ƆKƆNDƆ 92

Yeso ambolola odo

ƆNA omoto lɛnayɛ lanɛ ekɔ l’ɛnɔnyi dikumi l’ehende. Yeso ambôkimɛ lo lonya, ndo nyango la she wakemadi suke lande. Wɛ mbeyaka lande na kewɔ l’ɔngɛnɔngɛnɔ ngango? Tênde dikambo diakɔ.

She ɔna omoto ongo ekɔ onto la woke, lokombo lande Jayiro. Lushi lɔmɔtshi ɔnande la omoto akatate hemɔ, ko wakawoshanya lo mbeto. Koko, nde kɔ̂kɔlɔngana. Hemɔ kande kakatahekaka paka peka tsho. Jayiro la wadiɛnde waki la lonyangu efula, nɛ dia akɛnamaka oko ɔnawɔ la dikɛnda aya lokolo lo diombo. Nde mbaki tshɔi y’ɔnawɔ. Omalɔkɔ, Jayiro akatshu dia toyanga Yeso. Nde akoke lokumu l’ahindo wakasalaka Yeso.

Lam’akatotanaka Jayiro Yeso, nde akatane olui w’anto wôdingi. Koko Jayiro akasɔsɔmɛ l’atei w’olui w’anto ko akakɔ l’ekolo a Yeso. Nde akawotɛ ate: ‘Ɔnami la omoto ekɔ la hemɔ wolo efula. Lam’alangayɛ, yaka kele oyɔ̂kɔnɔya. Ko Yeso akawotɛ ate: lekɔ lo ndjaye.’

Lam’akawatatshɔka kâmɛ, olui w’anto wakamamasana la Yeso efula. Ko Yeso akemala la shashimoya. Nde akambola ate: ‘Akɔna omunandji?’ Yeso akoke wolo wambotomba oma lo demba diande, diɔ diakɔ diakandeye ate onto ɔmɔtshi akamunandji. Ko onto akɔna akawonanda na? Aki omoto ɔmɔtshi lakatataka hemɔ edja k’ɛnɔnyi dikumi l’ehende. Nde akaye, akayonanda dihɔndɔ dia Yeso, ko nde akakɔnɔ!

Dikambo sɔ diakaleke keketsha Jayiro, nɛ dia nde akakoke mɛna woho wakɔnɔla Yeso onto aha ndoko l’okakatanu. Koko dikɛndji dimɔtshi diakaye. Nde akatɛ Jayiro ate: ‘Tosanyake Yeso nto. Ɔnayɛ la omoto akashidi la mvɔ.’ Yeso akoke dui sɔ ko nde akatɛ Jayiro ate: ‘Toyakiyanyake, ndoko dikambo diambolana.’

L’ɔkɔngɔ diko, lam’akawatokomaka lo luudu laki Jayiro, vɔ wakatane anto walela la lonyangu l’efula. Koko Yeso akate ate: ‘Takonyolela. Ɔna havoe. Lo djɔ mbênde.’ Koko anto wakawɔlɛ ndo wakɔ̂sɔkɛ, nɛ dia vɔ wakeyaka vate ɔna akashidi la mvɔ.

Ko Yeso akɔshi nyango ɔna la she ɔna kâmɛ l’apɔstɔlɔ ande asato ko akɔtɔ lawɔ lo luudu lakawetamia ɔna. Nde akokimɛ lo lonya ko akawotɛ ate: ‘Etɔ!’ Ko nde akolɔ, oko wɛnayɛ lanɛ. Nde aketɔ ko akatatɛ la kɛndakɛnda! Diɔ diakɔ dingo diɛnayɛ nyango la she wele l’ɔngɛnɔngɛnɔ efula.

Ɔna omoto ongo kema onto la ntondo lakolola Yeso oma l’edo. Onto la ntondo latɛkɛta Bible dikambo diande ele ɔn’aki wadi aki odo lakadjasɛka l’osomba wa Nayina. L’ɔkɔngɔ diko, Yeso akayolola ndo Lazaro, ɔnango Mariya la Mata. Etena kayolɛ Yeso oko nkumekanga kakadjama oma le Nzambi, nde ayolola lokema l’anto wakavu. Onde hatokoke ngɛnangɛna lo dikambo sɔ?

Luka 8:​40-56; 7:​11-17; Joani 11:​17-44.