Tshapita 18
Yadjɛ Oyango Wa Kambɛ Nzambi Pondjo Pondjo
1, 2. Kakɔna kalɔmbama lâdiko dia kondja ewo ka Nzambi?
OHOKANYIYA dia wɛ memala la ntondo ka soko dia luudu lɔmɔtshi lodihami lele l’ekundji efula. Tɔ̂shi dia onto ɔmɔtshi lele la lɔkɛlɛngɛ lâdiko dia diangɔ diakɔ ambokosha sapi ko ambokotɛ dia wɛmɛ ndjakimanyiya woho wa wɛ mbɔtɔ dia tɔ̂sa diangɔ sɔ di’ohomba efula. Sapi kɛsɔ hatokosalɛ ndoko dikambo di’ɔlɔlɔ naka wɛ hakambi latɔ. Woho akɔ wâmɛ mbahombayɛ kamba la ewo naka wɛ nangaka tɔ kokundjiyɛ ɛlɔlɔ.
2 Dikambo sɔ diekɔ mɛtɛ, djekoleko lo kɛnɛ k’endana la ewo ka Nzambi. Mɛtɛ, ewo k’oshika ka Jehowa Nzambi la ka Yeso Kristo kɛdikɛdi lɔsɛnɔ la pondjo. (Joani 17:3) Koko, elongamelo kɛsɔ hakoke kotshama le yɛ paka l’ɔtɛ w’ɔnɛ wɛ ekɔ la ewo. Wɛ pombaka kamba la ewo ka Nzambi lo lɔsɛnɔ layɛ oko onto lakamba la sapi k’ohomba efula. Yeso akate ɔnɛ wanɛ wasala lolango la Nzambi ‘mbayɔtɔ lo diolelo.’ Anto wa ngasɔ mbayokondja diɛsɛ dia kambɛ Nzambi pondjo pondjo!—Mateu 7:21; 1 Joani 2:17.
3. Kakɔna kele lolango la Nzambi le so?
3 L’ɔkɔngɔ wa mbeka ɔnkɔnɛ wele lolango la Nzambi, ekɔ ohomba lisala. Oko le yɛ, lolango la Nzambi lo dikambo diayɛ kɛdikɛdi na? Lɔ kokaka mbutama lo tshena pe l’ɛtɛkɛta ɛnɛ: Dia wɛ mbokoya Yeso. Mukanda wa Ntondo wa Petero 1Pe 2:21 totɛka ɔnɛ: “Nyu nyaketama dia dikambu diako, ne dia Kristu akanyusuwela, akanyutshikela djimbitelu, dia nyu mbuyela lu wanya andi.” Lâsɔ, dia wɛ sala lolango la Nzambi, wɛ pombaka ndjatshutshuya dia ndjela ɛnyɛlɔ ka Yeso lo nna ndo lo nna. Woho ɔsɔ mbayoyokamba la ewo ka Nzambi.
WOHO WAKAKAMBE YESO LA EWO KA NZAMBI
4. Lande na keya Yeso akambo efula w’endana la Jehowa, ndo woho akɔna wakandakambe la ewo kɛsɔ?
4 Yeso Kristo ekɔ la ewo k’oshika ka Nzambi oleki anto akina tshɛ. Nde aki la lɔsɛnɔ ndo akakambaka kâmɛ la Jehowa Nzambi l’olongo l’edja ka deko diaheyama ndo mbadia la ntondo ka nde ndjoya lanɛ la kɛtɛ. (Kolosai 1:15, 16) Kakɔna kakasale Yeso la ewo kɛsɔ tshɛ na? Nde kɔngɛnangɛnaka paka dia monga la ewo kɛsɔ keto. Yeso akayaɔtɔnganyiyaka latɔ. Diɔ diakɔ diakinde la wɔlamu, la lotutsha, ndo la ngandji le anyande anto. Ɔsɔku mbakokoyaka Yeso She le l’olongo ndo mbakandayaɔtɔnganyiyaka la ewo ka mboka ya Jehowa ndo ka lonto lande.—Joani 8:23, 28, 29, 38; 1 Joani 4:8.
