Tshapita 47

Delo diambokadimɔ ɔlɔ w’efula

LAM’ƐNYI Jayiro ɔnɛ omoto laki la hemɔ k’ɔkɛlɛlɔ wa dikila ambɔkɔnɔ, mbetawɔ kande k’ɔnɛ Yeso ekɔ la wolo wa sala ahindo kamboleka keketala. Yema la ntondo, lushi lakɔ l’ɛlɔ, Jayiro akalɔmbi Yeso dia nde ndja dia ndjokimanyiya ɔnande la omoto l’ɛnɔnyi 12 lele suke la nyɔi. Kakianɛ, kɛnɛ kâtɛ Jayiro asolo kambosalema. Yeso âkatɛkɛta la omoto lakawonandji, ko apami amɔtshi wamboya, wamboyotɛ Jayiro lo woshɛshɛ vate: ‘Ɔnayɛ la omoto ambokitshiya lumu! Akayatasanya ombetsha nto?’

Ande losango la kɔlɔ efula lɛɛ! Ohokanyiya: Pami kɛsɔ, ɔnɛ lalɛmiyama efula oma le anto wa lo ngelo kande, ambɔkɔmɔ demba kɔmɔ l’etena kɛnɛ kam’okinde ɔnɛ ɔnande la omoto ambovɔ. Koko Yeso akuki awui wambowosawolaka. Mbasekesɔnde otsha le Jayiro ko nde mbokeketsha ate: “Tukaki woma; dikambu otoi, etawo.”

Yeso ambotshindɛ pami kɛsɔ kambɔkɔmɔ la lonyangu otsha lakande. Lam’okumiwɔ, watanake ko lofunguso efula, anto walela ndo wada tokoko. Olui w’anto wakamɔtshi ndo wekɔ lo ndjatshatsha la lonyangu. Yeso ɔnɛ ɔ̂tɔnde l’etei, mbambolande ate: “Dikambu kuna diadjanyu lufungusu l’alelu wuhu one na? Ona havwi, lu djo kendi.”

Kam’okiwɔ ɛtɛkɛta ɛsɔ, anto wambotatɛ mbɔla Yeso la lɔsɔkɔ la mamba, nɛ dia vɔ mbeyaka ɔnɛ ɔna ambovɔ mɛtɛ. Koko Yeso ate lo djɔ mbende. Oma lo wolo wa Nzambi, nde ayɛnya anto ɔnɛ nde kokaka mbolola onto esadi eto oko onto lawemula oma lo djɔ ya wolo.

Yeso ambotondja anto tshɛ l’andja, onyake Petero, Jakɔba, Joani, la Jayiro nde la wadiɛnde. Ko nde ambosukana l’anto asɔ atanu otsha lɛnɛ êtami ɔna omoto la dikɛnda. Yeso mbôkimɛnde lo lonya, ko nde mbuta ate: “Talita kumi” kadimola ɔnɛ: “Ona umuntu, lambukutela nti: Eto.” (Sho mbɛnganyisha alɛta ango.) Wonya akɔ wâmɛ ɔna ambetɔ ko ambotatɛ kɛndakɛnda! Lam’ɛnyiwɔ dihindo sɔ, ambutshi ande wambamba woho w’anyanya ndo wambolola l’ɔngɛnɔngɛnɔ polo ndo l’evɔ.

L’ɔkɔngɔ wa nde mbuta dia vɔ mbisha ɔna akɔ yangɔ ya ndɛ, Yeso ambotɛ Jayiro nde la wadiɛnde di’aha vɔ mbutɛ ndoko onto dikambo diambotshama. Koko, kânga mbotshi Yeso ɔsɔku, lokumu la dikambo sɔ lambodiangana lo lɛtshi la nkɛtɛ l’otondo. Ɔsɔ mbele onto la hende lambolwama oma le Yeso. Mateu 9:18-26; Mako 5:35-43; Luka 8:41-56.

▪ Losango lakɔna lambowoyotɛ Jayiro, ndo woho akɔna wambôkeketsha Yeso?

▪ Ngande wotanyiwɔ anto lo luudu la Jayiro lam’okumiwɔ lɛkɔ?

▪ Lande na kata Yeso ɔnɛ ɔna ekɔ lo djɔ ko tete le nde akashidi mvɔ?

▪ Naa anto atanu wele kâmɛ la Yeso wɛnyi eolwelo kɛsɔ?