Tshapita 50

Wambɔlɔngɔswama dia ntokomɛ ɛhɛnyɔhɛnyɔ

L’ƆKƆNGƆ wa nde ndakanya apɔstɔlɔ ande woho wa vɔ sala olimu w’esambishelo, Yeso ambowaewola dia vɔ mambalɛ atunyi. Nde ambota ate: “Nyulungi, dimi lambunyutuma uku ekoko l’atei wa ndjaundu. . . . Keli nyewo antu ne dia vo wayunyukimo lu dumbwelu, wayunyokomola lu temwelo diawo. Vo wayunyotola la ntundu ka embuledi la ka khumi ya dikanga dia dikambu diami.”

Kânga mbayɔhɛnyahɛnyama ambeki ande woho w’anyanya, Yeso ambâkeketsha lo mbasha daka nɛ ate: “Lam’ayuwunyukimo osoku, tanyuyakananyaki dia wuhu akona wayunyoteketa kana dia aui akona wayunyuta. Ne dia lu unya uku, wayunyusha aui wa nyu mvuta. Ne dia aha nyu mbayoteketa, keli [n]yuma ka Shenyu kayunyoteketsha.”

Yeso ambotetemala mbatɛ ate: ‘Onto ayokimɔ ɔnango ɔnɛ wôyake, ndo ombutshi wa pami ayokimɔ ɔnande ɔnɛ wôyake, ana wayɔtɔmbɔkwɛ ambutshi awɔ ndo wayowayaka.’ Nde ambota nto ate: “Nyu nyayuhetshama le antu tshe ne dia lukumbu lami. Keli one latetemala edja ndu l’ekumelu, ayushimbamela.”

Olimu w’esambishelo mboleki ohomba efula. Diɔ diakɔ diambɔkɔkɔmiya Yeso ɔnɛ ekɔ ohomba wa monga la yewo dia ndjalaka la lotshungɔ la kotsha olimu akɔ ɔsɔ. Nde ate: “Lam’ayuwunyusuya l’usumba omotshi, kanyulawo l’usumba ukina. Mete kanyutelami nti: La ntundu nyatashidiya nkindula lu esumba tshe wa lu Isariyele, On’a untu ayuya.”

Mɛtɛ, Yeso ekɔ lo mbutɛ apɔstɔlɔ ande 12 awui asɔ, awaewola ndo awakeketsha, koko nde ekɔ lo ntɛkɛta ndo lo dikambo dia wanɛ wayoyodja ekolo l’olimu w’esambishelo ka l’andja w’otondo l’ɔkɔngɔ wa nyɔi la eolwelo kande. Dikambo sɔ mɛnamaka l’ɛtɛkɛta ande hita, lam’otshinde ɔnɛ ambeki ande ‘wayohetshama le anto tshɛ,’ koko aha paka le Ase Isariyɛlɛ ato, wanɛ wakawatomɛ apɔstɔlɔ dia tâsambisha. Lâdiko dia lâsɔ, ondo mɛtɛ apɔstɔlɔ kɔtɔlama la ntondo k’emboledi la ka nkumi ya dikanga lam’akâtome Yeso l’olimu awɔ w’esambishelo waki kombiviya. Ndo nto, l’etena kɛsɔ ambetawudi kokimɔma oma le ase nkumbo yawɔ dia vɔ ndjakema.

Ɔnkɔnɛ, lam’akandate ɔnɛ ambeki ande hawotoshidiya la sambisha l’esomba tshɛ ‘la ntondo k’Ɔna onto ndja,’ Yeso akashaka pɔlɔfɛsi k’ɔnɛ ambeki ande hawotoshidiya nkindola nkɛtɛ k’otondo la sambisha Diolelo diaki Nzambi diôlɛ la ntondo ka Yeso Kristo, Nkumekanga kele lo lotombo, ndja dia ndjokotsha tɛdikɔ ta Jehowa l’Armagɛdɔ.

Yeso ambotetemala mbatɛ awui lo kɛnɛ k’endana l’olimu w’esambishelo ate: “Umbeki haleki umbetsha andi, ukambi haleki khumendi.” Ɔnkɔnɛ, ambeki wa Yeso pombaka nongamɛ ɔnɛ tayosoyama ndo tayɔhɛnyahɛnyama oko wakandahɛnyahɛnyama l’ɔtɛ wakandasambishaka Diolelo diaki Nzambi. Koko nde ambowasha dako nɛ ate: “Tanyukaki wane wadiaka alimba woma, keli haweyi ndjaka [anima, NW]. Keli nyuleki mbuka one lukuki ndjaka ndu [anima, NW] ndu dimba lu [Ngɛhɛna, NW] woma.”

Yeso akahombe mbatshikɛ ɛnyɛlɔ lo dikambo sɔ. La dihonga tshɛ, nde aketawɔ ndjakema lo dihole dia nde shisha kɔlamelo yande le Jehowa Nzambi, Ɔnɛ lele la wolo tshɛ. Eelo, Jehowa mbakoka ndjaka “anima” w’onto (kɛdikɛdi elongamelo ka nde ndjoyala anima wa sɛna nto lushi lɔmɔtshi) kana, lo yoho yotshikitanyi, nde mbakoka mbolola onto ko mbosha lɔsɛnɔ la pondjo. Jehowa mɛtɛ ekɔ Ombutshi woludi la ngandji ndo la kɛtshi!

Oma lâsɔ, Yeso ambokeketsha ambeki ande lo mbaokɛ wɛɛla ɔmɔtshi wɛnya woho wâkokɛ Jehowa la ngandji tshɛ. Nde ambombola ate: “Hawutusundjaka tufudu tuhendi dikuta diame? Keli nduku otoi ayoko lu kete ku Shenyu heyi. Ndu divu dia l’ete anyu diambalema tshe. Okone tanyukaki woma. Nyu [ndeka] tofudu efula [nɛmɔ].”

Losango la Diolelo lambosha Yeso ambeki ande dia vɔ sambisha layokakitola ase luudu ɔtɔi, nɛ dia ase nkumbo amɔtshi wayolietawɔ ko akina wayolitona. Nde ambolembetshiya ate: “Tanyukanaki nyati: Dimi lakayi dia nyela ki la kete. Dimi kundja dia nyela ki, keli lakayi dia nyela yombo.” Ɔnkɔnɛ, onto letawɔ akambo wa mɛtɛ ndamɛ l’atei a nkumbo pombaka monga la dihonga. Yeso ate: “Untu luka shi la nyangu ngandji kuleki kene kambukandi, ololo andi hakuki le mi; untu luka on’andi la pami kana la umuntu ngandji kuleki kene kambukandi, ololo andi hakuki le mi.”

Dia nde ndjihiya awui watɛnde ambeki ande, Yeso ambolembetshiya ɔnɛ wanɛ walongola ambeki ande mbolongolaka ndo nde. “Untu tshe lasha otoi omotshi a wane wuleki tshitshe dikoho di’ashi a tshitshi tu lu [woho wênde ombeki], mete kanyutelami nti: Ndi hushisha difutu diandi.” Mateu 10:16-42.

▪ Alako akɔna wambosha Yeso ambeki ande dia mbaewola?

▪ Woho akɔna wambondâkeketsha ndo wambondâsamba?

▪ Lande na kele alako wambosha Yeso mendanaka ndo l’Akristo wa lo nshi yaso nyɛ?

▪ Lo yoho yakɔna yahaleki ombeki wa Yeso ombetsha ande?