5. Lande na kakalongola Yeso batismu, ndo woho akɔna wakandayaɔtɔnganyiyaka la kitshimudi ya batismu kande?
5 Ewo kaki la Yeso kakotshutshuya nto dia nde takula nna dimɔtshi di’ohomba efula. Nde akaye oma la Ngalileya oya l’Ɔkɛdi wa Jɔrɔdana, lɛnɛ akandayobatizamaka le Joani. (Mateu 3:13-15) Kakɔna kakalembetshiyaka batismu ka Yeso? Oko wakinde Ose Juda, nde akotɔ l’atei a wodja wakayakimɔ le Nzambi. Ɔnkɔnɛ, Yeso akayakimɔ le Nzambi oma k’eotwelo kande. (Etumbelu 19:5, 6) Lam’akandalongola batismu, Yeso akayaɛnya la ntondo ka Jehowa dia nde sala lolango la Nzambi lakendanaka lande l’etena kɛsɔ. (Heberu 10:5, 7) Ndo, Yeso akayaɔtɔnganyiyaka la kitshimudi ya batismu kande. Nde akayashaka l’olimu wa Jehowa, akakahanaka l’anto ewo ka Nzambi lo tena tshɛ diakandakondjaka diaaso. Yeso akangɛnangɛnaka sala lolango la Nzambi, ndo nde akate ɔnɛ lɔ mbaki oko mma diande.—Joani 4:34.
6. Lo yoho yakɔna yakayasɛkɛ Yeso ndamɛ?
6 Yeso akashihodia ɔnɛ sala lolango la Jehowa komonga dikambo dia tshitshɛ—aki dikambo diakahombe mboshishɛ ndo lɔsɛnɔ lande. Kânga mbakidiɔ ɔsɔku, Yeso akayasɛkɛ, akadje ehomba ande ndamɛ lo dihole dia hende. Osalelo wa lolango la Nzambi mbaketaka nshi tshɛ lo dihole dia ntondo. Woho akɔna wakokaso mbokoya ɛnyɛlɔ ka kokele kaki Yeso lo dikambo sɔ na?
WANYA WATƆLA ONTO OTSHA LO LƆSƐNƆ LA PONDJO
7. Naa wanya amɔtshi wahomba onto takula dia nde monga l’akoka wa nongola batismu?
7 Otshikitanyi la Yeso, sho kema kokele ndo sho kokaka takula nna di’ohomba efula dia batismu paka l’ɔkɔngɔ wa sho takula wanya akina w’ohomba efula. Dikambo sɔ tatɛka oma lo mbidja ewo k’oshika ka Jehowa Nzambi la ka Yeso Kristo l’atei w’etema aso. Lam’ayotosala ngasɔ, dikambo sɔ diayototshutshuya dia sho monga la mbetawɔ ndo ndjâla la ngandji ka Nzambi k’oma k’ɛse otema. (Mateu 22:37-40; Romo 10:17; Heberu 11:6) Okitanyiyelo w’ɛlɛmbɛ wa Nzambi, adjango ande, l’awui ande pombaka totshutshuya dia sho ndjatshumuya, lo monga la lɔkɔnyɔ lɔtɔnɛ la lolango la Nzambi lo dikambo dia pɛkato yaso ya lo nshi yakete. Dikambo sɔ mbatɔla onto lo nde kadimola otema, mbuta ate, mboka ɔkɔngɔ kana sɛka dionga dimɔtshi dia kɔlɔ diaki lande lam’akinde atayala la ewo ka Nzambi. (Etsha 3:19) Mɛtɛ, naka tekɔ lo tetemala sala pɛkato mɔtshi lo woshɛshɛ lo dihole dia sho sala kɛnɛ kele ɔlɔlɔ, kete mɛtɛ tatoke ditshelo dia kɔlɔ ɔkɔngɔ, ndo tatokanake ɔnɛ tekɔ lo kesa Nzambi. Jehowa mɛnaka woho tshɛ wa ditshelo dia dungi pende.—Luka 12:2, 3.
