Joani Obatizanyi akinde?

Okadimwelo washa Bible

Joani Obatizanyi aki Omvutshi wa Nzambi. (Luka 1:76) Nde akotɔ yema tshitshɛ la ntondo k’ekomelo ka ntambe ka ntondo N.T.D. ndo akasɛnɛ lo ntambe ka ntondo T.D. Nzambi akawosha ɔkɛndɛ wa nɔngɔsɔlɛ Mɛsiya kana Kristo mboka. Joani akakotsha ɔkɛndɛ ɔsɔ lo nsambisha losango la Nzambi dia nkaloya etema w’asekande ase Juda otsha le Nzambi.​—Makɔ 1:1-4; Luka 1:13, 16, 17.

Losango la Joani lakahombe nkimanyiya anto w’etema ɛlɔlɔ wakohokamɛka dia mbeya Yeso y’ose Nazarɛtɛ oko Mɛsiya wakalakema. (Mateo 11:10) Joani akakeketsha anto wakohokamɛka dia ndjatshumoya oma lo pɛkato yawɔ ndo oma laasɔ vɔ nongola Batisimu oko djembetelo ya ndjatshumoya kawɔ. (Luka 3:3-6) Lam’ele nde akabatizaka anto efula, Joani mbelamɛka ɔnɛ Obatizanyi. Joani akabatiza Yeso ndo ɔsɔ kele Batisimu koleki tshɛ ohomba.a​—Makɔ 1:9.

Lo sawo nɛ tayokadimola lo ambola anɛ:

• Kakɔna katshikitanya Joani Obatizanyi l’anto akina?

• Waana waki ambutshi wa Joani Obatizanyi?

• Aki lo kiɔkɔ ya nyɔi ka Joani Obatizanyi?

• Onde Joani Obatizanyi nde la Yeso wakasɛmanɛka?

• Apami angana welamɛ lo lokombo Joani lo Bible?

Kakɔna katshikitanya Joani Obatizanyi l’anto akina?

Ɔkɛndɛ wakatewoyami la ntondo: L’olimu ande w’esambishelo, Joani akakotsha prɔfɛsiya kendana la dikɛndji dia Jehowa. (Malaki 3:1; Mateo 3:1-3) Nde akayaɛnya oko onto lakahombe “nɔngɔsɔlɛ Jehowa anto,” mbuta ate nde akadiholɛ asekande w’ase Juda mboka dia mbetawɔ losango la Yeso Kristo lele onyimpala wa Jehowa Nzambi.​—Luka 1:17.

Elongamelo kande: Yeso akate ate: “Ndooko onto loleki Joani Obatizanyi woke, koko onto loleki tshitshɛ lo Diolelo dia l’olongo mboleka woke.” (Mateo 11:11) Lam’ele Joani komonga tsho omvutshi koko akatama lo dikambo dia nde ɔnɛ nd’ekɔ “dikɛndji,” diakɔ diele ndooko okambi wa Nzambi waki la ntondo kande wakakoke mboleka. Ɛtɛkɛta wa Yeso mɛnyaka nto dia Joani hatonga l’atei wa nkumi ya dikanga ya lo Diolelo dia Nzambi.b Omvutshi wa kɔlamelo ɔsɔ akavu la ntondo ka Kristo dihola mboka ka lɔsɛnɔ la l’olongo. (Hɛbɛru 10:19, 20) Koko, Joani ayonga ombolami wa Diolelo dia Nzambi lanɛ la nkɛtɛ ndo ayonga l’elongamelo ka nsɛna pondjo pondjo lo Paradiso.​—Osambo 37:29; Luka 23:43.

Waana waki ambutshi wa Joani Obatizanyi?

Zɛkariya la Elizabɛtɛ mbaki ambutshi wa Joani. Zɛkariya aki ɔlɔmbɛdi w’ose Juda. Eotwelo ka Joani aki tshondo ya dihindo nɛ dia nyango aki ekomba kana komonga la akoka wa mbota. Ndo nto, nde la Zɛkariya “waki waya esombe wa lokosombe.”​—Luka 1:5-7, 13.

Aki lo kiɔkɔ ya nyɔi ka Joani Obatizanyi?

Nkumekanga Hɛrɔdɛ Atipa akahembola Joani ɔtɛ. Nde akasale dui sɔ l’ɔtɛ wakawotshutshuya wadɛnde Hɛrɔdiyasɛ. Hɛrɔdiyasɛ akohetshaka nɛ dia Joani akatɛ Hɛrɔdɛ, lakayokoma ose Juda dia diwala diawɔ kombetawɔmaka l’ɛlɛmbɛ w’ase Juda.​—Mateo 14:1-12; Makɔ 6:16-19.

Onde Joani Obatizanyi nde la Yeso wakasɛmanɛka?

Bible hasukɛ kaanga yema kanyi y’ɔnɛ vɔ wakasɛmanɛka. (Joani 3:25-30) Lo mɛtɛ, Joani akeyaka dia nde aki l’ɔkɛndɛ wa nɔngɔsɔlɛ Mɛsiya mboka, koko aha dia sɛmanɛ lande. Joani akate ate: ‘Lakaye ndjobatiza anto l’ashi. . . dia ndjoweyanya le ase Isariyɛlɛ.’ Oma laasɔ nde akakotsha ate: “Nde ekɔ Ɔna Nzambi.” (Joani 1:26-34) Joani akonge l’ɔngɛnɔngɛnɔ w’efula etena kakandoke etombelo w’amɛna wendana l’olimu wa Yeso.