Tshapita 26

Yeso ambokalola la Kapɛrɛnauma

LOKUMU la Yeso lambodiangana lo wodja w’otondo, ndo efula k’anto wambotshɔ polo ndo l’ahole a woshamu wodjashinde. Koko l’ɔkɔngɔ wa nshi mɔtshi, nde ambotenyanya Ndjale ka Ngalileya ko ambokalola la Kapɛrɛnauma. Lo tshenyi ya wonya, lokumu lambodiangana l’osomba w’otondo ɔnɛ nde ambokalola, ko anto efula wamboya oya lo luudu lodjashinde. Afarisɛ l’embetsha w’Ɛlɛmbɛ wamboya oma l’ahole w’etale efula, ndo oma la Jerusalɛma.

Lam’ele anto efula mɔta, ndoko dihole la soko nto di’onto mbɔtɔ. L’etena kɛsɔ mbayanga salema dikambo dimɔtshi dia diambo. Dikambo diakɔ diekɔ ohomba efula nɛ dia diɔ tokimanyiyaka dia sho shihodia ɔnɛ Yeso ekɔ la wolo wa minya kiɔkɔ ya fɔnu y’anto ndo wa nkɔnɔya anto tshɛ walangande.

Etena kêtsha Yeso lemba l’anto, apami anɛi wamboya la kanga ekuse ɔmɔtshi, êtami lo tange, oya lo luudu lakɔ. Vɔ nangaka dia Yeso nkɔnɔla ɔngɛnyi awɔ, koko nɛ dia olui w’anto wekɔ, vɔ hawokoke mbɔtɔ l’etei. Ande lonyangu lee! Koko vɔ hawohekɔ. He v’anɛ wadɛ lo sambe ka luudu lakɔ, mbatondolawɔ wosho ko mpoloya kanga ekuse êtami lo tange.

Onde Yeso ambômala l’ɔtɛ w’ɔnɛ wambôhembola ɔtɛkɛta? Kema, aha ɔsɔku! Koko, nde ambamba efula lo mɛna mbetawɔ k’apami asɔ. Nde ambotɛ kanga ekuse ate: “[Pɛkato, NW] yaye yambudimanyema.” Ko onde, mɛtɛ Yeso kokaka nyimanyiya pɛkato? Afundji l’Afarisɛ hawetawɔ dikambo sɔ. Vɔ wekɔ lo kanyiya l’etema awɔ vate: “Ukundi wata untu one osoku na? Ndi ambotenga [Nzambi, NW]. Akona eya nyimanyiya [pɛkato, NW] naka aha [Nzambi, NW] ndame?”

Oko weyande tokanyi tawɔ, Yeso ambowatɛ ate: “Okoko wana wayakananyanyu lu etem’anyu okone na? Dikambu diakona diuleki tshitshe: mvutela kanga ekhusi ati: [pɛkato, NW] yaye yambudimanyema, kana mvuta ati: Eto, osa tangi kaye, okendekende?”

Oma lâsɔ, ko Yeso ndjosha olui w’anto kâmɛ l’amɔnyɔdi ande diaaso dia vɔ mɛna dikambo dimɔtshi dia diambo diayɛnya ɔnɛ nde ekɔ la wolo wa nyimanyiya pɛkato yele la nkɛtɛ ndo mɛtɛ nde ekɔ onto loleki woke lo tena tshɛ. Nde ambokadimɔ otsha le kanga ekuse ko ambowotɛ ate: “Eto, osa tangi kaye, utshu lakaye.” Ɔtɛkɛta kele edja, pami kakɔ ambokitanyiya dui diande ko ambotomba lo asho w’anto tshɛ! Anto wambamba heyama ko vɔ wambotatɛ ntombola Nzambi, wata vate: “Shu tatenyi dikambu dia wuhu one.”

Onde wɛ akalembete dia Yeso akɛnya diɔtɔnɛlɔ diele l’asa pɛkato la hemɔ, ndo l’asa edimanyielo ka pɛkato la ɔkɔnwɛlɔ? Bible nembetshiyaka ɔnɛ: Adama, ombutshi aso wa ntondo, akasale pɛkato ko sho takayokitaka etawo k’oma lo pɛkato kakɔ, etawo kakɔ ko hemɔ la nyɔi. Koko, l’ɛlɔmbwɛlɔ ka Diolelo diaki Nzambi, Yeso ayodimanyiya pɛkato ya wanɛ tshɛ woka Nzambi ngandji ndo wôkambɛ olimu, ko hemɔ tshɛ hatoyala nto. Ande ɔngɛnɔngɛnɔ wayonga laso l’etena kɛsɔ lee! Mako 2:1-12; Luka 5:17-26; Mateu 9:1-8; Romo 5:12, 17-19.

▪ L’etena kakɔna ndo lo dihole diakɔna diambosalema dikambo dimɔtshi dia diambo?

▪ Woho akɔna wamboyokoma kanga ekuse polo ndo le Yeso?

▪ Lande na keso sho tshɛ akanga a pɛkato, ko woho akɔna wakatosha Yeso elongamelo k’ɔnɛ pɛkato yaso yayodimanyiyama ndo tayɔkɔnɔ lo hemɔ yaso?