8. Kakɔna kahombayɛ sala naka ndo wɛ lawɔ nangaka kamba olimu w’esambishelo ka Diolelo?
8 Etena kɛnɛ, lam’ele wɛ ambokondja ewo ka Nzambi, onde kema ɔlɔlɔ wɛ sɛdingola akambo amɔtshi wa lo nyuma lo kɛnɛ k’endana layɛ wɛmɛ? Ondo wɛ ekɔ la mposa k’efula ka mbewoya ewotɔ ayɛ, angɛnyi ayɛ, ndo anto akina kɛnɛ kekayɛ. Mɛtɛ, ondo wɛ ambotatɛka sala dikambo sɔ, oko wakewoyaka Yeso lokumu l’ɔlɔlɔ le anto akina lo tena diakandakondjaka lo tshakitudi. (Luka 10:38, 39; Joani 4:6-15) Kakianɛ, ondo wɛ nangaka nyomosala awui efula. Dikumanyi di’Akristo diayɔngɛnangɛna sawola layɛ dia vɔ mbeya dia kana wɛ ambokotsha waonga walɔmbama ndo aya l’akoka wa, ndo wɛ lawɔ, kamba olimu w’esambishelo ka Diolelo wakamba Ɛmɛnyi wa Jehowa mbala la mbala. Naka wɛ ambokoka, kete dikumanyi diayɔsa tɛdikɔ tɔmɔtshi lo dikambo diayɛ dia wɛ tshindɛ Ɔmɛnyi ɔmɔtshi l’olimu w’esambishelo. Ambeki wa Yeso wakayelaka alako ande dia vɔ kotsha olimu awɔ lo yoho yele l’ekongelo. (Mako 6:7, 30; Luka 10:1) Wɛ ayokondja ekimanyielo ka ngasɔ lam’ayoyosambishaka losango la Diolelo lo luudu la luudu ndo lo weoho ekina.—Etsha 20:20, 21.
9. Woho akɔna wayakimɔ onto le Nzambi, ndo woho akɔna wasɛngiyama lɔsɛnɔ l’onto oma lo ndjakimɔ kande le Nzambi?
9 Sambisha lokumu l’ɔlɔlɔ le weoho w’anto tshɛ wa lo mbilo k’etshumanelo ekɔ yoho mɔtshi yakokayɛ tana anto w’etema ɛlɔlɔ ndo ekɔ ɔtɔi ɔmɔtshi w’elimu w’ɛlɔlɔ wɛnya ɔnɛ wɛ ekɔ la mbetawɔ. (Etsha 10:34, 35; Jakoba 2:17, 18, 26) Wɔtwɛlɔ ayɛ lo sanganya mbala la mbala ndo otombelo ayɛ l’olimu w’esambishelo esangɔ efula ekɔ nto weoho ɛmɔtshi wakokayɛ mɛnya ɔnɛ wɛ ambokadimola otema ndo amboka ditshelo dia kɔlɔ ɔkɔngɔ ndo amboyashikikɛ dia ndjaɔtɔnganyiya la ewo ka Nzambi. Nna diakɔna diasungana diahombayɛ takula oma lâsɔ na? Ele ndjâkimɔ le Jehowa Nzambi. Dikambo sɔ nembetshiyaka ɔnɛ: wɛ ambotɛ Nzambi, lo dɔmbɛlɔ di’oma ka tshina di’otema, ɔnɛ wɛ nangaka, la lolango layɛ tshɛ ndo l’otema ayɛ tshɛ, mbosha lɔsɛnɔ layɛ ndo sala lolango lande. Ɔsɔ mbele yoho yakokayɛ ndjakimɔ le Jehowa ndo mbetawɔ lɔkɔhɔ la wɔlamu la Yeso Kristo.—Mateu 11:29, 30.
BATISMU—KITSHIMUDI YATƆ LE YƐ
10. Lande na kahombayɛ nongola batismu l’ɔkɔngɔ a wɛ ndjakimɔ le Jehowa?
10 Lo ndjela kɛnɛ kakate Yeso, wanɛ tshɛ wayala ambeki ande pombaka batizama. (Mateu 28:19, 20) Lande na kele dikambo sɔ ohomba l’ɔkɔngɔ wa wɛ ndjakimɔ le Nzambi na? Lam’ele wɛ akayakimɔ le Jehowa, nde ayeya ɔnɛ wɛ mbôkaka ngandji. Koko, aha la tamu, wɛ ayolanga nyomotakula wanya akina dia wɛ mbewoya anto akina dikambo dia ngandji kokayɛ Nzambi. Eelo, batismu koshaka diaaso dia wɛ mɛnya lo asho w’anto tshɛ ɔnɛ wɛ amboyakimɔ le Jehowa Nzambi.—Romo 10:9, 10.
