Onto koka nsala elimu w’ɛlɔlɔ lushi la Sabato?

Yeso akasale akambo efula l’olimu wa wolo wakandakambe la Ngalileya. Koko lo mbuta ɔnɛ, “Dimi pombaka mbewoya lokumu l’ɔlɔlɔ la Diolelo dia Nzambi ndo l’esomba ekina,” Yeso kokanyiyaka tsho dikambo dia Ngalileya. Ɔnkɔnɛ, nde akatshu “tosambisha lo toshinangɔnga ta la Judeya.” (Luka 4:43, 44) Dui sɔ mbokɛmaka nɛ dia taya kakianɛ l’eleko ka mɔnga akatshi ndo fɛtɛ ka la Jɛrusalɛma kaya suke.

Lo mbɛdika la kɛnɛ kadiaso l’olimu waki Yeso la Ngalileya, Evanjiliɔ hawɔtɛkɛta efula lo kɛnɛ kendana l’olimu ande la Judeya. Kaanga mbele lo tshɛ kawɔ ase Judeya waki la wendjudi, dui sɔ koshimba Yeso dia nde nsambisha la waasaso tshɛ ndo nsala elimu w’ɔlɔlɔ dihole tshɛ diende.

Kem’edja Yeso otatshu otsha la Jɛrusalɛma, osomba woleki wa la Judeya lo dambo di’Elekanelo dia lo 31 T.D. Lo dihole diaketetaka anto efula suke la Soko di’Ɛkɔkɔ, aki oduwa ɔmɔtshi w’ashi wa woke wakawelɛka Bɛtɛzata. Anto efula waki la hemɔ, totshungu ndo ntshumbe wakayaka l’oduwa ɔsɔ. Lande na? Nɛ dia anto tshɛ waketawɔka dia onto kokakakɔnɔ lo ntambɛ l’oduwa etena kasukasuka ashi.

Ekɔ lushi la Sabato ndo Yeso ambɛna pami kɛmɔtshi l’oduwa ɔsɔ kele aya la hemɔ ɛnɔnyi 38. Yeso akawombola ate: “Onde wɛ nangaka nkɔnɔ?” Pami kɛsɔ akakadimola ate: “Yɔnɛ, dimi bu la onto lakimanyiya dia tambiyami l’oduwa etena kasukasuka ashi. Mbala tshɛ kalangami ntambɛ, onto okina ndekanakami.”​—Joani 5:6, 7.

Yeso akate dui dimɔtshi diakahombe mambiya pami kɛsɔ ndo anto tshɛ wakadioke ɔnɛ: “Emala, ɔsa mbeto kayɛ, kɛndakɛnda.” (Joani 5:8) Ndo kɛsɔ mɛtɛ mbakandasale. Mbala kakɔ ɔtɔi pami kakakɔnɔ akɔshi mbeto kande, ko akatatɛ nkɛndakɛnda!

Koko lo dihole dia vɔ monga l’ɔngɛnɔngɛnɔ lo dui dia diambo diakasalema, ase Juda wakɛnana la pami kɛsɔ ko wakawotɛ ɔnɛ: “Ɛlɔ ekɔ Sabato, bu dimɛna wɛ mɛmba mbeto.” Pami kakɔ akaakadimola ate: “Pami kakakɔnɔdi akambute ate: ‘Ɔsa mbeto kayɛ, kɛndakɛnda.’” (Joani 5:10, 11) Ase Juda asɔ wakatɛkɛtaka kɔlɔ lo dikambo di’onto lambɔkɔnɔ lushi la Sabato.

Vɔ wakambola ɔnɛ: “Pami kakɔna kakakote ate: ‘Ɔsa mbeto kayɛ, kɛndakɛnda’?” Lande na kakawambola pami kɛsɔ dui sɔ? Nɛ dia Yeso “akamɔ oma laawɔ,” ndo pami kakakɔnɔ kombeyaka lokombo la Yeso. (Joani 5:12, 13) Koko pami kɛsɔ akahombe ndjohomana nto la Yeso. L’ɔkɔngɔ diko, lo tɛmpɛlɔ pami kakɔ akahomana la Yeso ndo akeye onto lakɔkɔnɔla l’oduwa w’ashi.

Pami kakakɔnɔ akatshu tɛnana l’ase Juda wanɛ wakawombola awui wendana la ɔkɔnwɛlɔ ande. Nde akawatɛ dia Yeso mbakɔkɔnɔla. Lam’akawoke dui sɔ, ase Juda wakatshu le Yeso. Onde vɔ wakatshu dia teya lo tshimbo yakɔna yele Yeso l’akoka wa nsala awui wa diambo asɔ? Ndooko. Vɔ wakatshu dia tonda Yeso l’ɛkɔmɔ l’ɔtɛ wakandasale awui w’ɔlɔlɔ lushi la Sabato. Ndo vɔ wakakome polo lo mbɔhɛnyahɛnya!