Tshapita 29

Elimu w’ɔlɔlɔ lushi la Sabato

TEKƆ l’eleko kamɔnga akatshi ka l’ɔnɔnyi 31 T.D. Ngɔndɔ mɔtshi yambeta tatɛ lam’akatɛkɛtaka Yeso la omoto suke l’ɛtɛkɔ ka la Samariya lam’ende lo tatshu ma la Judeya otsha la Ngalileya.

Kakianɛ, l’ɔkɔngɔ wa nde sambisha efula lo Ngalileya k’otondo, Yeso ambotshɔ nto la Judeya, lɛnɛ ayangande tosambisha lo tɛmwɛlɔ. Bible tɛkɛtaka efula dikambo di’olimu wa Yeso la Ngalileya, oleki dikambo di’olimu ande la Judeya mbala kɛnɛ kende lɛkɔ ndo l’edja ka ngɔndɔ yakandatshikala lanɛ l’ɔkɔngɔ wa difɛstɔ di’Elekanelo dia komelo. Anto konongola olimu ande w’esambishelo dimɛna la Judeya oko la Ngalileya.

Kem’edja, Yeso ambonda lɔkɛndɔ otsha la Jerusalɛma, osomba a woke wa la Judeya, dia tosala difɛstɔ di’Elekanelo dia l’ɔnɔnyi 31 T.D. Ongunda welɛwɔ Bɛtɛzata wekɔ suke la soko di’osomba dielɛwɔ ɔnɛ: Soko di’Ɛkɔkɔ, l’ongunda akɔ mbatshɔ ase hemɔ efula, totshungu ndo akanga wa tshumbe. Vɔ fɔnyaka ɔnɛ onto kokaka nkɔnɔ lam’ayondɔtɔ l’ashi w’ongunda etena kele asuku.

Tekɔ lushi la Sabato, ko Yeso ambɛna pami kɛmɔtshi katata aya ɛnɔnyi 38 w’etondo. Oko weyande ate pami kakɔ ambotata edja efula, Yeso mbawombolande ate: “We nangaka nkono?”

Ko nde la Yeso ate: “Khumadiondjo, [etena kasukasuka ashi, NW] laha la untu lambidja l’ungunda. Keli ndjalaka la[kata]tshu, ku ukina ambundekana.”

Yeso mbawotɛnde ate: “Unela, embe tangi kaye, okendekende.” Kakianɛ, pami kakɔ ambɔkɔnɔ, ambɔsa tange kande ko ambotatɛ kɛndakɛnda!

Koko, Ase Juda wambowɛna, ko wambowotɛ vate: “Elo, eko lushi la [Sabato, NW]. Memba tangi kaye, eko ekila.”

Ko pami kakɔ nde lawɔ ate: “Lakakonodi kumvutedi ate: Embe tangi kaye, okendekende.”

Ko vɔ lande vate: “Untu akona akakutedi ati: Embe tangi, okendekende?” Yeso akatumbi l’andja nɛ dia anto wamboleka efula, koko pami kakɔ heye lokombo lande. Koko, l’ɔkɔngɔ diko, Yeso nde la pami kakɔ wamboyohomana lo tɛmpɛlɔ, lâsɔ mbambondoyeya ɔnɛ lakɔ̂kɔnɔdi.

Ɔnkɔnɛ, pami kakɔ ambotshɔ le Ase Juda ko ambotowatɛ ɔnɛ Yeso mbɔ̂kɔnɔdi. Kam’okiwɔ ngasɔ, Ase Juda mbatshɔwɔ le Yeso. Lande na? Onde dia ntêya oma l’ekimanyielo kakɔna kakandasadi akambo asɔ wa diambo? Kema. Koko dia towosha ɛkɔmɔ l’ɔtɛ w’ɔnɛ nde mbambosala elimu w’ɔlɔlɔ lushi la Sabato. Ko wambotatɛ ndo mbɔhɛnyahɛnya! Luka 4:44; Joani 5:1-16.

▪ Ambeta oko nshi ngana oma lam’aki Yeso mbala ka komelo la Judeya?

▪ Lande na katshɔtshɔ anto efula l’ongunda wa Bɛtɛzata?

▪ Dihindo diakɔna diosadi Yeso l’ongunda akɔ, ndo Ase Juda vate na ambowota lo dikambo sɔ?