Tshapita 46

Nde akananda dihɔndɔ diande

LOKUMU l’ɔnɛ Yeso oyakalola oma la Dekapɔli lambokoma la Kapɛrɛnauma, ko olui a woke w’anto wambɔmɔta l’ɔkɛngɛ wa ndjale dia ndjôlongola. Aha la tamu, vɔ wakoke ɔnɛ nde akɔladia lɔpɛpɛ la wolo ndo akakɔnɔya akanga w’ɛdiɛngɛ ahende. Lam’otumbinde oma lo wâto, vɔ wambôdinga, asolo awɔ walomɔlomɔ ndo wakongɛ dia mɛna akambo wayondosala.

Jayiro, ɔlɔmbɔdi ɔmɔtshi w’ɛtɛmwɛlɔ, ekɔ l’atei a wanɛ wele la mposa k’efula ka mɛnana la Yeso. Nde ambɔkɔ l’ekolo wa Yeso ko ôwɔsɛngasɛnga mbala ko mbala ate: “On’ami a umuntu a tshitshe uyanga mvo: uyeti, utuwahe anya, keli ndi akono, atshikali la lumu.” Jayiro nangaka ɔnande ɔsɔ woho w’anyanya, nɛ dia nde mbele tshɔi yande y’ɔna ndo nde êke paka l’ɛnɔnyi 12 eto.

Yeso ambetawɔ ko ambotshɔ otsha laka Jayiro, olui w’anto wayoyele. Ohokanyiya lofunguso ladja anto l’etena kɛnɛ, nɛ dia vɔ wekɔ lo nongamɛ ɔnɛ tayanga mɛna dihindo dikina. Koko, omoto ɔmɔtshi lele l’atei w’olui w’anto ekɔ lo ndjakiyanya paka dia pâ kande keto.

Omoto ɔsɔ ambosowa la hemɔ k’ɔkɛlɛlɔ wa dikila ɛnɔnyi 12 w’etondo. Nde ambotshɔ le enganga wa weoho la weoho, ko amboshidiya falanga yande tshɛ dia sakemɛ. Koko, nde atakɔlɔngana; hemɔ kande kekɔ lo taheke mpeka tsho.

Oko wadieyɛ mɛtɛ, lâdiko di’ɔlɛmbɛlɔ wawoshatɔ, hemɔ kande ekɔ hemɔ kasanya onto ndo ka nsɔnyi. Anto efula hawosanya dikambo dia hemɔ ka ngasɔ lo sɛkɛ. Lâdiko dia lâsɔ, lo ndjela Ɛlɛmbɛ wa Mɔsɛ, omoto lakɛla dikila ekɔ mindo, ndo onto tshɛ lawonanda kana lananda dihɔndɔ diande diosanyi la dikila, pombaka mbɔka ndo ndjâla mindo polo ndo la dikɔlɔ.

Omoto akɔ ɔsɔ akoke lokumu l’ahindo wa Yeso, diɔ diakɔ diambondoya lângo. Lo menda mindo kele lande, nde ambɔsɔsɔmɛ l’atei w’olui w’anto lo yishɛshɛ, ayatɛ ndamɛ ate: “Naka layunanda kuyanga ahondo andi atu, dimi layokono.” Lam’onandjinde ahɔndɔ ande, ko nde amboyaoka lo demba diande wonya akɔ wâmɛ ate: ɔkɛlɛlɔ ami wa dikila wambohembɔ!

“Umunandji na?” Asolo wa omoto akɔ ambâtɛ lam’okinde ɛtɛkɛta wa Yeso ɛsɔ! Woho akɔna wokukinde mbeya? Petero ambowotɛ ate: ‘Ombetsha, wɛ ongo ɛna olui w’anto wokodingi ndo watakodje mpika, ko wɛ ndjombola wate: “Umunandji na?”’

Yeso ekɔ lo nyanga omoto akɔ lo asho, ko nde ambota ate: “Untu omotshi akamunandji, ne dia dimi lambuka nti: Wulu wakatumbi uma le mi.” Mɛtɛ, ɔsɔ kema wonandelo wa wonandananda, nɛ dia ɛkɔnwɛlɔ koyadi kakatundjisha yema ya wolo oma le Yeso.

Lam’ɛnyinde ate lamboshɔma ɔnɛ ayami, omoto akɔ amboya ko ambɔkɔ la ntondo ka Yeso, ôka wɔma ndo adidima lokomba. La ntondo k’anto tshɛ, nde ambota kɛnɛ tshɛ k’endana la hemɔ kande ndo woho akɔna wɔkɔnwɛnde.

Asolo wa Yeso wambonandema oma lo woho wambetawɔ omoto dikambo sɔ, ko nde ambowoka kɛtshi, ambôtutsha solo ate: “On’ami, mbetawo kaye kambukokonoya; utshu la ki, okono tshe uma lu hemo kaye.” Ande ɔlɔlɔ mbeya ɔnɛ Ɔnɛ lakasɔnɔla Nzambi dia mbolɛ nkɛtɛ ekɔ onto lokana ngandji, lokana kɛtshi, layakiyanya lo dikambo di’anto ndo lele la wolo wa mbakimanyiya lee! Mateu 9:18-22; Mako 5:21-34; Luka 8:40-48; Akambu w’Asi Lewi 15:25-27.

▪ Jayiro ênde, ndo lande na kambondoya oya le Yeso?

▪ Okiyanu akɔna wele la omoto ɔmɔtshi, ndo lande na kele ekɔ wolo efula dia nde ntshɔ dia totɛ Yeso dia nde mbokimanyiya?

▪ Woho akɔna wambɔkɔnɔ omoto akɔ, ndo ngande wambôkeketsha Yeso?