Tshapita 21

Lo ɛtɛmwɛlɔ ka la Nazarɛta

AHA la tamu, osukusuku wa mamba wamboyala la Nazarɛta lam’okaludi Yeso oya lakawɔ. La ntondo ka nde ntshɔ dia tobatizama le Joani, ambolekana ɔnɔnyi w’otondo, anto wakaweyaka tsho ɔnɛ otshudi w’abaya mbende. Koko kakianɛ, anto wambokokola lokumu lande ɔnɛ osadi w’ahindo mbende. Asolo w’ase ngelo wekɔ lo nomɔlomɔ dia mbɛ̂na asala akambo amɔtshi wa diambo l’atei awɔ.

Asolo awɔ wamboleka nomɔlomɔ lam’ɛnyiwɔ Yeso ambɔtɔ lo ɛtɛmwɛlɔ ka lo ngelo kakɔ, oko wele mbekelo kande. Nde ambemala l’atei a losanganya dia nde mbala ko wambowosha wɔɔmbɔ w’omvutshi Isaya. Nde ambɛna dihole diatɛkɛta dikambo di’Ɔnɛ lakakitama nyuma ka Jehowa, dihole diakɔ sɔ tanemaka lo Isaya tshapita 61 lo Bible yaso ya nshi nyɛ.

L’ɔkɔngɔ wa nde mbala ɔnɛ Onto akɔ ɔsɔ ayosambisha dikambo di’etshungwelo le wanɛ wakandama lo lɔhɔmbɔ ndo dia ɛsɛnɛlɔ le akanga a totshungu, la mbutɛ anto dia eleko k’ɔlɔlɔ kaki Jehowa, Yeso ambokaloya wɔɔmbɔ le olami ko nde ambodjasɛ. Anto tshɛ wekɔ lo mbênda tɛɛ. Ko nde ambotatɛ ntɛkɛta, ondo tshanda y’ɔlɔlɔ, âlembetshiya ate: ‘Ɛlɔ kɛnɛ, divɛsa nɛ di’omanyu la mboka diambokotshama.’

Anto wekɔ lo mamba dia “aui wa ngandji ka mamba” watande ko wombwana vate: “Ndi kema on’a Josefu uka?” Koko, êya ɔnɛ vɔ nangaka mbɛ̂na asala ahindo, Yeso mbawatɛnde nto ate: “Mete, nyayukanula nyati: We wetshi, uyakonoya! Utshi akambu wakatuki we atsha la Kaperenauma ndu lindu lakanyu.” Mɛnamaka dia, anto w’edjedja wa lo ngelo ka Yeso wekɔ lo mɛna ɔnɛ: nde otohomba tatɛ la nkɔnɔya anto lo ngelo kawɔ, dia vɔ monga anto wa ntondo wa kondja ɛlɔlɔ oma lɔkɔ. Ɔnkɔnɛ, vɔ wambɛna ɔnɛ Yeso ambowaɔnyɔla.

Oko weyande tokanyi tawɔ, Yeso ambowaohola ɛkɔndɔ ɛmɔtshi wasungana. Nde ambowaɛnya ɔnɛ: lo nshi y’Elidja, wadi waki edo wakikɔ efula l’Isariyɛlɛ, koko Elidja kotomama kânga le ɔtɔi a l’atei awɔ. Lo dihole dia nde ntshɔ otsha le Ase Isariyɛlɛ, nde akatshu otsha le wadi aki odo laki komonga Ose Isariyɛlɛ, ɔnɛ lakadjasɛka la Sidɔna, ko akatoshimbɛka lɔsɛnɔ lande oma lo dihindo diakandasale. Ndo lo nshi yaki Elisha, akanga a sudi wakikɔ efula, koko Elisha akakɔnɔya paka Namana oto, ɔnɛ laki Ose Suriya.

Ɛkɔndɔ ɛsɔ hawɔngɛnyangɛnya wanɛ wele lo ɛtɛmwɛlɔ, nɛ dia vɔ tondjaka lokaki lawɔ lo sɛkɛ la woho wewɔ kema la mbetawɔ, ɔnkɔnɛ, vɔ wambodunganela la nkɛlɛ ko wambonɛ, wambosokola Yeso polo ndo l’andja w’osomba. Wambohemba dia mbosokola oma lo dikona diohikami osomba awɔ. Koko Yeso ambohandɔ oma l’anya awɔ ko ambolawɔ, ambotomba tshondo tsho. Luka 4:16-30; 1 Khumi ya Dikanga 17:8-16; 2 Khumi ya Dikanga 5:8-14.

▪ Lande na kambɔtɔ osukusuku l’osomba wa Nazarɛta?

▪ Kakɔna kakana anto lo dikambo dia dako dia Yeso, ko kakɔna kamboyowaokiya nkɛlɛ ka mamba?

▪ Kakɔna kambowoyanga salɛ Yeso?