11. Batismu kɛdikɛdi na?
11 Batismu ekɔ l’elembetshiyelo efula wa didjidji. Etena kakotambiyawɔ l’ashi, kana “kakundamayɛ,” kɛdikɛdi ekɔ oko wɛ ambovɔ lo yoho yayɛ ya lɔsɛnɔ l’edjedja. Etena katopɔyɛ oma l’ashi, ekɔ oko wɛ ambotomba oya lo lɔsɛnɔ l’oyoyo, lɔsɛnɔ lɔlɔmbwami la lolango la Nzambi koko aha layɛ. Mɛtɛ, dikambo sɔ hadiɛnya ɔnɛ wɛ hatosala ndoko munga nto, nɛ dia sho tshɛ kema kokele, ndo diɔ diakɔ diasalaso pɛkato lushi la lushi. Koko, oko weyɛ okambi wa Jehowa wamboyakimɔ le nde ndo wambolongola batismu, wɛ ayonga la diokanelo dia lânde lam’asayɛ lande. Nɛ dia wɛ amboyatshumuya ndo ambolongola batismu la ndjakitshakitsha tshɛ, Jehowa mbetawɔka kodimanyiyɛ pɛkato yayɛ l’otema ɔtɔi oma l’ekimanyielo k’olambo waki Yeso w’etshungwelo. Ɔsɔku mbakonya batismu onto dia nde monga la nkum’otema ka pudipudi la ntondo ka Nzambi.—1 Petero 3:21.
12. Kakɔna kalembetshiya batizama (a) “lu lukumbu la Papa”? (b) ‘lo lokombo l’Ɔna’? (c) ‘lo lokombo la nyuma k’ekila’?
12 Yeso akadjangɛ ambeki ande dia vɔ batiza ambeki w’eyoyo “lu lukumbu la Papa ndu l’Ona ndu la [nyuma k’ekila, NW].” (Mateu 28:19) Kakɔna kakalange Yeso mbuta na? Batizama “lu lukumbu la Papa” mɛnyaka ɔnɛ onto lambolongola batismu mbetawɔka Jehowa Nzambi l’otema ande tshɛ oko Otungi ndo oko Omboledi wakoka w’andja w’otondo. (Esambu 36:9; 83:18; Undaki 12:1) Batizama ‘lo lokombo l’Ɔna’ nembetshiyaka ɔnɛ onto akɔ ambetawɔ Yeso Kristo—djekoleko olambo Ande w’etshungwelo—oko ehomɔ kakɔ ɔtɔi ka panda kakatosha Nzambi. (Etsha 4:12) Batizama ‘lo lokombo la nyuma k’ekila’ nembetshiyaka ɔnɛ onto lalanga nongola batismu mbɔsaka nyuma k’ekila kaki Jehowa, kana wolo wakamba olimu, oko ehomɔ kakamba Nzambi latɔ dia kotsha asangwelo Ande ndo dia mbisha ekambi Ande wolo wa vɔ sala lolango Lande l’osembwe, lo mbɔtɔnganɛ kâmɛ l’Ɔlɔngɔswamelo Ande walɔmbwama oma le nyuma Kande.—Etatelu 1:2; Osambu 104:30; Joani 14:26; 2 Petero 1:21.
ONDE WƐ AMBOYALƆNGƆSƆLA DIA NONGOLA BATISMU?
13, 14. Lande na kahatahombe mboka wɔma dia sɔna dia kambɛ Jehowa Nzambi?
13 Lam’ele batismu ekɔ l’elembetshiyelo efula wa ngasɔ ndo ekɔ dikambo dioleki ohomba lo lɔsɛnɔ l’onto, onde lâsɔ ɔsɔ ekɔ nna diahombayɛ mboka wɔma? Kema, aha ɔsɔku! Kânga mbele yɛdikɔ ya nongola batismu hahombe mbɔsama oko lo shɛkɛsɛkɛ, aha la tamu, ɔsɔ ekɔ yɛdikɔ ya lomba efula yakokayɛ mbɔsa.
