Tshapita 38

Onde Joani kondjala la mbetawɔ?

JOANI Obatizanyi, ɔnɛ lele lanɛ lo lokanu, ambeta oko yɛdikɔ y’ɔnɔnyi w’otondo, amboka lokumu ɔnɛ Yeso ambolola ɔn’aki wadi aki odo la l’osomba wa Nayina. Koko Joani nangaka mboka kitshimudi ya dikambo sɔ oma l’onyɔ wa Yeso ndamɛ, diɔ diakɔ diambondotoma ambeki ande ahende dia vɔ towombola ɔnɛ: “We keli nd’ako layayi, kana tukungeli ukina?”

Ɔsɔ mbeyaka mɛnama oko dimbola di’ekanda sɔdu, djekoleko lam’ele, ambeta oko yɛdikɔ y’ɛnɔnyi ehende, Joani akɛnyi nyuma ka Nzambi ayaholɔ ko ndjahema l’ɔtɛ wa Yeso l’etena kakandobatizaka ndo nde akoke dui dia Nzambi diata ɔnɛ nde mbɔngɛnangɛnaka. Dimbola dia Joani kokaka tshutshuya anto amɔtshi dia vɔ mbuta ɔnɛ mbetawɔ kande kakakɔmɔ. Koko, aha ɔsɔku. Otondoyala Joani akatatɛ la mbidja tamu, tshike Yeso kɔtɛkɛta akambo w’ɛlɔlɔ efula lo lokombo lande oko wayondɔtɛkɛta l’etena kɛnɛ. Ko lâsɔ, lande na kambola Joani dimbola sɔ?

Ondo Joani nangaka tsho dia Yeso mbuta oma l’onyɔ ande ndamɛ ate Dimi mbele Mɛsiya. Dikambo sɔ diayowokeketsha efula, nɛ dia nde ekɔ lo nsowa lo lokanu. Koko, mbokɛmaka dia Joani ekɔ l’ɛkɔkɔ efula wôtshutshuya dia nde mboka dimbola sɔ. Mɛtɛ, nde nangaka mbeya kana onto okina pombaka ndja, mbuta ate okitɔ, lo yoho mɔtshi, dia nde ndjoshidiya akambo tshɛ wakatama la ntondo wahomba Mɛsiya ndjokotsha.

Lo ndjela pɔlɔfɛsi ya lo Bible yeya Joani dimɛna, Okitami waki Nzambi pombaka ndjâla nkumekanga, otshungodi. Koko, Joani ekɔ paka lo lokanu, ambeta ndo ngɔndɔ efula l’ɔkɔngɔ wa Yeso batizama. Ɔnkɔnɛ, kɛnɛ kambola Joani lo mɛtɛ tɔ kɛnɛ: ‘Onde wɛ mɛtɛ mbele ɔnɛ layela Diolelo diaki Nzambi lo ɛnamelo ka nkudu, ko kana tokonge okina, okitɔ wayoyokotsha pɔlɔfɛsi tshɛ ya diambo yakatama lo dikambo dia lotombo la Mɛsiya?’

Lo dihole dia nde kadimola ambeki wa Joani ɔnɛ: ‘Eelo, dimi mbele nd’akɔ layaye!’ Yeso ambodiɛnya lo ntsha akambo wa mamba l’etena kɛsɔ, ambɔkɔnɔla anto efula oma lo weoho tshɛ wa hemɔ yatatawɔ. Ko nde l’ambeki akɔ ate: “Nyututeli Joani akambu wenanyu la wukanyu: akanga a tutshungu wambosena, akanga a tshumbi wambokendakenda, akanga a sudi wambokono, akanga a puki wambuka, wavo wambulwama, asi wula wambusambishama lukumu l’ololo.”

Kɛdikɛdi, dimbola dia Joani mɛnyaka ɔnɛ nde ekɔ lo nongamɛ ɔnɛ Yeso anyomoleka sala akambo efula, aha komɛ paka lo kɛnɛ kasalande keto, ndo ondo ayotshungole Joani oma lo lokanu. Koko, Yeso ambotɛ Joani di’aha nde nongamɛ akambo akina lâdiko dia wanɛ wasalande.

Ambeki wa Joani wambokalola, ko Yeso ambosekesɔ otsha le olui w’anto ndo ambowatɛ ɔnɛ Joani mbele “dikendji” dia Jehowa diakatama lo Malaki 3:1 ndo nto, nde mbele omvutshi Elidja wakatama lo Malaki 4:5, 6. Ɔsɔku mbambondândola Joani, lo mbɛ̂dinya l’amvutshi tshɛ wakasɛnaka la ntondo kande, ata ate: “Mete kanyutelami nti: L’atei a wane wakutama uma le amantu, nduku untu luleki Joani Ubatizanyi wuki. Keli paka one luleki tshitshe lu diulelu dia l’ulungu, kûleki wuki. Uma lu nshi ya Joani Ubatizanyi edja ndu kakiane, [diolelo dia l’elongo mbele otsha lɛnɛ atasamanya anto l’ekudukudu, NW].”

Lânɛ, Yeso ambɛnya ɔnɛ Joani hatoyala lo Diolelo dia l’olongo, nɛ dia ɔnɛ loleki tshitshɛ lɔkɔ ndeka Joani woke. Joani akalɔngɔsɔlɛ Yeso mboka, koko nde akavu la ntondo ka Kristo mbidja sheke, kana diokanelo, nde l’ambeki ande dia vɔ tôlɛ kâmɛ la nde lo Diolelo diande. Diɔ diakɔ diotshi Yeso ɔnɛ Joani hatoyala lo Diolelo dia l’olongo. Koko, nde ayoyala ombolami wa lanɛ la nkɛtɛ wa lo Diolelo diaki Nzambi. Luka 7:18-30; Mateu 11:2-15.

▪ Lande na kambola Joani dia mbeya ɔnɛ kana Yeso mbele Ɔnɛ Layaye, ko kana tonyomokongɛ okina?

▪ Lo ndjela kɛnɛ kotshi Yeso, pɔlɔfɛsi yakɔna yambokotsha Joani?

▪ Lande na kahatoyala Joani Obatizanyi l’olongo kâmɛ la Yeso?