Tshapita 51
Wambodiaka onto lo dambo di’eohwelo ka lushi l’eotwelo
L’ƆKƆNGƆ wa nde mbisha apɔstɔlɔ ande alako amɔtshi, Yeso ambâtoma ahende ahende dia vɔ tasambishaka. Ondo Petero ambotshɔ nde la Andɛlɛ w’ɔnango kâmɛ, ko Jakɔba nde la Joani, Filipɔ nde la Baratɔlɔmayo, Tɔmasɛ nde la Mateu, Jakɔba nde la Tadayɔ, ndo Simɔna nde la Judasɛ Isakariyɔtɛ. Elui ɛsɔ esamalo w’embetsha w’evanjiliɔ wekɔ lo tasambisha lokumu l’ɔlɔlɔ la Diolelo l’ahole tshɛ watawatshu ndo wekɔ lo takɔnɔya anto l’ahindo.
Joani Obatizanyi êke paka lo lokanu polo ndo l’etena kɛnɛ. Ay’oko yɛdikɔ y’ɛnɔnyi ehende w’etondo. Ohɔ dia: Joani akataka lo sɛkɛ ɔnɛ Hɛrɔdɛ Atipa ambosala kɔlɔ nɛ dia nde ambotshuka Hɛrɔdiyasi, wadi aki Filipɔ k’ɔnango. Joani kotsha kɔlɔ dia tondja loseka lɔsɔ lo sɛkɛ, nɛ dia Hɛrɔdɛ Atipa akataka ate dimi ndjelaka Ɛlɛmbɛ wa Mɔsɛ. Diɔ diakɔ diakawodje Hɛrɔdɛ lo lokanu, ondo oma lo tɔsɛngiya taki Hɛrɔdiyasi.
Hɛrɔdɛ Atipa mbeyaka ɔnɛ Joani ekɔ onto la losembwe ndo nde mbohokamɛka l’ɔngɛnɔngɛnɔ. Diɔ diakɔ diakandakandande dia mbɔ̂sɛ yɛdikɔ mɔtshi. Koko Hɛrɔdiyasi ekɔ lo mpetsha Joani ndo ekɔ mɔ̂nyɔndja nshi tshɛ woho wa mbodiakisha. Endaka kakianɛ, diaaso dialelande diamboyotanema.
Yema la ntondo ka difɛstɔ di’Elekanelo dia l’ɔnɔnyi 32 T.D., Hɛrɔdɛ ambosala difɛstɔ dia woke dia mbohɔ lushi lakandôtɔ. Nde akele ɛlɔhɛ ande tshɛ, ewandji w’alembe la tongengele tshɛ ta la Ngalileya oya lo dambo diakɔ. La dikɔlɔ, Salɔme, osekaseka wakote Hɛrɔdiyasi nde la Filipɛ, omɛnde la ntondo, amboya dia ndjɔnwɛla ase dambo wɛnyɛ. Nɔshi diande diambɔngɛnyangɛnya apami tshɛ wakelame lo dambo sɔ.
Salɔme ambɔngɛnyangɛnya Hɛrɔdɛ woho w’anyanya. Diɔ diakɔ diamondôlaka ate: “Onombe engo tshe kalangaye, ku layukushato.” Nde ambôtshibɛ ndo mbotshibɛ ate: “Engo tshe kayuyonomba, layukushato, kuyanga etenyi ka hendi ka diulelu diami.”
La ntondo ka nde kadimola, Salɔme ambotomba dia tɛnana la nyango. Mbatondowombola ate: ‘Awɔlɔmbami?’
He lâsɔ ɔnɛ ambotanema diaaso diakɔ dialelande! Aha la mengenga kânga yema, Hɛrɔdiyasi mbôkadimolande ate: “Ote wa Joani Ubatizanyi.”
Salɔme mbakalolande esadi eto oya le Hɛrɔdɛ ko nde ndjowotɛ ate: “Umbisha ote wa Joani Ubatizanyi kakiane lu donga, mbalangami.”
Hɛrɔdɛ ambonyanga efula. Koko, nɛ dia wanɛ wakandele lo dambo wakoki etshibelo kande, nde ambotshimba yimba dia paka kikotsha, kânga mbahombande ndjaka onto laha l’onongo. Wonya akɔ wâmɛ, nde ambotoma ondjakanyi ɔmɔtshi otsha lo luudu la lokanu dia tokotsha lotumu lɔsɔ la wɔma efula. Aha la tshimbatshimba, ondjakanyi akɔ ambokalola l’ɔtɛ wa Joani lo dɔnga ko ambowosha Salɔme. Ko Salɔme ambɔsa ɔtɛ akɔ, ambɔtɔlɛ nyango. Lam’oki ambeki wa Joani dikambo sɔ diotshami, vɔ wamboya dia ndjɔsa odo wa Joani ɔnɛ kele totokundɛ, ko vɔ wambototɛ Yeso losango lɔsɔ la lonyangu efula.
L’ɔkɔngɔ diko, Hɛrɔdɛ amboka lokumu la woho wakɔnɔla Yeso anto ndo watondjande ɛdiɛngɛ, ko asolo ande wambotatɛ mpahana, nde ôka wɔma, akana ate: ondo onto ɔsɔ mɛtɛ ekɔ paka Joani kambolɔ oma l’edo. L’ɔkɔngɔ w’akambo asɔ, nde ayoyona dia mɛnana la Yeso, aha dia ndjolongamɛ wetshelo ande, koko dia nde ndjoshikikɛ ɔnɛ kana awui wokande wɔma wekɔ mɛtɛ kana kashi. Mateu 10:1-5; 11:1; 14:1-12; Mako 6:14-29; Luka 9:7-9.
▪ Lande na kambɔtɔ Joani lo lokanu, ndo lande na kahalange Hɛrɔdɛ mbodiaka?
▪ Woho akɔna wamboyokoka Hɛrɔdiyasi ndjakisha Joani?
▪ Lande na kalanga Hɛrɔdɛ mɛnana Yeso l’ɔkɔngɔ wa nyɔi ka Joani?