14 Batismu ekɔ djembetelo yɛnya ɔnɛ wɛ ambɔsɔna dia kambɛ Jehowa Nzambi. Ohokanyiya dikambo di’anto weyayɛ. Lo woho ɔmɔtshi kana okina, onto l’onto ekɔ lo kambɛ owandji ɔmɔtshi olimu, shi mɛtɛ? Amɔtshi wekɔ lo kambɛ okundji oko ɛhɔmbɔ. (Mateu 6:24) Akina wekɔ lo ndjasha la wolo tshɛ l’elimu awɔ ndo lo ndjakambɛ vɔamɛmɛ lam’etɛwɔ ekotshelo ka saki yawɔ oko dikambo dioleki ohomba lo lɔsɛnɔ lawɔ. Anto akina nto wekɔ lo kambɛ tozambizambi ta kashi. Koko wɛ ambɔsɔna dia kambɛ Jehowa, Nzambi ka mɛtɛ. Ndoko onto okina, naka aha nde, lele ɔlɔlɔ ngasɔ, lele la kɛtshi ndo la ngandji ka ngasɔ. Nzambi nɛmiyaka anto lam’awashande olimu w’ohomba wawakimanyiya dia vɔ kondja panda. Nde mbishaka ekambi ande difuto dia lɔsɛnɔ la pondjo. Mɛtɛ, ndjela ɛnyɛlɔ ka Yeso ndo kimɔ lɔsɛnɔ layɛ le Jehowa kema dikambo diahombayɛ mboka wɔma. Ɔsɔ mɛtɛ mbele tshɔi yakɔ ya yoho ya lɔsɛnɔ langɛnyangɛnya Nzambi ndo lele ɔlɔlɔ.—1 Khumi ya Dikanga 18:21.
15. Naa wekamu ɛmɔtshi wasekɛ anto efula dia vɔ nongola batismu?
15 Koko, batismu kema yɛdikɔ yahombayɛ mbɔsa l’ɔtɛ w’ɔnɛ anto wambokotshutshuya. Ɔsɔ ekɔ dikambo dia lam’asayɛ la Jehowa. (Ngalatiya 6:4) Oko wamboyohama lo nyuma, ondo wɛ akayambola wate: “Kakona kanshimba dimi [batizama]?” (Etsha 8:35, 36) Yambola wembola ɛnɛ: ‘Onde woho wahalange nkumbo kami dikambo sɔ mbashimba? Onde dimi lekɔ lo tetemala la sala tokambokambo tɔmɔtshi tahɔtɔnɛ l’Afundelo kana pɛkato mɔtshi? Onde lekɔ lo mboka wɔma w’ɔnɛ anto wayopetsha?’ Ɔsɔ mbele akambo amɔtshi wahombayɛ sɛdingola, koko sɛdingolawɔ l’ɔlɔlɔ tshɛ.
16. Ɛlɔlɔ akɔna wayoyokondja lam’ayoyokambɛ Jehowa?
16 Kema ɔlɔlɔ dia sɛdingola akambo wa kɔlɔ aha la sɛdingola ɛlɔlɔ wakokayɛ kondja lo kambɛ Jehowa. Oko ɛnyɛlɔ, ɔsa dikambo dia lohetsho l’oma le ase nkumbo. Yeso akalake ɔnɛ kânga ambeki ande wamboshisha ewotɔ l’ɔtɛ w’ɔnɛ wambôyela, vɔ wayokondja nkumbo koleki woke ka lo nyuma. (Mako 10:29, 30) Anyayɛ ambetawudi asɔ wayokɛnya ngandji k’onto l’ɔnango, wayokokimanyiya dia wɛ mbikikɛ asui, ndo wayokosukɛ dia wɛ kɛndakɛnda lo mboka k’otsha lo lɔsɛnɔ. (1 Petero 5:9) Djekoleko dikumanyi dia l’atei w’etshumanelo, vɔ kokaka kokimanyiya dia wɛ shika ekolo la ntondo k’akambo amɔtshi ndo dia wɛ kandola ekakatanu ɛmɔtshi. (Jakoba 5:14-16) Lo kɛnɛ k’endana la dikambo di’ɔnɛ anto wa l’andja ɔnɛ wayokohetsha, wɛ kokaka ndjambola wate: ‘Kakɔna kakoka mbɛdikama la dikambo dia mbetawɔma le Otungi w’andja w’otondo, lo mbɔngɛnyangɛnya oma lo yoho ya lɔsɛnɔ lamomɔsɔnɔla na?’—Tukedi 27:11.
