Onde Joani Obatizanyi aki onto la mɛtɛ?

Evajiliɔ tɛkɛtaka dikambo dia pami kɛmɔtshi kelɛwɔ Joani Obatizanyi, ɔnɛ lakasambisha akambo wendana la diolelo dia Nzambi la Judeya. Onde kɛnɛ kata Bible lo dikambo dia pami kɛsɔ kekɔ mɛtɛ? Tɔsɛdingole tolembetelo tayela tɔnɛ:

• Bible mbutaka ɔnɛ: “Joani Obatizanyi akaye ayasambisha l’oswe wa la Judeya, ata ate: ‘Nyoyatshumoya, nɛ dia Diolelo dia l’olongo diaya suke.’” (Mateo 3:1, 2) Onde ekɔ ɛkɔndɔ ɛmɔtshi wɛnya dia akambo asɔ wekɔ mɛtɛ? Eelo.

  Flavius Josèphe ombeyi w’ɛkɔndɔ wa lo ntambe ka ntondo akatɛkɛta dikambo dia pami kelɛwɔ “Joani, lelamɛ nto ɔnɛ Obatizanyi,” ɔnɛ “lakakeketshaka ase Juda dia monga la losembwe,” ndjakimɔ “le Nzambi” ndo “nongola Batisimu.”​—(Histoire ancienne des Juifs, livre XVIII).

• Bible mbutaka dia Joani akangola Hɛrɔdɛ Atipa, ɔnɛ laki owandji wa distrikɛ dia Ngalileya ndo dia Pereya. Hɛrɔdɛ akayataka dia nde ekɔ ose Juda ndo dia nde aki l’ɛse k’ɛlɛmbɛ. Joani akawotɛ dia nde ambosala kɔlɔ lo woho wakandatshuke Hɛrɔdiyasɛ ya wadi ɔnango. (Makɔ 6:18) Onde awui asɔ mbɔtɔnɛka la awui akina wele lo abuku wahendana la Bible?

  Ombeyi w’ɛkɔndɔ Josèphe akate dia Atipa “akalange Hɛrɔdiyasɛ efula” ndo “akɔlɔmbɛ mbala kak’ɔtɔi dia mbotshuka.” Hɛrɔdiyasɛ aketawɔ ko akakakitɔna l’omɛnde ndo akayotshukanaka la Atipa.

• Bible mɛnyaka dia “ase Jɛrusalɛma l’ase Judeya tshɛ ndo wedja tshɛ waki suke la Jɔrdana wakatshɔka le [Joani], ko nde akaabatizaka lo Ɔkɛdi wa Jɔrdana.”​—Mateo 3:5, 6.

  Josèphe shikikɛka dikambo sɔ lo funda ɔnɛ “elui w’anto” wakayaka le Joani ndo “wakandandemaka efula la kɛnɛ kakandetshaka.”

Mɛnamaka dia Josèphe ombeyi w’ɛkɔndɔ wa lo ntambe ka ntondo aketawɔka dia Joani Obatizanyi aki onto la mɛtɛ. Ndo sho lawɔ mbetawɔka dui sɔ.