Tshapita 48

Yeso ambomɔ laka Jayiro ko ambokalola la Nazarɛta

YESO ambosala olimu efula lushi l’ɛlɔ—nde akaye lo wâto oma la Dekapɔli, akakɔnɔdi omoto laki la hemɔ k’ɔkɛlɛlɔ wa dikila, ndo akolodi ɔn’aki Jayiro la omoto. Koko wonya atadje. Kem’edja l’ɔkɔngɔ wa Yeso mumɔ oma laka Jayiro, akanga a totshungu ahende woyôyele l’ɔkɔngɔ, wayahangɔhangɔ vate: “[Ɔna Davidi, NW], otôke ketshi.”

Lam’elɛwɔ Yeso ɔnɛ: “Ɔna Davidi,” anto asɔ mɛnyaka dia vɔ mbetawɔka ɔnɛ Yeso mbele okitɔ w’okudi wa Davidi, ɔnkɔnɛ nde mbele Mɛsiya wakalakema. Koko Yeso ambosala oko onto lahoke ekoko awɔ, ondo dia nde menda kana vɔ wayotetemala. Koko apami asɔ hawohekɔ. Vɔ wamboyela Yeso polo ndo lɛnɛ odjashinde, nde ambɔtɔ lo luudu, ko ndo vɔ wambôyela polo ndo l’etei.

Lam’ɔtwɛwɔ, Yeso ambowambola ate: “Nyu mbetawoka nyati: Dimi mbeyaka ntsha dikambu ne?”

Ko wango mbôkadimolawɔ la mbetawɔ tshɛ ɔnɛ: “Elu, Khumadiondjo.”

Ɔnkɔnɛ, Yeso amonanda asho awɔ, ko ambota ate: “Diatshami le nyu uku mbetawo kanyu.” Wonya akɔ wâmɛ, asho awɔ wambɔsɛna! Koko Yeso ambâkɔkɔmiya ate: “Untu teyaki dikambu ne.” Ko lam’ele vɔ wekɔ l’ɔngɛnɔngɛnɔ efula, vɔ hawokitanyiyisha dui dia Yeso ko wambotatɛ dianganya lokumu lande lo toshamba tshɛ.

Yema tshitshɛ l’ɔkɔngɔ w’apami asɔ minya ekolo oma la le nde, wambela Yeso pami kɛmɔtshi kele l’ɔdiɛngɛ wawetɛ lomi. Yeso ambotondja ɔdiɛngɛ akɔ ko nde ambotatɛ ntɛkɛta. Elui w’anto wamamba lam’ɛnyiwɔ ahindo asɔ, ko wota vate: “Dikambu dia wuhu one diatenama nduku lushi lu Isariyele.”

Ndo Afarisɛ mbele lâwɔ. Vɔ hawokoke manguna ahindo asɔ, koko nɛ dia vɔ wekɔ anto wa kɔlɔ ndo la lonyû l’etema, wambotatɛ mɔnyɔla kiɔkɔ ya wolo wasala Yeso akambo wa mamba, wata vate: “Ndi atutundjaka edienge uma lu wulu w’uwandji w’edienge.”

Kem’edja l’ɔkɔngɔ w’akambo asɔ, Yeso ambokalola la Nazarɛtɛ, osomba wakandole, mbala kɛnɛ ambeki ande wambôtshindɛ. Ambeta oko yɛdikɔ y’ɔnɔnyi w’otondo, lam’akandatshu lo luudu l’ɔtɛmwɛlɔ ko têtsha anto lɛkɔ. Kânga mbakangɛnangɛnaka anto ɛtɛkɛta ande w’amɛna oma l’etatelo, vɔ wakayotona wetshelo ande l’ɔkɔngɔ diko, ko wakayoyanga dia mbodiaka. Kakianɛ, Yeso ambohemba nto la kɛtshi tshɛ dia kimanyiya anyande asɔ wa ntondo.

Kânga mbakakɛlaka nyemba y’anto oya le Yeso lam’akinde lo ahole akina, aha ɔsɔku mbambosalema lanɛ. Diɔ diakɔ diambondotshɔ lu luudu l’ɔtɛmwɛlɔ lushi la Sabato dia têtsha. Efula ka wanɛ wôhokamɛ wekɔ lo mamba. Vɔ wombwana vate: “Lendi oshi untu one [lomba lɔnɛ, NW], ndu akambu wa mamba ane? Aha on’a utshudi w’abaya kendi? Vo haweti nyangu vati: Mariya? Jakoba, la Josefu, la Simona la Judasi waha anangu? Ndu akadiendi tshe, waha l’atei asu? Ku uma lendi akayala untu one la akambu ane tshe?”

Wekɔ lo mbuta vate ‘Yeso ekɔ ose ngelo oko sho. Takawɛnyi lam’akandayolaka, ndo sho mbeyaka nkumbo kande. Woho akɔna wakokande ndjâla Mɛsiya?’ Ɔnkɔnɛ, kânga mbɛnama tolembetelo tshɛ—lomba lande l’efula ndo ahindo asɔ—vɔ hawetawɔ. Kânga ase nkumbo kande wambotakana lo dikambo diande nɛ dia vɔ mbeyaka woho wênde tshɛ, diɔ diakɔ diambodihiya Yeso ate: “Umvutshi ndjalaka aha la kenemo tshikima lu leke lawo, lu khumbu kawo la lu luudu lawo.”

Mɛtɛ, Yeso amamba dia mɛna woho wewɔ bu la mbetawɔ. Diɔ diakɔ diahandosala ahindo efula lɛkɔ, onyake paka mbahɛ ase hemɔ amɔtshi anya ko mbakɔnɔya. Mateu 9:27-34; 13:54-58; Mako 6:1-6; Isaya 9:7.

▪ Lam’elɛwɔ Yeso ɔnɛ: “Ɔna Davidi,” akanga a totshungu wambɛnya ɔnɛ vɔ mbetawɔka dikambo diakɔna?

▪ Lo ndjela kɛnɛ kata Afarisɛ, oma lo wolo akɔna wasala Yeso ahindo?

▪ Lande na kataso ɔnɛ Yeso ambɛnya kɛtshi kande lam’okalodinde dia ndjokimanyiya wanɛ wele la Nazarɛta?

▪ Woho akɔna wambolongwama Yeso la Nazarɛta, ndo lande na?