YAƆTƆNGANYIYAKA LA NDJAKIMƆ KAYƐ NDO LA BATISMU KAYƐ
17. Lande na kahombayɛ mbɔsa batismu oko etatelo koko aha oko ekomelo?
17 Ekɔ ohomba mbohɔ ɔnɛ batismu kema ekomelo k’ehamelo kayɛ ka lo nyuma. Tɔ kekɔ etatelo k’olimu wa Nzambi wa lo lɔsɛnɔ l’otondo oko okambi wambolongola ɔkɛndɛ ndo oko Ɔmɛnyi wa Jehowa. Kânga mbele batismu ohomba efula, aha tɔ mbasha onto panda. Yeso kombuta ate: ‘Ɔnɛ tshɛ lalongola batismu mbayoshimbamela.’ Koko, nde akate ate: “One latetemala edja ndu l’ekumelu, ayushimbamela.” (Mateu 24:13) Diɔ diakɔ diele, ekɔ ohomba efula wɛ nyanga Diolelo diaki Nzambi ntondo lam’ayoyodietɛka oko dikambo dioleki ohomba lo lɔsɛnɔ layɛ.—Mateu 6:25-34.
18. L’ɔkɔngɔ wa batismu, naa eyango ɛmɔtshi wahombayɛ ndjadjɛ?
18 Dia wɛ tetemala l’olimu wakambɛyɛ Jehowa, wɛ ayolanga ndjadjɛ eyango wa lo nyuma. Oyango ɔmɔtshi wasungana ele wa pamia ewo kayɛ ka Nzambi oma l’ekimanyielo ka wekelo wa mbala la mbala wa Dui diande wɛmɛ. Sala ekongelo ka walelo wa Bible wa lushi la lushi. (Osambu 1:1, 2) Ɔtɔka lo sanganya y’Akristo mbala la mbala, nɛ dia anto wayoyototana lɛkɔ wayokosha wolo wa lo nyuma. Oko le yɛ wɛmɛ, lande na kahayayadjɛ oyango wa kadimolaka wembola lo sanganya ya l’etshumanelo ndo tombolaka Jehowa lo yoho shɔ la keketshaka anto akina? (Romo 1:11, 12) Oyango okina wakokayɛ ndjadjɛ ele wa ndowanya alɔmbɛlɔ ayɛ.—Luka 11:2-4.
19. Waonga akɔna wakoka nyuma k’ekila kokimanyiya dia wɛ monga lawɔ?
19 Naka wɛ nangaka ndjaɔtɔnganyiya la kitshimudi ya batismu kayɛ, kete wɛ pombaka tetemala la mbidja yimba lo kɛnɛ kasalayɛ, ndo tshikɛ nyuma k’ekila kaki Nzambi dihole dia tɔ tɔsha waonga anɛ le yɛ: ngandji, wɔladi, ndjakimɛ k’efula, kɛtshi, ɔlɔlɔ, mbetawɔ, wɔlamu, la ndjakimɛ. (Ngalatiya 5:22, 23; 2 Petero 3:11) Ohɔ dia, Jehowa mbishaka nyuma kande k’ekila le wanɛ wɔ̂lɔmbatɔ ndo wakitanyiya awui ande oko ekambi ande wa kɔlamelo. (Luka 11:13; Etsha 5:32) Ɔnkɔnɛ, lɔmbaka Nzambi dia nde kosha nyuma kande ndo dia nde kokimanyiya woho wa wɛ monga la waonga wɔ̂ngɛnyangɛnya. Waonga wa ngasɔ wayoleka mɛnama lo ɛtɛkɛta ayɛ ndo lo lɔkɛwɔ layɛ etena ketawɔyɛ sɛngiyama oma le nyuma k’ekila kaki Nzambi. Mɛtɛ, onto tshɛ la l’atei w’etshumanelo k’Akristo ekɔ lo ndjatshutshuya efula dia ndɔta “lonto l’oyoyo” woho wa nde ndeka fɔna la Kristo. (Kɔlɔsai 3:9-14, NW) Ɔm’ɔmɔ la l’atei aso ekɔ lo pomana l’ekakatanu wa weoho la weoho lo ndjela yɛdikɔ y’ehamelo kande ka lo nyuma. Lam’ele wɛ kema kokele, wɛ pombaka ndjatshutshuya dia monga la lonto lafɔna la Kristo. Koko, toshishake elongamelo kânga yema lo dikambo sɔ, nɛ dia wɛ kokaka disala oma l’ekimanyielo ka Nzambi.
