Tshapita 1

Nsango y’oma l’olongo

BIBLE k’otondo kekɔ mɛtɛ losango l’oma l’olongo, nɛ dia Shɛso lele l’olongo mbakatoshatɔ dia tolakanya. Koko, ambeta oko ɛnɔnyi 2 000, nsango hiende ya lânde yakewoyama oma le ondjelo ɔmɔtshi “[w]atemalaka la ntundu ka [Nzambi, NW].” Lokombo lande Ngabiriyɛlɛ. Nyɛsɔ tênde kɛnɛ kakotshutshuya dia nde ndja mbala hiende lanɛ la nkɛtɛ.

Tekɔ l’ɔnɔnyi 3 N.T.D. Ɔlɔmbɛdi ɔmɔtshi waki Jehowa welɛwɔ Zɛkariya ekɔ lo mbidjasɛ l’akona wa la Judeya wahanganyi etale la Jerusalɛma mɛtɛ. Nde la wadiɛnde Elisabɛtɛ waya esombe. Vɔ kema ndoko l’ɔna. Zɛkariya nde ongo lo tɛmpɛlɔ ka Nzambi ka la Jerusalɛma nɛ dia etena kande ka kamba olimu w’ɔlɔmbɛdi lɔkɔ kambokoka. Wonya wakambande olimu, ɛnyinde ko Ngabiriyɛlɛ lo lonya l’omi l’ediakelo katshumbawɔ tshɔ.

Zɛkariya ambôka wɔma efula. Koko Ngabiriyɛlɛ ambôtutsha solo, awotɛ ate: “Zekariya, tukaki woma, dombelo diaye diambukema. Wadeye Elisabete ayuta la ye ona pami, kuwole wati: Joani.” Ngabiriyɛlɛ ambotetemala mbotɛ lo dikambo dia Joani ate: “Ndi ayuyala wuki lu ashu wa [Jehowa]” ndo ayotanyiya “[Jehowa] antu wolongoswami.”

Koko, Zɛkariya hetawɔ dikambo sɔ. Mɛnamaka di’oko nde la Elisabɛtɛ hawokoke mbota ɔna l’ɛnɔnyi waya lawɔ. Ɔnkɔnɛ, Ngabiriyɛlɛ ambowotɛ ate: “We ayuyala lumi. We heya nteketa edja ndu lushi layuyala akambu ane, ne dia we hetawi aui ami.”

L’etena kakɔ, anto wele l’andja woyambolaka bonde kamboviya Zɛkariya l’etei ka tɛmpɛlɔ. Atombake l’andja ko nde hayokoka tɛkɛta, koko osalaka paka tolembetelo l’anya, anto tshɛ wambeya ɔnɛ nde oma la mɛna ɛnɛlɔ kɛmɔtshi ka diambo.

L’ɔkɔngɔ wa Zɛkariya shidiya etena kande k’olimu wa lo tɛmpɛlɔ, nde akakalola lakande. Kem’edja, l’ɔkɔngɔ w’akambo asɔ, kɛnɛ kakate ondjelo kambokotshama—Elisabɛtɛ ambotshɔ diemi! L’etena kakandakongɛka mbota, Elisabɛtɛ akomama lakande ngɔndɔ tshanu.

L’ɔkɔngɔ diko, Ngabiriyɛlɛ amboyoya nto. Onto akɔna atɛkɛta la nde na? Toko osekaseka wahatatshukama welɛwɔ Mariya, osekaseka akɔ ekɔ lo mbidjasɛ l’osomba wa Nazarɛta. Losango lakɔna lambondoya dia ndjewoya mbala kɛnɛ na? Ngabiriyɛlɛ ekɔ lo mbutɛ Mariya ate: “We ambukama ngandji ka mamba uma le [Nzambi, NW]. . . . Ulungi, we ayutsho diemi, ayuta ona pami, kuwole wati: Jesu.” Ngabiriyɛlɛ ambokotsha ate: “Ndi ayuyala wuki, wayuwetaka vati: On’a Khum’ulungu. . . . Ndi ayulela khumbu ka Jakoba pundju [ndo diolelo diande hadiokomɛki, NW].”

Sho kokaka ndjashikikɛ ɔnɛ Ngabiriyɛlɛ ngɛnangɛnaka diɛsɛ diele la nde dia mbewoya nsango shɔ. Ndo, lo yɛdikɔ yayototâlaka akambo w’endana la Joani la Yeso, mbayototâlekaka shihodia lande na kele nsango shɔ y’oma l’olongo ohomba efula. 2 Timote 3:16; Luka 1:5-33.

▪ Naa nsango hiende y’ohomba yoye oma l’olongo na?

▪ Akɔna oye la nsango yakɔ shɔ, ndo wa na wayitɛnde?

▪ Lande na kele nsango shɔ wolo mbetawɔma na?