyoyo ndo dia losembwe.—1 Timote 6:19.
SONOLA LOSENO LA PONDJO LO PARADISO KA LA KETE
13. Woho akona wak’enya Yeso shonodi nye yele la ntondo kaso sho tshe na?
13 Lo mete, mboka hiende tsho mbêko. Kristo ak’enya di’otoyi a mboka mbahombama sonwama. Nde akate ate: kemotshi keko “wuki [ndo enanonano, NW].” Wane wakendakenda loko weko lo ntsha woho tshe walangawo. Kekina keko “tshitshe.” Eelo, wane wakendakenda loko pombaka kitanyia awui ndo elembe a Nzambi. Yeso akate ate: efula k’anto lo mboka ka woke mbêwo; paka anto tshitshe ato mbasonola kene ka tshitshe. Ko we, mboka kakona kayôsonola na? La ntondo ka we sonola, tohɛke dikambo ne: mboka ka woke ayokome lo elanyelo ka—shashimoya! Lo wedi okina, mboka ka tshitshe ayokotola polo ndo lo dikonge diaki Nzambi di’oyoyo. Leko, we ayokoka mbisha lonya laye l’olimu wa kadimola kete k’otondo paradiso lene ayônga la loseno la pondjo ele l’atei atei w’ongenongeno.—Mateu 7:13, 14.
14. Lo na ahombaye monga woho a we kondja diaaso dia mboto lo dikonge di’oyoyo diaki Nzambi na?
14 Tokanake wate etadimbo kana mboka efula yotshikitanyi yokukiye ndjela woho a we kondja loseno lo dikonge diaki Nzambi di’oyoyo yeko. Otoyi a mboka oto mbêko. Aki paka wato a luudu otoyi oto mbakake lo Mvula k’elola, aha wato efula. Ndo ayonga paka olongoswamelo wame oto—olongoswamelo waki Nzambi w’enama—mbayoka lo “fono ka wulu” kene kaya suke efula. Eko kashi ka mamba dia mbuta one: etemwelo tshe kumiyaka l’oyango ako wame. (Mateu 7:21-23; 24:21) Dia kondja loseno la pondjo, pombaka we monga l’atei w’olongoswamelo waki Jehowa ndo ntsha lolango laki Nzambi.—Osambu 133:1-3.
15. (a) Kakona kahombaso salaka oseka lushi tshe na? (b) Dikongelo diakona diele aha dɔ mbediɔ na?
15 Omaloko, omba wenya tshe lo lomba laye ndo l’atei w’otema aye dedi dia dikonge di’akambo w’oyoyo diatolaka Nzambi. Lushi tshe, kanyiaka lo kene k’endana la difuto dia woke diambokômbɛ Jehowa Nzambi ne—monga la loseno la pondjo lo Paradiso ka la kete. Aha dɔ mbelɔ. Mete mbelɔ! Ne dia daka dia lo Bible ne diayokotshama l’ololo tshe: “Antu w’ololo wayukita kete, Wayudjaseka loko pundju. . . . We ayena lam’ayunyema antu wa kolo.”—Osambu 37:29, 34.
[Diombwɛlo di’osato wa lo lɛkɛ 251]
Yakimo la tshondo yaye le Jehowa . . . ndo longola batismu
[Diombwɛlo di’osato wa lo lɛkɛ 253]
“Nyuho wadi a Lota”
[Diombwɛlo di’osato wa lo lɛkɛ 254]
Omba wenya tshe lo lomba laye ndo l’otema aye dedi dia dikonge di’oyoyo diatolaka Nzambi