20. Lo yoho yakɔna yakokayɛ mbokoya Yeso l’olimu ayɛ?
20 L’atei w’eyango ayɛ wa lo nyuma, wɛ pombaka ndjadjɛ oyango wa mbokoya ɛnyɛlɔ k’ɔngɛnɔngɛnɔ kaki Yeso lo nna ndo lo nna. (Heberu 12:1-3) Nde akalangaka olimu. Naka wɛ ekɔ la diɛsɛ dia kamba olimu w’esambishelo ka Diolelo, kete lâsɔ, tɔ̂sake olimu ɔsɔ oko ɛngɔ kɛmɔtshi kaya bu la nɛmɔ. Yanga woho wa monga l’ɔngɛnɔngɛnɔ lo mbetsha anto akina Diolelo diaki Nzambi oko wakadisalaka Yeso. Kamba l’alako washa etshumanelo dia kokimanyiya woho wa wɛ ndjalowanya oko ombetsha. Ndo, yashikikɛ dia Jehowa kokaka kosha wolo dia wɛ kotsha olimu ayɛ.—1 Koreto 9:19-23.
21. (a) Woho akɔna weyaso ɔnɛ Jehowa mbɔsaka anto wa kɔlamelo wambolongola batismu la nɛmɔ? (b) Kakɔna kɛnya ɔnɛ batismu ekɔ ohomba dia sho kondja panda lam’ayolomboya Nzambi dikongɛ di’akambo nɛ dia kɔlɔ?
21 Onto lamboyakimɔ ndo lambolongola batismu ndo layatshutshuya la kɔlamelo tshɛ dia ndjela Yeso, ekɔ onto lele la nɛmɔ efula lo asho wa Nzambi. Jehowa sɛdingolaka etema tshɛ wa miliyara y’anto ndo nde mbeyaka woho watanema anto wa ngasɔ paka lo pai. Nde mbaɔsaka oko diangɔ di’ohomba efula, oko “diango di’ushinga a wulu.” (Hangai 2:7) Pɔlɔfɛsi ya lo Bible mɛnyaka ɔnɛ Nzambi mbɔsaka anto wa ngasɔ oko vɔ wambodjama tolembetelo dia ndjokondja panda lam’ayondolomboya dikongɛ di’akambo nɛ dia kɔlɔ. (Ezekiyele 9:1-6; Malaki 3:16, 18) Onde wɛ ‘amboyalɔngɔsɔla dia kondja lɔsɛnɔ la pondjo’? (Etsha 13:48) Onde wɛ kombolaka oma ka tshina diayɛ di’otema dia mbidjama djembetelo oko onto lakambɛ Nzambi? Ndjakimɔ le Nzambi ndo batismu ekɔ etenyi kɛmɔtshi ka djembetelo shɔ, ndo akambo asɔ wekɔ ohomba di’onto kondja panda.
22. Elongamelo kakɔna kakoka “ului a wuki” monga latɔ?
22 L’ɔkɔngɔ wa Mvula k’Elola kakalɔ l’andja w’otondo, Nɔa nde la nkumbo kande wakatombe oma lo wâto oya lo kɛtɛ kambɛdiama. Woho akɔ wâmɛ mbele ndo ɛlɔ kɛnɛ, “ului a wuki” w’anto wakamba la ewo ka Nzambi lo sɛnɔ yawɔ ndo wetawɔma le Jehowa, wekɔ l’elongamelo ka panda l’ekomelo ka dikongɛ di’akambo nɛ ndo kondja lɔsɛnɔ la pondjo lo kɛtɛ kambɛdiama lo pondjo. (Enyelo 7:9, 14) Woho akɔna wayonga lɔsɛnɔ lɔsɔ na?
HEMBA EWO KAYƐ
Woho akɔna walanga Jehowa dia wɛ kamba la ewo kande?
Naa wanya amɔtshi watɔla onto otsha lo batismu?
Lande na kele batismu kema ekomelo koko etatelo?
Woho akɔna wakokaso ndjaɔtɔnganyiya la ndjakimɔ kaso ndo la batismu kaso?
[Picture on page 172]
Onde wɛ akayakimɔ le Nzambi lo dɔmbɛlɔ?
[Pictures on page 174]
Kakɔna kakoshimba dia wɛ nongola batismu?