Tshapita 36

Mbetawɔ ka woke k’ɔlɔmbɔdi w’alembe

ETENA kasha Yeso dako diande lo Dikona, lâsɔ ko nde ambosala suke l’etenyi ɔtɔi ka l’ahende k’olimu ande wa lanɛ la nkɛtɛ. Kɛsɔ nembetshiyaka ɔnɛ ambôtshikalɛ paka oko ɔnɔnyi ɔtɔi la ngɔndɔ divwa dia nde nshidiya olimu ande wa lanɛ la nkɛtɛ.

Kakianɛ, Yeso ambɔtɔ l’osomba wa Kapɛrɛnauma, lɛnɛ akandalɔngɔsɔla olimu ande. Lam’ende lanɛ, dikumanyi di’Ase Juda diamboya dia ndjɔ̂lɔmba dikambo dimɔtshi. Ɔlɔmbɔdi ɔmɔtshi w’alembe w’Ose Rɔmɔ mbâtumi, nde ekɔ Ose Wodja, mbuta ate onto lele bu lo dioho di’Ase Juda.

Pami kɛsɔ ekɔ l’okambi ɔmɔtshi walangande efula, ko okambi akɔ ekɔ suke la mvɔ la hemɔ ka wolo, diɔ diakɔ dialangande Yeso mbɔkɔnɔla. Ase Juda wambotetemala sɛngasɛnga Yeso dia nde kimanyiya ɔlɔmbɔdi akɔ w’alembe, wawotɛ vate: “Ololo andi nkukaka dia we mbutshela dikambu so, ne dia ndi nangaka wudja asu. Ndame kakatuhikela etemwelo kasu.”

Aha la mengenga, Yeso ambotshɔ l’apami akɔ. Koko, oko wayawɔ suke la ngelo, ɔlɔmbɔdi ɔsɔ w’alembe ambotoma angɛnyi ande dia vɔ ndjowotɛ ɔnɛ: “Khumadiondjo, tuyasuyaki, ne dia dimi kema ololo wukukiye mboto lu luudu lami. Ntu, dimi lakakani nti: Dimi kema ololo wukukimi ntsho le ye.”

Ande ndjakitshakitsha kele l’ɔlɔmbɔdi ɔsɔ w’alembe, ɔnɛ lele la mbekelo ka ntomɛka anto akina awui! Koko ondo nde ekɔ lo kanyiya nto lo dikambo dia Yeso, nɛ dia nde mbeyaka mbekelo kashimba Ose Juda dia nde mbekesanɛ l’Ose Wodja. Kânga Petero akate ate: “Nyu mbeyaka nyati: Dikambu dia usi Juda mbekesanela la usi wudja ukina, kana mboto lu luudu landi, eko ekila.”

Ondo ɔlɔmbɔdi ɔsɔ w’alembe halange vɔ ndjɔhɛnyahɛnya Yeso ɔnɛ nde mbambɔnyɔla mbekelo kɛsɔ, diɔ diakɔ diakandatumi angɛnyi ande dia vɔ ndjowotɛ ɔnɛ: “Uti diui, ku ukambi ami ayokono. Ne dia dimi leko l’okongo w’akina, leko la alimbi l’okongo ami; naka layutela omotshi nti: Utshu, ndi ayutsho; la ukina nti: Uyi, ndi ayuya; ndu ukambi ami nti: Utshi okone, ndi ayutsha.”

Lam’oki Yeso dikambo sɔ, nde ambamba heyama. Mbatande ate: “Dimi lambunyutela nti: Dimi latenyi mbetawo ka wuki wuhu one kuyanga lu Isariyele.” L’ɔkɔngɔ wa nde nkɔnɔla okambi waki ɔlɔmbɔdi w’alembe, Yeso ambokamba la diaaso sɔ dia nde mɛnya ɔnɛ Ase Wedja wele la mbetawɔ wayokondja ɛtshɔkɔ watona Ase Juda wele kema la mbetawɔ.

Yeso ate: “Antu efula wayuya uma l’ehutwelu ndu uma l’edjelu ka unya, wayudjase la Abarahama, la Isaka, la Jakoba lu diulelu dia l’ulungu. Keli ana wa diulelu wayukadjema l’andja lu udjima. Delu diayuyala leko ndu nkeketanya ka wanyu.”

‘Ana wa diolelo wakakadjema lo wodjima wa l’andja’ kɛdikɛdi Ase Juda wa l’emunyi, wanɛ wahetawɔ diaaso diakawawasha ntondo dia mbolɛ kâmɛ la Kristo. Abarahama, Isaka la Jakɔba wekɔ didjidji dia dikongɛ dia Diolelo diaki Nzambi. Ɔnkɔnɛ, Yeso ekɔ lo mɛnya ɔnɛ, lo yoho mɔtshi, Ase Wedja wayolongwama lo mɛsa wa l’olongo, lo “diulelu dia l’ulungu.” Luka 7:1-10; Mateu 8:5-13; Etsha 10:28.

▪ Lande na kamboya Ase Juda dia ndjɔsɛngasɛnga Yeso dia nde kimanyiya ɔlɔmbɔdi ɔmɔtshi w’alembe w’Ose Wodja?

▪ Lande na kele ɔlɔmbɔdi w’alembe hetshi Yeso dia nde mbɔtɔ lo luudu lande?

▪ Yeso alangande mbuta lo ɛtɛkɛta ande wa ndjihelo?