Tshapita 17

Yeso ambetsha Nikɔdɛmo

ETENA kênde lo difɛstɔ di’Elekanelo dia l’ɔnɔnyi 30 T.D., Yeso ekɔ lo ntsha tolembetelo ta mamba, kana ahindo. Diɔ diakɔ diambowetawɔ anto efula wakawetawɔ. Kânga Nikɔdɛmo, ɔmɔtshi a l’atei w’Ase Sheke, mbuta ate tuminadi ta lâdiko t’Ase Juda, ekɔ lo mamba hakoke ko ekɔ lo nanga nyomeya akambo efula. Diɔ diakɔ diambondoya oya le Yeso lo wodjima, l’atei otsho, ondo nɛ dia nde ekɔ la wɔma w’ɔnɛ lokumu lande la l’ɛlɔmbɔdi ekina w’Ase Juda latokoyolana lam’ayondɛnama le anto.

Nde lande ate: “Umbetsha, shu mbeyaka shati: Umbetsha wuyi uma le [Nzambi, NW] mbeye, ne dia nduku leya ntsha tulimbitelu tatshaye tone, tshikima [Nzambi, NW] keli la ndi.” Ko Yeso mbakadimolande Nikɔdɛmo ɔnɛ di’onto mbɔtɔ lo Diolelo dia Nzambi, nde pombaka ‘mbotɔ nto.’

Ko ngande wakoka onto mbotɔ nto na? Nikɔdɛmo mbambolande Yeso ate: “Ndi ayeya mboto etena ka hendi l’utema a nyangu, ku ndi mbuto ntu?”

Kema, aha ngasɔ mbotɔwɔ nto. Yeso ambolembetshiya ate: “Untu heyi mboto lu diulelu dia [Nzambi, NW] tshikima ndi ambuto le ashi la le [n]yuma.” L’etena kakalongolaka Yeso batismu ndo lam’akaholɔ nyuma ko ndjowahema, lâsɔ mbakandotɔ “le ashi la le [n]yuma.” Lam’akokɛma dui oma l’olongo ɔnɛ: ‘Ɔnami la ngandji ɔnɛ latɔngɛnyangɛnyaka,’ Nzambi akɛnya dia nde ambota Yeso oko ɔna la lo nyuma lele l’elongamelo ka mbɔtɔ lo Diolelo dia l’olongo. L’ɔkɔngɔ diko, lo Pɛntɛkɔsta ka l’ɔnɔnyi 33 T.D., anto akina wakabatizama wakayolongolaka nyuma k’ekila, ɔnkɔnɛ ndo vɔ lawɔ wakayotɔka oko ana wa lo nyuma waki Nzambi.

Oko wênde onto la lânde, olimu waki Ɔna Nzambi wekɔ ohomba efula. Yeso ambotɛ Nikɔdɛmo ate: “Uku akunyia Mose ului l’usui, osoku dieli la On’a untu dia munyiyama; ne dia untu tshe lawetawo, ayali la lumu la pundju.” Mɛtɛ, oko wele Ase Isariyɛlɛ wakalumatamaka elui wa nɛngɔ wakahombaka mendaka olui wa odjolo tɛɛ dia vɔ mbika, woho akɔ wâmɛ mbahomba anto tshɛ ndjâla la mbetawɔ le Ɔna Nzambi dia vɔ tshungɔ oma lo nyɔi kakawafundamɛ.

Yeso ekɔ lo mbika epole ɔsɛkɛ lo mɛnya ngandji ka Jehowa lo dikambo sɔ, diɔ diakɔ diambondotɛ Nikɔdɛmo ate: “[Nzambi, NW] akalangi wa la kete utamanya, mbakandawasha On’andi etoi lakanduti, dia untu tshe lawetawo tavokaki, keli ayali la lumu la pundju.” Ɔnkɔnɛ, lam’akinde la Jerusalɛma, lâsɔ ko ambeta ngɔndɔ shamalo tsho l’ɔkɔngɔ wa nde tatɛ olimu ande, Yeso akɛnya hwe ɔnɛ nde kele ehomɔ kakamba Jehowa latɔ olimu dia shimbɛ anto wa l’andja w’otondo.

Yeso ambonyomolembetshiya Nikɔdɛmo ate: “Ne dia [Nzambi, NW] kuntuma On’andi la kete, dia ndjulumbuya wa la kete,” mbuta ate aha dia ndjânya andja ɔnɛ ko ndjofundɛ anto tshɛ nyɔi. Koko, lo ndjela kɛnɛ kata Yeso, nde akatomama dia “wa la kete washimbameli le ndi.”

Nikɔdɛmo akaye l’otsho dia ndjênda Yeso nɛ dia nde ekɔ lo mboka wɔma. Ɔnkɔnɛ, ekɔ ɔlɔlɔ dia Yeso ndjihiya sawo diande lo mbotɛ ate: ‘Ɔnkɔnɛ mbele elombwelo: osase [wakakɛnɛmɔla Yeso lo lɔsɛnɔ lande ndo lo wetshelo ande] wakaye l’andja, koko anto wakaleke nanga wodjima la ntondo k’osase dikambo ditshelo diawɔ diaki kɔlɔ. Nɛ dia onto tshɛ latsha kɔlɔ halangaka osase, hasukanaka l’osase ɔnɛ ditshelo diande dia kɔlɔ diatokoyotomba sɛkɛ. Koko onto latsha akambo wa mɛtɛ ndjâka l’osase ɔnɛ kele ditshelo diande diɛname ɔnɛ diɔ mbɔtɔnɛka la lolango la Nzambi.’ Joani 2:23–3:21; Mateu 3:16, 17; Etsha 2:1-4; Walelu 21:9.

▪ Kakɔna kotshutshuyisha Nikɔdɛmo dia nde ndja le Yeso, ndo lande na koyende l’otsho na?

▪ ‘Mbotɔ nto’ kɛdikɛdi na?

▪ Ngande wambɛnya Yeso ɔkɛndɛ wele lande lo panda kaso?

▪ Dikambo di’ɔnɛ Yeso kôndja dia ndjolomboya andja ɔnɛ alembetshiyadiɔ?