Tshapita 37
Yeso ambosamba wadi aki odo
YEMA l’ɔkɔngɔ wa nde nkɔnɔla okambi waki ɔlɔmbɔdi w’alembe, Yeso ambotshɔ otsha la Nayina, osomba wele lo kilɔmɛtɛlɛ 30 la mɔtshi lo sudɛ-owɛstɛ ka Kapɛrnauma. Ambeki ande la olui a woke w’anto wekɔ lo tatshu la nde. Ondo wonya aya otsha lo dikɔlɔ mbambowokoma suke l’osomba wa Nayina. Lanɛ, vɔ wambohomana l’olui w’anto wayɛmbɛ odo. Vɔ wekɔ lo ndjɛmbɛ odo w’ɔlɔngɔlɔngɔ ɔmɔtshi dia tôkundɛ l’andja w’osomba.
Nyango ekɔ la lonyangu la mamba nɛ dia nde ekɔ wadi aki odo, ndo ɔsɔ mbele tshɔi yande y’ɔna. Lam’akavu omɛnde, nde akakokaka ndjakeketsha ɔnɛ lekɔ l’ɔna pami. Kɛnɛ tshɛ kakandalongamɛka, saki yande, nango yande tshɛ, nde akayikitshaka l’ahɛka w’ɔna ɔsɔ. Koko kakianɛ, nde ndoko l’onto lakoka mbosamba nto. Omoto ɔsɔ ekɔ la lonyangu l’efula, diɔ diakɔ diayotshindɛ ase osomba oya la waembo.
Lam’ɛnyi Yeso omoto ɔsɔ, asolo ande wambɔkɛta lo menda lonyangu l’efula lele lande. Mbawotɛnde la kɛtshi tshɛ, koko ndo la dihonga diasha elongamelo ate: “[Takolela, NW].” Dikambo sɔ diambokotola yambalo y’olui w’anto. Ɔnkɔnɛ, nde ambosukana, ambonanda kaka y’odo, ko wanɛ watawɛmbɛ wambemala. Anto tshɛ woyambolaka dia mbeya kɛnɛ kayangande sala.
Mɛtɛ, wanɛ wakatatshindɛka Yeso wakawɛnyi akɔnɔla ase hemɔ efula lo dihindo. Koko ondo, lâsɔ ko vɔ watawɛnyi olola onto lambovɔ. Onde nde kokaka sala dikambo dia ngasɔ? Yeso mbatɛnde odo w’ɔlɔngɔlɔngɔ ate: “Olongo, dimi lambukutela nti: Eto.” Ko ɔlɔngɔlɔngɔ akɔ ambetɔ! Nde ambotatɛ ntɛkɛta, ko Yeso ambôkimɔ l’anya wa nyango.
Lam’ɛnyi anto ɔnɛ ɔlɔngɔlɔngɔ akɔ aya la lɔsɛnɔ mɛtɛ, vɔ wambotatɛ mbuta ɔnɛ: “Umvutshi a wuki ambuya l’atei asu.” Akina vate: “[Nzambi, NW] ambokendela wudja andi.” Kem’edja, lokumu la dikambo sɔ dia diambo lambodiangana lo Judeya y’otondo ndo l’esomba tshɛ wa l’emamu.
Joani Obatizanyi ekɔ paka lo lokanu, ndo nde nangaka mbeya akambo efula lo kɛnɛ k’endana l’ahindo asɔ watsha Yeso. Ayondosala na? Luka 7:11-18.
▪ Kakɔna kotumbi lam’okumi Yeso suke l’osomba wa Nayina?
▪ Ngande woyadi asolo wa Yeso wonya wɛnyinde dikambo sɔ, ndo amondosala?
▪ Anto vate na lam’ɛnyiwɔ dihindo diosadi Yeso?