Tshapita 18

Joani ambokitakita, Yeso ambodɛ

L’ƆKƆNGƆ wa difɛstɔ di’Elekanelo dia l’eleko kamɔnga akatshi ka l’ɔnɔnyi 30 T.D., Yeso nde l’ambeki ande wambonɛ oma la Jerusalɛma. Koko, aha otsha lakawɔ la Ngalileya, vɔ wekɔ lo tatshu otsha lo bɛtshi dia nkɛtɛ dia la Judeya, lɛnɛ ayowotobatizaka anto. Joani Obatizanyi ekɔ lo sala olimu akɔ wâmɛ, ambeta oko yɛdikɔ y’ɔnɔnyi w’otondo, ndo nde ekɔ l’ambeki watawoyele polo ndo l’etena kɛnɛ.

Mɛtɛ, aha Yeso mbabatiza anto, koko ambeki ande mbasala olimu ɔsɔ oma l’ɛlɔmbwɛlɔ kande. Batismu kawɔ kekɔ la kitshimudi yâmɛ la kɛnɛ kalongoyana Joani, tɔ kekɔ djembetelo yɛnya ndjatshumuya k’Ase Juda lo pɛkato yakawasale lam’akawɔnyɔla Ɛlɛmbɛ wa Nzambi. Koko l’ɔkɔngɔ w’eolwelo kande, Yeso akayolakanya ambeki ande dia vɔ nongoya anto batismu kele la kitshimudi yotshikitanyi. Ɛlɔ kɛnɛ, batismu k’Okristo kekɔ djembetelo yɛnya ɔnɛ onto lambokilongola amboyakimɔ le Jehowa Nzambi dia mbokambɛ.

L’etatelo kɛnɛ k’olimu a Yeso, kânga mbakambawɔ nde la Joani onto l’onto lo dihole diande, vɔ wekɔ lo mbetsha ndo wekɔ lo batiza wanɛ wayatshumuya. Koko ambeki wa Joani waya la kandjema, ko wambotatɛ nyanga dikambo dia Yeso le Joani vate: “Umbetsha, . . . one laki laye la wedi a Jorodana, . . . atubatizaka, ku antu tshe watuyakaka le ndi.”

Lo dihole dia nde mboka kandjema, Joani ekɔ lo ngɛnangɛna lo mɛna woho watahame olimu wa Yeso ndo nde nangaka di’ambeki ande ngɛnangɛna ndo vɔ lawɔ. Nde ambowaohola ate: “Nyu nyame nyeli emenyi wa aui wakamati nti: Dimi kema Kristu, keli lakatumama la ntundu kandi.” Oma lâsɔ, nde ambowaokɛ wɛɛla ɔnɛ wa dimɛna efula, ata ate: “Utshuki a wadi keli kanga wadi. Keli ongenyi w’utshuki a wadi lemadi la luka diui diandi, atongenangenaka efula ne dia diui di’utshuki. Okone ongenongeno ami ambulula.”

Joani, ɔnɛ lele ɔngɛnyi w’Otshuki a Wadi, akangɛnangɛna lam’akandalowola ambeki ande le Yeso, ambeta oko yɛdikɔ ya ngɔndɔ shamalo. Ambeki ande amɔtshi, wamboshila ndjâla atɔi amɔtshi a wanɛ wayoyala lo etshumanelo ka wadi a Kristo l’olongo, etshumanelo kokengami l’Akristo w’akitami wa nyuma. Joani nangaka di’ambeki ande ndjela Yeso ndo vɔ la wɔ, nɛ dia ɔkɛndɛ ande ele dia nɔngɔsɔla mboka k’olimu wa Yeso waki lo tahame paka pama tsho. Joani Obatizanyi ekɔ lo nembetshiya ate: “Ololo ndi ambeli, dimi nkitikiti.”

Joani, ombeki w’oyoyo waki Yeso, ɔnɛ laki ombeki wa Joani Obatizanyi ntondo, mbayoyofunda kɛnɛ k’endana l’ɔtɔngwɛlɔ wa Yeso ndo l’ɔkɛndɛ Ande w’ohomba lo panda k’anto, ata ate: “One luyi uma l’ulungu, keli ladiku dia tshe.  . . . Papa atulangaka Ona. Ndi akakimo akambu tshe lu anya andi. One letawo Ona, eko la lumu la pundju. Keli one lahakitanyia diui dia Ona, henyi lumu la pundju, kele ka [Nzambi, NW] keko le ndi.”

Yema l’ɔkɔngɔ wa Joani Obatizanyi nembetshiya woho watakitakita olimu ande, Nkumekanga Hɛrɔdɛ ambowonda. Hɛrɔdɛ akɔshi wadi aki ɔnango lelɛwɔ Filipɛ oko wadiɛnde hita, ko lam’ele Joani akɛnya kɔlɔ ka dikambo sɔ lo sɛkɛ, Hɛrɔdɛ ambowodja lo lokanu. Kam’okinde ɔnɛ wambonda Joani, Yeso nde l’ambeki ande wambomɔ oma la Judeya ko wambotshɔ otsha la Ngalileya. Joani 3:22–4:3; Etsha 19:4; Mateu 28:19; 2 Koreto 11:2; Mako 1:14; 6:17-20.

▪ Kitshimudi yakɔna yele la batismu kalongoyana ambeki wa Yeso oma l’ɛlɔmbwɛlɔ kande la ntondo k’eolwelo kande? Ndo l’ɔkɔngɔ w’eolwelo kande?

▪ Woho akɔna wɛnya Joani ɔnɛ ambeki ande wekɔ lo nyanga onyanganyanga?

▪ Lande na kambodjama Joani lo lokanu?