TSHAPITA 36
Owandji w’asɔlayi ambɛnya mbetawɔ k’efula
OSE OLIMU W’OWANDJI W’ASƆLAYI AMBƆKƆNƆ
WANƐ WELE LA MBETAWƆ WAYƆTSHƆKWAMA
L’ɔkɔngɔ wa nde mbisha Dako diande dia lo Dikona, Yeso akatshu l’osomba wa Kapɛrnauma. Lɛkɔ dikumanyi dimɔtshi di’ase Juda diakaye le nde. Vɔ wakatomama oma le ose wodja okina, mbuta ate owandji w’asɔlayi w’ase Rɔmɔ.
Ose olimu w’owandji w’asɔlayi ɔsɔ wakandokaka ngandji aki la hemɔ wolo, suke la nyɔi. Kaanga mbele owandji w’asɔlayi ekɔ ose Wedja, nde ekɔ lo nyanga dia Yeso mbokimanyiya. Ase Juda wakatɛ Yeso dia ose olimu wa pami kɛsɔ “ekɔ lo luudu la hemɔ ka muyɛkɛ ndo nde ekɔ lo diɛnɛ efula,” ondo nde aki la paa k’efula. (Mateo 8:6) Dikumanyi di’ase Juda wakashikikɛ Yeso dia owandji w’asɔlayi ɔsɔ sunganaka dia nongola ekimanyielo kɛsɔ, lo mbolembetshiya ɔnɛ: “Nde nangaka wodja aso ndo ndamɛ mbakatokɛ shinangɔnga.”—Luka 7:4, 5.
Kem’edja, Yeso akatshu kaamɛ la dikumanyi sɔ lo luudu laki owandji w’asɔlayi. Lam’akiwɔ suke la nkoma, owandji w’asɔlayi akatome angɛnyi ande dia ndjowotɛ ɔnɛ: “Nkumadiɔndjɔ toyaɛnyake paa, nɛ dia dimi haasungana dia wɛ mbɔtɔ lo luudu lami. Diakɔ diakamɛnyi dia haasungana ndja dimɛ le yɛ.” (Luka 7:6, 7) Ande ɛtɛkɛta w’okitshakitsha wakakambe la onto lokoshaka anto akina wadjango lee! Ndo dui sɔ mɛnyaka otshikitanu wele lam’asa pami kɛsɔ l’ase Rɔmɔ wanɛ wakasoyaka ase olimu awɔ.—Mateo 8:9.
Aha la taamu, owandji w’asɔlayi ɔsɔ akeyaka dia ase Juda kombetawɔka monga la lɔngɛnyi l’anto waki komonga ase Juda. (Etsha 10:28) Ondo la dui sɔ lo yimba, owandji w’asɔlayi ɔsɔ akatome angɛnyi ande dia totɛ Yeso ɔnɛ: “Ta paka dui to, kele ose olimu ami akɔnɔ.”—Luka 7:7.
Yeso akaambe dia mboka ɛtɛkɛta ɛsɔ ndo akate ate: “Lambonyotɛ nte: Kaanga lo Isariyɛlɛ, talɛnyi ndooko onto la mbetawɔ ka wolo ka nganɛ.” (Luka 7:9) Lam’akawakalola lo luudu la owandji w’asɔlayi, angɛnyi ande wakatotana dia ose olimu laki la hemɔ wolo amboka dimɛna.
L’ɔkɔngɔ wa nde nsala dihindo di’ɛkɔnwɛlɔ sɔ, Yeso akakambe la diaaso sɔ dia nshikikɛ dia wanɛ waki komonga ase Juda wele la mbetawɔ wayɔtshɔkwama lo mbuta ate: “Anto efula w’oma lo ɛstɛ la owɛstɛ wayoya ndo wayodjasɛ mɛsa ɔtɔi kaamɛ la Abrahama, Isaka ndo Jakɔbɔ lo Diolelo dia l’olongo.” Ko kayotota dikambo dia ase Juda waki komonga la mbetawɔ? Yeso akate dia vɔ “wayokashema l’andja lo wodjima. Lɛkɔ mbayowolela ndo mbayowokakatanya wanyu awɔ.”—Mateo 8:11, 12.
Laasɔ, ase Juda wa lootɔ wahetawɔ diaaso diakashama ntondo le wɔ dia ntolɛ kaamɛ la Kristo lo Diolelo wayokashema. Koko ase Wedja wayetawɔma dia monga oko anto walɛ lo mɛsa ande, “lo Diolelo dia l’olongo.”